00:00:00 IGIHE NETWORK KN KINYARWANDA EN ENGLISH FR FRANCAIS

Umunyamakuru w’Umugande yasize umugogo uri mu jisho rya Uganda yibasira u Rwanda

Yanditswe na Muhumuza Alex
Kuya 29 Nzeri 2021 saa 11:48
Yasuwe :
0 0

Umunyamakuru witwa Musaazi Namiti mu Cyumweru gishize yanditse inkuru mu kinyamakuru Daily Motor, yibaza niba u Rwanda ruzakomeza kugira amahoro umunsi Kagame azaba atakiruyoboye.

Mu bintu bya mbere bihita bitera urujijo umusomyi, ni umutwe uwo munyamakuru yahaye iyo nkuru utaretse n’igihe inkuru yasohokeye.

Intego ye ni iyihe kuba yibaza ikibazo nk’icyo mu gihe nk’iki? Umuntu kandi yakwibaza uburyo umutekano w’u Rwanda uraje ishinga umunyamakuru wo muri Uganda mu gihe igihugu cye bizwi ko ari kimwe mu bihoramo akavuyo, gifitiwe impungenge na benshi ko isimburwa rya Museveni rishobora kuzarushaho kugishyira mu kaga.

Niba Daily Monitor ishaka gukemura ibibazo by’umutekano n’isimburanwa ku butegetsi, aho kubipimira harenze muri Uganda ni he?

Ni inkuru yuzuyemo ibinyoma bishaje, bimwe byabase abantu n’amatsinda ahora ashaka icyagaragaza nabi u Rwanda cyose.

Byigaragaza neza iyo ugeze aho avuga kuri Rusesabagina, ati “Muri iki cyumweru Guverinoma ya Kagame yafunze Paul Rusesabagina, Umuhutu utavuga rumwe n’ubutegetsi wakoze filime Hotel Rwanda. Yazize kurema no gutera inkunga umutwe wagabye ibitero mu Rwanda.”

Kuzura ibinyoma bya filime byagize Rusesabagina uwo atari we, bigaragaza neza ko umurongo wa Namiti uhuye n’abacangezamatwara ba Rusesabagina n’itangazamakuru ryo mu Burengerazuba bw’Isi bihora bishihura u Rwanda ngo bigere ku nyungu zabyo.

Namiti akomoza ku iterabwoba rya Rusesabagina ariko akaruma ahuha. Ntaho avuga ku bimenyetso simusiga byatanzwe n’ubushinjacyaha mu rukiko, bihishura neza ibikorwa by’iterabwoba bya Rusesabagina harimo n’ibyo yivugiye n’akanwa ke.

Nk’uko ibinyamakuru by’i Burayi bibigenza, Namiti ntabwo yitaye ku nzirakarengane icyenda zazize ibitero by’umutwe MRCD-FLN wa Rusesabagina. Ntabwo yitaye ku bapfakazi n’impfubyi zasizwe iheruheru n’ibyo bitero.

Mu kwerura ngo agaragaza aho ahagaze, Namiti yagaruye ibirego bishaje ngo by’uburyo Polisi y’u Bwongereza yaburiye Abanyarwanda batuyeyo kurya bari menge ngo kuko ‘bashobora kwicwa’ na Leta ya Kigali.

Mu bo yagarutseho harimo Rene Mugenzi, umujura wabihamijwe n’urukiko umwaka ushize nyuma yo kwiba amaturo n’amafaranga ya Paruwasi ya Norwich.

Iyo Namiti aza gukora ubushakashatsi buke (ntabwo yakoze kuko atari ukuri yashakaga), yakabaye yaremeye ko Mugenzi ari umwe mu banzi babyigaragarije ba Guverinoma y’u Rwanda akaba no mu dutsiko twiyemeje gukora ibishoboka byose ngo duhimbe icyahindanya isura y’ubuyobozi bw’u Rwanda uko cyaba gisa kose.

Namiti ntagarukira aho, arakomeza akadondobekanya urutonde ngo rw’abavugwa ko bishwe na Leta y’u Rwanda, nta kimenyetso na kimwe agaragaza.

Aho niho abacengezamatwara baterera umujinya kuko amayeri yabo n’uruhinja ntibyarugora kuyatahura. Ni ugufata urupfu rwose rw’Umunyarwanda yaba uw’imbere cyangwa aho ariho hose ku Isi, bakarwifashisha bahindanya isura y’u Rwanda. Mu masaha make urubanza baba bamaze kurucira mu binyamakuru banafashe umwanzuro, ubundi ibyaha bikagerekwa ku Rwanda.

Hashize imyaka n’imyaniko abatifuriza u Rwanda ineza bakora urutonde rurerure ngo rw’abo bakekaho kuba barishwe na Leta y’u Rwanda. Muri izo mpfu zose, nta na rumwe bagaragaza ibimenyetso byakozwe n’inzego zibishinzwe ngo zibigaragaze gutyo.

Namiti ntiyanyuzwe, yagiye kuzura urwo rutonde akubita aho nta kimenyetso na kimwe ahubwo agatanga umugabo kuri DW.

Mu yandi magambo, Namiti ni umucengezamatwara w’Umugande waremwe ngo ashyushye urugamba rwo gusebya u Rwanda rwatangijwe na Leta ya Kampala.

Iyo aza kuba koko atari umuhezanguni, yakabaye acukumbura urutonde rwa bagenzi be b’Abagande ubutegetsi bwa Museveni bumaze kwivugana mu myaka 35 ishize kandi bifitiwe ibimenyetso.

Uwavuga yahera ku rupfu rw’umunyapolitiki Andrew Kayiira mu 1987. Ni ubwicanyi bwakozweho iperereza na Polisi y’u Bwongereza ariko Museveni yahisemo guhisha iyo dosiye mu kabati, kubera iki?

Hashize imyaka n’imyaniko Abagande binubira ubwicanyi bukorwa n’inzego za Museveni nta n’umwe zibabariye haba abigisha mu idini ya Islam, Abihayimana, abatavuga rumwe na Leta, abapolisi.

Tuvuze amazina hari nka AIGP Andrew Kaweesi, DPC Muhammad Kirumira, Umudepite wari uhagarariye Arua, Ibrahim Abiriga, umushoferi wa Bobi Wine, Yassin Kawuma wishwe n’Umutwe udasanzwe mu gisirikare wamwitiranyije na shebuja n’abandi kugeza ku bwicanyi buherutse bwari bugamije guhitana Gen. Katumba Wamala, bwarangiye butwaye ubuzima bw’umukobwa we.

Urutonde rw’Abagande n’abandi banyamahanga bishwe n’ubutegetsi bwa Museveni ni rurerure, wabara ukaruha.

Ibi byose rero bituma umuntu yibaza igituma umunyamakuru w’Umugande abyirengagiza, akajya mu icengezamatwara atazi aho rijya n’ahi riva yibasira ikindi gihugu.

Musaazi Namiti wirengagije ibibazo byugarije Uganda agahangayikishwa n'iby'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .