00:00:00 IGIHE NETWORK KN KINYARWANDA EN ENGLISH FR FRANCAIS

Gutuka Perezida wa Repubulika ni ukwikenya

Yanditswe na Urinzwenimana Mike
Kuya 26 Gicurasi 2021 saa 07:14
Yasuwe :
0 0

Ishyano rikomeye risigaye ryaragwiriye urwa Gasabo ni ukumva umuntu wifatira mu gahanga Perezida wa Repubulika akamutuka kandi ukabona abenshi babifashe nk’ibintu bisanzwe, abandi bakabyita uburenganzira bwo kuvuga icyo umuntu atekereza n’ibindi bigayitse.

Ku mbuga nkoranyambaga nka YouTube, Facebook, Instagram n’izindi uhasanga abantu batandukanye, yaba abiyita abanyapolitiki, impirimbanyi z’uburenganzira bwa muntu n’abandi bavuga ko bari kugaragaza ibitekerezo byabo, banenga ibitagenda mu miyoborere y’igihugu ariko ugasanga mu byo bita ibitekerezo hibanzemo kubahuka, kwibasira no gutuka Umukuru w’Igihugu.

Ubusanzwe mu muco Nyarwanda gutukana ni kirazira naho mu muco wa Gikiristu gutukana bikaba icyaha. Mu ndangagaciro z’umuco wa Kinyarwanda, buri muryango wose utoza abana gukura bubaha ariko cyane cyane bakubaha ababaruta.

Gusuzugura cyangwa kubahuka umukuru bifatwa nko kubura ikinyabupfura, akenshi bikagaragaza umwana wabuze uburere, iyo bigeze ku gutinyuka ugukuriye ukamutuka, bifatwa nk’ishyano ryaguye bikururira ubikoze guhabwa ibihano bikomeye, byagera ku gutuka umubyeyi cyangwa umukuru w’umuryango bikaba byakururira ubikoze kuvumwa no gucibwa mu muryango. Akenshi iyo umwana atutse umubyeyi we uwo mwana bakunda kumwita igikenya.

"Wubahe so na nyoko uko Uwiteka Imana yawe yagutegetse, kugira ngo uramire mu gihugu Uwiteka Imana yawe iguha, uboneremo ibyiza.”(Gutegeka Kwa Kabiri 5:16,18.20; Abefeso 6.2,3)

Uretse no kuba Umukuru w’Igihugu, Perezida wa Repubulika aba ari n’umuntu, ufite ibyiyumviro byose, ushobora kubabara cyangwa kwishima, gukomereka haba mu marangamutima, mu mitekerereze no mu mwuka bitewe n’amagambo mabi cyangwa ibitutsi bamutuka. Ni umuntu ufite ubumuntu kandi ufite uburenganzira n’amategeko amurengera nk’undi mwenegihugu wese.

Ikigeretse kuri ibyo kandi Perezida wa Repubulika aba ari umubyeyi mu buryo bubiri. Ubwa mbere ni umubyeyi, ufite umuryango we bwite, ufite abana n’abamukomokaho bagomba kubahwa kandi bakarindwa gukomeretswa mu marangamutima n’ibitutsi bitukwa umubyeyi wabo. Nk’abandi bana bose, ab’Umukuru w’Igihugu bakeneye kubona umubyeyi wabo yubashywe nk’abandi babyeyi bose.

Ubwa kabiri, Umukuru w’Igihugu ni umubyeyi w’abenegihugu mu maso y’abandi baturage b’ibindi bihugu. Abenegihugu hose burya baba bagize umuryango mugari w’abatuye igihugu runaka, ni yo mpamvu itegeko rya Repubulika y’u Rwanda rigaruka ku ijambo rivuga ngo umuryango Nyarwanda, ni ukuvuga ko umuryango Nyarwanda ugizwe n’Abanyarwanda bose kandi nta muryango utagira umubyeyi, uyu muryango Nyarwanda burya umubyeyi uba ufite ni Perezida wa Repubulika.

Abana bagize umuryango Nyarwanda, bafite inshingano zo kubaha no kubahisha umubyeyi cyangwa umukuru w’uyu muryango, bakwiye kubabazwa n’umuntu wese umwubahutse akamutuka, akamuvuga nabi ndetse bafite inshingano zo kumurinda no kugaragariza umuntu wese umututse ko batishimiye ko abatukiye umubyeyi.

Mu mategeko icumi Imana yahaye umuryango w’inyokomuntu ibicishije mu kuyabwira umuryango wa Israel harimo itegeko rikomeye risaba umwana wese kubaha umubyeyi kandi rigaragaza n’inyungu uzabikora azabona. Izo nyungu ni "ukuramira mu gihugu no kukibamo unezerewe" bivuze ko uwishe iri tegeko agerwaho n’ingaruka zo kutumvira no kutubaha arizo "gukenyuka no kuba mu gihugu utanezerewe".

Itegeko ry’Imana ni ihame riba rigomba kubahirizwa uryubahirije akabona umugisha uryishe akabona umuvumo. Kutubaha umubyeyi bizana umuvumo wo gukenyuka, kubaho utishimye ni yo mpamvu iyi nyandiko yacu twayihaye umutwe ugira uti "gutuka Perezida wa Repubulika ni ukwikenya."

Uretse kandi Perezida wa Repubulika n’umubyeyi ukubyara, Imana isaba umuntu wese kubaha umuntu umukuriye. Bibiliya mu Gitabo cy’Abalewi 19:32 hagira hati "Ujye uhagurukira umeze imvi, wubahe umusaza, utinye Imana yawe. Ndi Uwiteka. "Ni inshingano z’abakiri bato kubaha abakuru kandi n’abakuru na bo bafite inshingano zo kudasharirira abato nk’uko Intumwa Pawulo yabyandikiye Itorero rya Efeso agira ati "1 Bana, mujye mwumvira ababyeyi banyu mu Mwami wacu, kuko ari byo bibakwiriye. Wubahe so na nyoko (iryo ni ryo tegeko rya mbere ririmo isezerano), kugira ngo ubone amahoro uramire mu isi. Namwe ba se ntimugasharirire abana banyu, ahubwo mubarere mubahana, mubigisha iby’Umwami wacu.” (Abefeso 6:1;4).

Iyo urebye ibyo ijambo ry’Imana rimaze kutubwira mu bitabo dusomye, ukareba n’ibikorwa muri ino minsi uhita usobanukirwa impamvu yo gukenyuka mu buryo butandukanye mu rubyiruko no kubaho abenshi bashaririwe n’ubuzima. Abana benshi ntibacyubaha abakuru, ugera mu modoka ugasanga umwana aricaye na ecouteur mu matwi, umusaza w’imvi z’uruyenzi ahagaze, umwana akaba atamwimukira, ku murongo ahatangirwa serivisi zitandukanye usanga urubyiruko rubyigana n’abasaza n’ibindi ariko kubaha abadukuriye ni ihame kandi ni itegeko ry’Imana riduha umugisha wo kurama no kubaho twishimye.

Biratangaza, birababaza kandi bitera kwibaza byinshi, aho ubona umuntu wiyita umukirisitu, umukozi w’Imana afata Bibiliya akayihisha inyuma, undi akihisha mu mwambaro uriho umusaraba cyangwa ikanzu y’abihaye Imana, akifatira Perezida wa Repubulika mu gahanga akamutuka akamwandagaza, cyangwa agahamagarira abantu kwigomeko no kwigumura ku mabwiriza y’ubuyobozi bukuru bw’igihugu kandi abandi bakirisitu na bo bakabireba cyangwa bakabyumva bagaceceka bakumva ntacyo bitwaye ariko ibi ni ishyano ryagwiriye igihugu cyacu kandi rikizanamo umwuka wo gukenyuka no kubaho abantu batishimye.

Intumwa Pawulo mu rwandiko yandikiye Itorero ry’i Roma, yahuguriye abakirisitu baho kubaha ubuyobozi, ababwira ko kubaha ubuyobozi ari imwe mu nzira yo kubaho neza kandi ari uburyo bwo kubaha Imana ariko ku rundi ruhande yaberetse n’ingaruka zizagera ku muntu wese utazubaha ubuyobozi.

Yabisobanuye muri aya magambo, ati "Umuntu wese agandukire abatware bamutwara, kuko ari nta butware butava ku Mana n’abatware bariho bashyizweho n’Imana. Ni cyo gituma ugandira umutware aba yanze itegeko ry’Imana, kandi abaryanga bazatsindwa n’urubanza. Abatware si abo gutinywa n’abakora ibyiza, keretse abakora nabi. Mbese ushaka kudatinya umutware? Kora neza na we azagushima, kuko ari umukozi w’Imana uguhesha ibyiza. Ariko nukora nabi utinye, kuko adatwarira inkota ubusa. Ni umukozi w’Imana, uhoresha umujinya ukora nabi." (Abaroma 13:1;4). Aya magambo Pawulo yabwiye abaroma tuzayagarukaho mu gice cya kabiri cy’iyi nyandiko.

Umuntu wese akwiye kwirinda gusuzugura, gutuka umukuriye by’umwihariko Perezida wa Repubulika. Urubyiruko by’umwihariko, dukwiye kwirinda kugwa mu mutego w’abanyapolitiki, abakoresha imbuga nkoranyambaga mu buryo butandukanye bagambiriye kubabibamo umwuka wo kwigomeka no gutuka ababyeyi banyu, kuko kwifatanya nabo bituzanira umuvumo wo gukenyuka no kubaho tutishimiye ibyiza byo mu gihugu ariko ijambo ry’Imana ritubwira ko nitwemera tukumvira tuzarya ibyiza byo mu gihugu ariko nitwanga tukagoma inkota izaturya.

Mu gice cya kabiri tuzarebera hamwe uburyo Imana ibona kandi ifata Perezida wa Repubulika mu buryo bwihariye, ingaruka zizanwa no kumutuka haba ku muntu ku giti cye (umututse), kubabyumva bakabishyigikira no ku gihugu muri rusange.

"Nimwemera mukumvira muzarya ibyiza byo mu gihugu. Ariko nimwanga mukagoma inkota izabarya", kuko akanwa k’Uwiteka ari ko kabivuze." (Yesaya 1:19-20)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .