00:00:00 IGIHE NETWORK KN KINYARWANDA EN ENGLISH FR FRANCAIS

Ni koko uwambaye ikirezi ntamenya ko cyera!

Yanditswe na Kwezi Jean
Kuya 4 Nyakanga 2021 saa 07:03
Yasuwe :
0 0

Kuri iyi nshuro ya 27 twizihiza kwibohora kw’abanyarwanda, nafashe umwanya wo gutekereza kuri uyu mugani ugira uti ‘Uwambaye ikirezi ntamenya ko cyera’, nywutekereza mu buryo bwimbitse mbihuza n’ubuhamya niyumviye ubwanjye, n’ibyo nibonera kandi nabayemo ubwanjye.

Umunsi umwe aho nari ntuye mu mujyi wa Kigali mu murenge wa Kanombe, haje abanyamahanga umugabo n’umugore bashakanye ariko inkomoko yabo itandukanye kuko umugore ari Umunyamerikakazi(USA), umugabo nawe akaba akomoka k’umugabane w’Amerika y’Amajyepfo muri Columbia.

Naje kumenya ko umugore yakoreraga i Goma muri Repubulika iharanira Demokarasi ya Congo akaba yarakoraga ataha i Rubavu mu Burengerazuba bw’u Rwanda. Icyatumye rero nsesengura uyu mugani byimbitse, ni uko ubwo aba banyamahanga bahungaga ingaruka z’iruka rya Nyiragongo berekeza mu murwa mukuru Kigali ari naho twahuriye, nashatse kumenya impamvu umugore akora mu kindi gihugu aho i Goma agataha mu kindi gihugu iwacu mu Rwanda i Rubavu.

Bansobanuriye ko ari uko ngo atabaga yizeye umutekano w’aho yakoreraga mu Burasirazuba bwa Repubulika iharanira Demukarasi ya Congo, akumva yaryama atekanye ari uko aryamye mu Rwanda.

Byatumye nibuka ko nagiye ngira amahirwe yo kujya hanze y’u Rwanda kenshi mu ngendo z’ubuhanzi bwanjye bwo gukora amafilimi , kenshi aho nageze nashimishwaga n’uko banyakiraga nk’Umunyarwanda ubona bubashye , nasesengura ngasanga hari abaharaniye ko ibyo bigerwaho kuko amateka iki gihugu cyanyuzemo ntabwo yagakwiriye gutuma hari Umunyarwanda wakubashywe bitewe n’ubwicanyi ndengakamere bwa Jenoside yakorewe abatutsi mu 1994.

Ngendeye kuri ubu buhamya, nasesenguye byimbitse umugani ugira uti ‘’Uwambaye ikirezi ntamenya ko cyera” bitewe n’uko usanga abanyamahanga kenshi bazi u Rwanda neza bashima amahoro n’ituze riharangwa ariko ugasanga bamwe mu Banyarwanda cyane ababa hanze y’igihugu, batumva kandi batazi ayo mahirwe Abanyarwanda dufite.

Ni iby'agaciro kuzirikana aho u Rwanda rwavuye mu myaka 27 ishize

Ntabwo ibintu byose byarara bibaye byiza nkuko byifuzwa kuko kubaka no kwiyubaka ni urugendo, ariko nibura biba byiza abantu bashimye ibigenda bigerwaho cyane ko kwiyubaka kw’iki gihugu kuva nyuma ya Jenoside yakorewe Abatutsi bisa n’aho kwari ugutangirira ku busa kuko ibintu byose byari byarasenyutse.

Ndi muri bake bari bari muri uyu mujyi wa Kigali kuva ku itariki ya 20 Nyakanga 1994. Ibikorwa remezo byose byari byarangiritse, umujyi ari icuraburindi ku buryo urumuri rwari rukomeye ari urwa buji cyangwa itara rya petroli, binyenyeza kure mu madirishya y’amwe mu mazu yari yarasenyutse ari ibirangarizwa n’amatongo.

Muri icyo gihe ntabwo byari byoroshye kwemera ko hazabaho u Rwanda tubona ubu. Ibi byose habayeho ubwitange bw’Inkotanyi n’abandi bafatanyabikorwa bumvaga agaciro ko kubaka u Rwanda twifuza.

Ndibuka neza umunaniro wagaragaraga ku basore n’inkumi bari bamaze gutsinda urugamba no kurokora abatutsi bicwaga. Wabonaga bananiwe kubera amajoro menshi bamaze bari ku itabaro benshi muribo bari baratangiye mu w’1990 ariko wabitegereza neza ukabona ko bafite akanyabugabo ku maso n’icyizere cy’ubutsinzi.

Perezida Kagame namugereranya na Mose wo muri Bibiliya

Kuva ku mugaba mukuru w’urwo rugamba Perezida Paul Kagame, nakundaga gukurikirana ijambo rye nkareba n’amafoto ye yo muri ibyo bihe, yari umuntu ubona ko amaze igihe atagoheka kandi afite agahinda ku maso kuko nubwo yari atsinze urugamba ahagaritse jenoside, hafi miliyoni y’abatutsi yari imaze kwicwa.

Mu gusesengura wa mugani ugira uti “Uwambaye ikirezi ntamenya ko cyera’’, byatumye nsesengura no ku mibereho y’uyu mugabo njye nita intwari cyane. Nkurikije igihe yavukiye, biragaragara ko ababyeyi be bameneshejwe mu gihugu ari igitambambuga ariko ishyaka yakuranye ry’ubunyarwanda niryo ryatumye yanga bimwe byari indamu kuri we, akitangira u Rwanda akayobora urugamba.

Amateka ye anyibutsa uwitwa Mose uvugwa muri Bibiliya wanze kwitwa umuhungu wa Farawo, agahitamo kubaho nabi kugira ngo acungure ubwoko bwe. Numvise ko na we yari umusirikari ukomeye mu ngabo za Uganda , urugamba rugatangira ari mu mashuri muri Amerika ariko yakumva amakuru yo ko Maj Gen Fred Gisa Rwigema atabarutse ku rugamba, agahita yiyambura amapeti n’ibyubahiro by’igisirikari cya Uganda.

Yaretse imibereho yari arimo muri Amerika aho yaryamaga mu magorofa, ahitamo kuza mu mbeho yo mu birunga aho yaryamaga mu ndaki, batunzwe n’impungure, rimwe na rimwe zikabura.

Nubwo yari afatanyije n’abandi Banyarwanda b’umutima, baca umugani mu Kinyarwanda ngo “zitukwamo nkuru”. Iyo urugamba ruyoborwa n’ikigwari nta kabuza ntabwo bari gutsinda. Uyu mugabo rero narasesenguye nsanga byeruye agira ishema ryo kuba Umunyarwanda kandi agakunda Abanyarwanda mu nyungu rusange. Nakurikiranye n’uko avuga ijambo Rwanda cyangwa U Rwand, n’iyo yaba arimo kuvuga mu ndimi z’amahanga agera kuri iyi nyito ukumva arikije atsindagira .

Mu minsi mike ishize nongeye kwitegereza amafoto ye, nkurikirana n’ibiganiro atanga aho aba ari ku mateleviziyo mu bikorwa bitandukanye, mbona nubwo akazi kakiri kenshi nibura ubu anyuzamo agaseka cyane. Arakeye kandi ubona akomeye ku mubiri afite n’icyizere(confidence). Ni iby’agaciro kugira umuyobozi urwanira ishyaka abaturage be ku nyungu rusange bityo rero icyo n’ikirezi twambaye dukwiriye kumenya ko cyera.

Iteka nshimishwa n’uko mu nama nyinshi ziba zihuje ibihugu by’ibihangange, iyo biga ku kibazo runaka usanga batumiye u Rwanda nk’igihugu cyo kwigiraho no gutanga ubuhamya ku bunararibonye bwacyo. Ibi nabyo n’ishema rikomeye. Ntabwo isi yose ari impumyi ku buryo bahitamo iki gihugu n’abayobozi bacyo gutanga ubuhamya kuko batabona neza aho cyavuye n’icyerekezo cyiza gifitiye abaturage bacyo.

U Rwanda uko rugenda ruzamuka, ndi umuturage warwo wakurikiraniye hafi buri ntambwe iterwa. Nigeze kuganira n’umugabo umwe wo mu kigero cyanjye. Hafi yacu hari hicaye umwana w’umukobwa wo mu kigero cy’imyaka 20 atubwira ko atazi imbaragasa n’amavunja. Njye na mugenzi wanjye twafashe umwanya wo kumuha ishusho y’uko byabaga bimeze, n’uko byaryanaga ariko byanyeretse ko nta kabuza abavuka ubu barimo kuvukira aheza kuruta mu bihe byacu.

Natembereye u Rwanda mu ntara zitandukanye ,mfata umwanya wo gusesengura ubuzima twanyuzemo ,ndeba amafoto ya kera n’ubu y’ahantu n’abantu, mbona impinduka zifatika mu myaka 27 itambutse .

Umunyarwanda w'ubu afite icyizere cyo kubaho kurusha uwo mu myaka 27 ishize

Naciye umugani ugira uti “uwambaye ikirezi ntamenya ko cyera” mbikuye ku banyamahanga baje bahunga ingaruka z’iruka rya Nyiragongo, bakoraga i Goma bataha mu Rwanda kubera umutekano warwo. Byanteye kureba amafoto atandukanye y’inzego z’umutekano zacu, mbona usibye no kuba baberwa n’impuzankano zabo ariko ku ijanisha rinini cyane bafite isuku mu mitekerereze no mu kazi kabo ka buri munsi.

Aho ndi hose mu gihe cyose, iyo mpuye n’umusirikari w’u Rwanda numva nizeye umutekano wanjye wose . Nyura kenshi ku basore n’inkumi bo mu gipolisi cy’u Rwanda baba barinze umutekano wacu nkumva ndasheje kuko natembereye hanze mu bihugu bimwe by’Afurika, mbona umwanda, imyitwarire, imikorere n’imigirire irimo ruswa ikabije y’abo mu nzego nk’izo nicwa n’agahinda. Icyakora nahavanye ishimwe ry’uko iwacu tubarusha.

Ndahwitura Abanyarwanda bene wacu cyane cyane abakiri bato, kutagira imfabusa imiruho y’abatubanjirije bubaka uru Rwanda tubona. Abavandimwe bacu baba hanze ku mpamvu zitandukanye, baba bashidikanya ku byagezweho byaba byiza baciye bugufi bakajya bafata umwanya bagasura gakondo yabo, bakagira amakuru ahagije kuri yo.

Ndajya inama yo kureba inyungu rusange cyane cyane ku barimo kuvuka bakeneye kwitwa Abanyarwanda bafite agaciro ku isi. Ubuzima bwo ku isi iteka kuva yabaho nta kabuza niko bizahora ko habaho abanyaruka mu iterambere n’abandi bagenda biguruntege ariko ikiruta byose ni uko nabo Leta ibatekerezaho bagasindagizwa.

Nkurikije umuvuduko uriho w’uko Abanyarwanda bayobotse imbuga nkoranyambaga, bamwe bakaba bazitangiraho amakuru atari yo, nasaba abatanga ayo makuru kubaka ubumuntu bushingiye ku kuvugisha ukuri hatabaho kugoreka amateka no gusebanya hagamijwe indonke gusa. Ukuri kwitwe ukuri abe ari nako ukuvuga abikorana ikinyabupfura,kwiyubaha no kubaha abandi.

Kwiyubaha no kubahana tubigire intego nibwo butsinzi bwacu mu isi ya none. Erega tuzirikane ko hari undi mugani ugira uti “amazi arashyuha ariko ntiyibagirwa iwabo wa mbeho’’. Iwanyu aba ari iwanyu uko byagenda kose dukwiriye kubaha gakondo yacu.

Buri munyarwanda yiyuhe akuya mubyo ashoboye gukora yuzuye ubunyangamugayo,umurava, kubahiriza igihe no gutanga serivise nziza kuri buri wese mu nshingano afite haba mubyo akora ku giti cye cyangwa ibindi akora nk’akazi ahemberwa. Nta kabuza uru Rwanda ruzaba urwifuzwa na benshi, twirinda ibyadusenya. Ibi nibyo byagize ibihugu bimwe ibihangange nka Israel ,Leta Zunze ubumwe z’Amerika, u Bushinwa n’ibindi.

Ndasayuka ngira nti “Uwambaye ikirezi namenye ko cyera” tujye dushima Imana kubyo yaduhaye mu bihe bitambutse.

Ndashimira Inkontanyi zafashe iya mbere zikabohora Abanyarwanda. Umunsi mwiza wo kwibohora ku nshuro ya 27 ku Banyarwanda twese n’inshuti zacu.

Igitekerezo cya Kwezi Jean (a.ka John)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .