00:00:00 IGIHE NETWORK KN KINYARWANDA EN ENGLISH FR FRANCAIS

Rusesabagina yibagiwe ko internet itibagirwa; Himbara atanga inama na we akeneye

Yanditswe na Kabagambe R. Ignatius
Kuya 24 Nzeri 2021 saa 10:35
Yasuwe :
0 0

Mu buryo bumwe cyangwa ubundi, hafi ya buri Munyarwanda wese asa nk’aho ari umuvugizi wa Perezida w’iki gihugu. Ni wowe David Himbara ndi kuvuga. Ndabizi ko kimwe na Michela Wrong washenguwe n’urupfu rw’inshuti ye magara, Patrick (aruhukire mu mahoro) nubwo ubyirengagiza uzi neza ko Perezida Kagame yegukanye amajwi 98.79% ubwo yongeraga gutorwa ku wa 4 Kanama 2017.

Aba baturage bamuhandagajeho amajwi bakomeje kunyurwa n’ubuyobozi bwe (babyumva kimwe kugeza ubu) kandi bizakomeza kuba byiza kurushaho. Nta na hamwe yigeze atandukira. Ntibamushinja ko hari aho yasobanyije mu bijyanye na COVID-19 nk’uko tubitegereje ku muturanyi wo mu majyaruguru.

Mu by’ukuri bashimira Guverinoma ye kuba yaritwaye neza muri iki cyorezo mu buryo bwashobokaga k’u Rwanda.

Kuba ndi umwe muri aba Banyarwanda benshi banyuzwe n’ibyo Perezida Kagame ari gukora nkaba n’umunyamakuru by’umwuga, mu buryo buhoraho mpora mushimira binyuze mu binyamakuru bitandukanye, mbikora nzi ko bitoneka abatwanga. Ku bw’ibyo mushobora kunyita umuvugizi wabyihaye cyangwa ibindi. Ntacyo biri buhindure.

Mu buryo bwikoze, mpora mvuga ibikorwa bye nemye, nifuza kuba nashobozwaga gukora ibirenzeho kandi neza kandi nkabasha kuvugira abandi bantu batabarika nzi neza kandi nganira nabo mu buryo buhoraho, akwiye ibirenze ibyo tubasha gutanga mu rwego rwo kumwitura ku bw’ibyo akorera u Rwanda na Afurika.

Ku bw’ibyo ngarutse kuri wowe, David Himbara, itandukaniro werekana ni irihe ? Ni gute uhitamo guha ibirohwa umuntu n’igihugu byaguhaye amata ? Ukwiye kuba ubaho ubikesha gusebya no gusiga icyasha ibyiza abo musangiye igihugu bagezeho biyushye akuya ? Ukabikorera igihugu ucyita mu rugo, gifite umuyobozi ushoboye bitari mu nyungu z’u Rwanda gusa ahubwo na Afurika?

Ariko tunagarutse no ku mwuga wawe, ibyo n’ibyo wumva wabasha gukora? kuki ubu mbona wabaswe n’ibibi gusa David Himbara kandi so wakubyaye Byabagamba yari umutoza w’intore.

Kubyuka buri gitondo wumva nta kindi ushobora gukora uretse gusebya Perezida Kagame, kumuhimbira ntabwo aribyo umwarimu w’Iterambere Mpuzamahanga akwiye kuba ahugiraho. Uherutse kwadukana igitekerezo ngo cyo kwigishya ‘ibinyoma biri mu miyoborere ye’ muri Contennial College, mu mateka y’u Rwanda ntaho byigeze biba ko umuntu yitamika Umukuru w’Igihugu mu mafuti akamugiraho inzigo iri kuri urwo rwego

David Himbara ikintangaza ni uko ukora ibyo, udafite ikimwaro, utekereza ko njye n’abandi Banyarwanda tuzakureberera.

Ndamutse nshyize ubu butumwa mu nteruro imwe isobanura akari ku mutima wawe. Navuga ko urukundo tumukunda ruyingayinga urwango umufitiye. Ku bw’ibyo ubushake dushyira mu gushyigikira gahunda na politiki bya Guverinoma ye nabyo biri kuri urwo rwego.

Mu rwego rwo kukwitura ku nama wangiriye nabonye ariko ntemeranya na zo, ngusezeranyije ko mu gihe cyose uzakomeza kwibasira Perezida Kagame, nanjye nzakomeza kuvuga ukuri aho bikenewe hose.

Mu buryo bweruye nzakomeza ku kwandikaho mu gihe twembi tukiriho, cyereka nuramuka uhinduye intego y’ubuzima bwawe na politiki. Guhera ubu ushobora guhitamo guhindura inzira ukareka ibinyoma no guharabika Perezida Kagame.

Ni gute utekereza ko ushobora kuyobya buri wese, cyane abashima ibikorwa n’umuyobozi wabo bagafata inama zawe, mu gihe wishyurirwa kwangiza isura y’umuntu ukorera ibyiza abaturage?

Mu ibaruwa ifunguye wangeneye wavuze ko “Impaka zifatika kandi zifite icyo zivuze kandi ziherekejwe n’ubwenge n’ibimenyetso ari zo zikenewe...” ni byiza ko wavuze ubwenge. Bwira abantu ubwenge buri mu kurwanya ko uwahoze ari Perezida wa Leta Zunze Ubumwe za Amerika, Barack Obama yashyigikira NBA Africa nk’umufatanyabikorwa.

Bwira Afurika ubwenge buri mu kurwanya ko u Rwanda rwohereje abasirikare muri Mozambique ku busabe bwa Perezida Nyusi kugira ngo bagarure amahoro Intara yo mu majyaruguru, Cabo Delgado ikurwa mu maboko y’Umutwe w’iterabwoba ugendera ku mahame ya Islam.

Muri make fata umwanya witekerezeho kuko muri iyi minsi usa nk’umuntu utagikoresha umutima nama mu byo uvuga, nubikora uzabona uko umutima wawe wawe uguiye kuba umwanzi w’u Rwanda, wenda byanatuma uhagarika kuba uko uri umwanzi w’u Rwanda?

Kuri twe igisobanuro cy’ijambo umwanzi ni “umuntu ufitiye inzigo undi, by’umwihariko umuntu ushaka gusenya no guhirika ibyagezweho na mugenzi we.”

None David Himbara ni gute utari uyu muntu kuri Perezida Kagame ndetse no k’u Rwanda? Uri umwanzi kubera ko ufite inzigo kuri Perezida n’akazi akora nk’uko bigaragazwa n’ibikorwa ukora byo kurwanya ibiro bye.

Icya kabiri uri umwanzi kubera ko ukomeje kumusebya no kumunenga ntacyo ushingiraho ahubwo ugamije kwangiza izina rye bwite n’iry’umwanya arimo.

Icya gatatu, uri umwanzi kubera ko byamaze kugaragara mu buryo budashidikanywaho ko wowe na bagenzi bawe mwahuje imbaraga mu bikorwa bidafite ikindi bigamije uretse guhirika Perezida mu buryo ubwo ari bwo bwose haba mu matora cyangwa hakoreshejwe imbunda. David Himbara, nubwo bibabaje urwo ni rwo rwego rw’umwanzi w’u Rwanda urimo nta kundi byemere unabyihanganire ubwo ari byo wiyemeje.

Icya nyuma ku nama wangiriye uvuga ko nkwiye kwitondera ibyo mvuga kuko ngo “Internet itajya yibagirwa” reka nkubwire ko byanshimishije kuba waranyibukije ibijyanye na internet. Niba ibi ndi kukubwira ntaho bizajya kandi bigakomeza no kwibukwa mu minsi iri imbere, Imana Ishimwe ariko wowe wongere gutekereza, kubera ko uko abantu bibuka ibintu biterwa n’ibyo umuntu yavuze, ku bw’ibyo internet irabika.

Amwe mu mashusho Rusesabagina yicuza ni ayo yashyize hanze yigamba ibitero byabereye ku butaka bw’u Rwanda i Nyabimata. Iyo aza kumenya ntaba yarabikoze muri buriya buryo. Wigengesere, kuko kuri ubu abantu basigaye babona ibibatandukanya ari bike.

Twitter: @KabagambeI


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .