00:00:00 IGIHE NETWORK KN KINYARWANDA EN ENGLISH FR FRANCAIS

Inzozi naroteye ikipe y’igihugu y’umupira w’amaguru ’’Amavubi’’

Yanditswe na Kwezi Jean
Kuya 10 Ukwakira 2021 saa 09:48
Yasuwe :
0 0

Reka dutangirane urugendo rw’inzozi zanjye, unkundire ugende usoma inyuguti ku yindi ntihagire ijambo rigucika. Iyaba twari twicaranye nakakurotoreye turebana amaso ku maso wenda ukajya umbaza ibibazo bimwe bimfasha kugenda nzikugezaho neza ariko kandi nta kibazo ndumva nzibuka zose neza, ntabwo ndi busobwe kuzirotora.

Wowe ushobora kuba umenyereye kurota uryamye iwawe mu cyumba ku gitanda kimwe cyawe abakera bitaga uburiri hamwe uba winikije igitotsi cyo mu gicuku. Njye ntabwo ariko byagenze narose nicaye mu modoka ngenda kuko nari mfite urugendo runkura mu murwa mukuru wacu Kigali nerekeza mu ntara.

Ushobora kuba ukomeje kugira amatsiko y’ibyo narose ku ikipe y’umupira w’amaguru “Amavubi’’. Ihangane singutindira ku kugezaho inzozi zanjye, gusa reka nkwibutse ko kuba nicara mu modoka agatotsi kantwara nkarota mbikesha umutekano urangwa mu gihugu cyacu kugeza no ku binyabiziga mu muhanda aho usanga rwose impanuka zaragabanutse mu buryo mbona bishimishije, bikaba akarusho kuko mbona hari amasosiyeti atwara abantu ubona ko abashoferi bayo bahawe amahugurwa yo gutwara abagenzi neza buje ikinyabupfura no kwitwararika mu muhanda. Nibakomereze aho.

Ndi muri gare ya Remera ni ku itariki ya 07 Ukwakira 2021, ni saa kumi n’igice z’umugoroba, harabura amasaha make rukambikana kuri sitade ya Nyamirambo hagati y’ikipe y’umupira w’amaguru y’u Rwanda n’iya Uganda. Ku maradiyo byacitse, abantu bamwe barimo gukurikira abashyushyarugamba b’abanyamakuru bavuga iby’umupira nk’abigiye gutoza, abasesenguzi nabo bazi kubivuga neza ariko sinzi niba bagiye mu kibuga babikora nkuko babivuga!

Umupira utegerejwe saa kumi n’ebyiri z’umugoroba nanjye ntegereje kumva ifirimbi ivuga ubundi abasore bacu bakigaragaza. Ndumva ishyaka muri njye nubwo ntazi gutera amashoti ariko ndimo kubara ibitego natsinda banshyizemo kuko numva nakinana ishyaka, bimwe bita gupfa cyangwa gukira ariko agasuzuguro kakavaho imbere y’ikipe yo hakurya y’Umuvumba.

Mu gihe nkirota ntyo, imodoka irahasesekaye bati mujyemo tugende. Ninjiyemo nsanga shoferi na we yashyize urushinge kuri radiyo y’igihugu, umupira watangiye abanyamakuru barimo kogeza nkagira ngo turagitsinze, bakwitsa nkumva bazamuraga amarangamutima yanjye burya nta cyagiyemo.

Ndumva turimo gukina neza ariko birimo kwanga tugeze ku izamu! Kera kabaye bitunguranye abanyamakuru bazamuye ijwi bavuga ngo ‘’gooooooooooooo’’ nanjye nti ‘turagitsinze nta kuntu bakwiyamira gutya ku ikipe yadusuye!’ Burya ndibeshye ni, Abagande bagishyizemo! Umutima urandiye nishima mu mutwe uwo twari twicaranye arandebye, amarira azenga mu maso ariko ndiyumanganya nta kundi!

Urugendo rurakomeje kandi ntegereje igitego nubwo amakipe yombi agiye kuruhuka bikiri kimwe ku busa. Mu gice cya kabiri nta mpinduka umupira urarangiye kandi ndumva umubabaro mwinshi, agatotsi karantwaye ariko kamfatiranya n’icyo ntekereza cyatuma tutazongera gutsindwa ukundi.

Inzozi zanjye zitangira ubwo, ntangira kurota mbona mu tugari bubaka ibibuga byinshi abana b’abanyarwanda batangira kwitoza, ntangira kubona amashuri ya Football nibura buri ntara ifite ishuri ryashowemo ubushobozi, abana baza kwiga ruhago nk’abiga Imibare.

Ndimo kubona ishuri riruta ayandi ry’icyitegererezo ry’igihugu rijyamo abavuye mu yandi mashuri ya football batoranijwe kandi byakozwe neza ntaburiganya, aho imyanya ihabwa abayikwiriye. Mu masomo yatangirwaga muri iryo shuri ry’icyitegererezo harimo iryo gukunda igihugu no kumenya gukotana kugeza utahanye intsinzi.

Ndabona dufite ikipe irimo abana bazi umupira batojwe neza kandi barwana ishyaka ryo kudatsindwa uko byagenda kose. Ndabona igikombe cy’isi cyabereye mu Rwanda muri stade imwe yubatswe. Stade yakubise yuzuye ibihumbi mirongo twese tuvuza ibirumbeti, abandi babyina intsinzi. Abasore bacu bari mu kibuga bize neza, batozwa neza, babaho neza kugeza ku mirire. Biragaragara ko birinze kujya banywa ibisindisha n’ibindi biyobyabwenge byatuma badaconga umupira neza.

Dore umupira! Abasore baramanukana ishyaka kuva ku izamu ugana ku rindi ukagira ngo ni imirabyo! Nta bwoba bafite intego ni imwe ari yo gutsinda gusa. Abatoza ni abanyarwanda bambaye imyenda ikorerwa mu Rwanda, abafana nta gucika intege cyangwa ngo bitotombe, intego ni ugufana kugeza umupira urangiye, byose byarangije kuba umuco ku kibuga.

Imvugo z’urucantege ntizikibaho kuko abafana bamenye ko nabo bibareba gufana kugeza ku munota wa nyuma uko byagenda kose. Gupfa cyangwa gukira ariko intsinzi ikagerwaho, niyo ntego. Barahererekanya neza umupira aho nicaye nkanyurwa, mu kanya nk’ako guhumbya igitego cyinjiye umuzamu w’ikipe duhanganye ataye umutwe barimo kumusukira amazi asa n’ukubiswe n’inkuba itagira amazi! Umudiho uva mu itako koko ndabyemeye! Na we ari wowe iriya shoti itewe n’uriya musore w’ibigango wariye neza ntiwayifata! Abafana barabyinnye Stade ngira ngo iraridutse !

Ye babaweee! Dore abasore bacu umunezero n’ishema bafite mwo gaheka mwe! Abatoza barimo kugenda babaterura, ibishashi by’umuriro birimo guturitswa. Akaradiyo kanjye ku gutwi,umunyamakuru namukurikiye arimo kogeza agira ati “Turabikoze kuko twateguye neza kabone n’ubwo byatwaye umwanya n’ubushobozi. Turabikoze kuko abana b’abanyarwanda babyiyemeje nta kongera gutsindwa ukundi. Turabikoze burya na nyina wundi yabyara umuhungu. Turabikoze kuko icyo Umunyarwanda ashaka akigeraho.”

Mana y’ i Rwanda, imodoka yahageze ngomba kuvamo, ariko nsohokanye akanyamuneza ko twabikoze tutazongera kwisukirwa haba ku bibuga by’iwacu cyangwa mu mahanga. Twabikoze ntituzongera gucika intege dufite ishyaka , twiyemeje gukomeza urugendo rw’ubutsinzi ubudasubira inyuma.

Reka nsabe Abanyarwanda aho bari hose ku isi dushyigikirane, dutange ibitekerezo byubaka, dufane tubikunze nta kabuza ikipe yacu ntiyisukirwa ni ‘’Amavubi’’.

Byose tubikorane ishyaka ryo gukunda igihugu no kugiteza imbere. Ubumwe bwacu nibwo butsinzi bwacu.

Hakenewe gukorwa byinshi ku mpande zose ngo ikipe y'igihugu ijye ibe ikipe itsinda ibihe byose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .