00:00:00 IGIHE NETWORK KN KINYARWANDA EN ENGLISH FR FRANCAIS

The Daily Monitor na The New Vision byinjijwe mu mugambi wo guharabika u Rwanda

Yanditswe na Albert Rudatsimburwa
Kuya 18 Kamena 2021 saa 01:54
Yasuwe :
0 0

Ku Cyumweru tariki ya 13, 2021, Uganda yinjiye mu icengezamatwara riteye isoni ubwo u Rwanda rwasubizaga Umusirikare w’Ingabo za Uganda wari winjiye ku butaka bwarwo. Inkuru nyinshi zirimo iyanditswe na New Vision n’iya Daily Monitor imwe ifite umutwe ugira uti "Uganda irashaka ko u Rwanda ruyisubiza umusirikare wayo" n’indi ifite uvuga ngo "U Rwanda rwarekuye umusirikare wa UPDF wafatiwe ku mupaka".

Izi nkuru zose zivuga ko u Rwanda rwashimuse umusirikare wa UPDF ubwo yari ari kugenzura umutekano ku mupaka ku wa Gatandatu.

Ku rundi ruhande, Ukuri kwari aho ibintu byabereye kwerekana ko uyu musirikare wa UPDF, Pte Baruku Muhuba, yarenze imbibi za Uganda akinjira mu Rwanda atabizi, ibi ni ibintu yiyemereye ubwo yagiranaga ikiganiro n’itangazamakuru mbere y’uko asubizwa mu gihugu cye. Nyuma yasubijwe muri Uganda, mu gikorwa cyari kitabiriwe n’abakozi ba gasutamo ku mpande zombi ndetse n’abayobozi b’ingabo mu turere twa Kisoro na Cyanika.

Umuyobozi mu Karere ka Kisoro, Peter Mugisha yasabye imbabazi mu izina ry’uyu musirikare ndetse ashimira bagenzi babo b’u Rwanda kuba iki kibazo baracyitwayemo kinyamwuga ndetse n’uburyo bafashemo umusirikare wabo wari warenze imbibi.

Ati "Twishimiye cyane kwakira umusirikare wacu watubwiye ko atigeze ahohoterwa cyangwa ngo akomeretswe. Badusubije kandi PK Machine gun iri kumwe n’amasasu yayo 100, byose byari bifitwe n’uyu musirikare mbere y’uko afatwa." Mugisha yongeyeho ko UPDF ikwiye gutangira gukoresha ikoranabuhanga rya GPS kugira ngo yirinde amakosa nk’aya no mu minsi iri imbere.

Bigaragarira amaso ko iri hererekanya ryabayeho hagati y’abayobozi ba gasutamo b’ibihugu byombi ryerekana ubushake bwiza, ariko itangazamakuru rya Uganda ritanga isura mbi ikomeza gushimangira gahunda yo kugaragaza u Rwanda nk’umwanzi wa gahunda yo kubanira neza abaturanyi.

Ibinyoma byabo bigamije gukomeza kurenganya u Rwanda hejuru y’amakosa akorwa n’ubuyobozi bw’i Kampala ndetse no mu gihe bwo bwemeye amakosa y’umusirikare wabo.

Hejuru y’ibi, ibirego by’Abanya-Uganda bakoraga ubucuruzi bwa magendu barashwe bikabaviramo urupfu, ubwo bageragezaga kurwanya polisi yari iri mu kazi byahindutse intero mu itangazamakuru rya Uganda, byahisemo guha ishingiro no kwamamaza ibyaha, mu gihe bishobora gukoresha ijambo bifite mu kurwanya no gukora ubukangurambaga ku cyaha cy’ubucuruzi bwa magendu.

Daily Monitor binyuze mu nkuru zayo ebyiri zijyanye n’ikibazo cy’uyu musirikare warenze imbibi ikomeza guhuza ishimutwa ry’ikinyoma ry’uyu musirikare wa UPDF n’itotezwa ry’abaturage b’u Rwanda bari Uganda (U Rwanda rwabujije abaturage barwo kujya Uganda kuko umutekano wabo utizewe igihe bariyo), ibintu itangazamakuru rya Uganda rikwiye kuryoza Guverinoma yabo, nk’uko ribigenza igihe abashyigikiye abatavuga rumwe n’ubutegetsi bashimuswe ku manyarwa y’ihangu, bakabura cyangwa bakicwa.

Aho gukora ibi, itangazamakuru rya Uganda ryahisemo gukoreshwa n’ubuyobozi bw’i Kampala mu guhuza iki kibazo kibangamiye imibereho y’abaturage b’Abanyarwanda bari Uganda n’impamvu za politike zidafite ishingiro.

Ku ruhande rw’u Rwanda, rwakomeje gufata Abanya-Uganda mu buryo bwubahirije amategeko ndetse no mu gihe baba bakoze ibyaha nk’uko binerekanwa n’ikibazo cy’uriya musirikare warenze imbibi z’igihugu cye. Ibi bitandukanye no gukomeza gukurikirana Abanyarwanda b’inzirakarengane cyangwa Abanya-Uganda bafite inkomoka mu Rwanda, icyaha cyabo kikaba gusa ubwenegihugu.

Abanyarwanda bibasiwe n’itotezwa, gufatwa mu buryo bwa kinyamaswa, iyicarubozo n’itabwa muri yombi binyuranyije n’amategeko bikorwa n’Inzego z’umutekano za Uganda zitumwe n’abayobozi ba Uganda bicyeka umwanzi na maneko muri buri nguni z’umuhanda.

Abanyarwanda bagiye bagira amahirwe yo kuva mu maboko y’aba bahohotera bagiye bajugunywa ku mupaka, bacucuwe utwo bari batunze. Kandi iki ni kimwe mu bindi bibazo bikomeje gutuma umubano w’ibihugu byombi udasubira mu buryo.

Gahunda y’itangazamakuru rya Uganda yo gukomeza gukwirakwiza ibihuha no kubeshya yerekana umugambi mubi no kutagira ubushake ku ruhande rw’ubuyobozi bwa Uganda ku bijyanye no gukemera ikibazo cya Uganda n’u Rwanda, ariko ubushotoranyi bwabo ntibuzabuza u Rwanda gukomeza gufata neza Abanya-Uganda ndetse n’abasirikare ba UPDF nka Private Baruku nubwo Guverinoma yabo ikomeje gutsimbarara ku mugambi wo guhohotera Abanyarwanda bari Uganda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .