00:00:00 IGIHE NETWORK KN KINYARWANDA EN ENGLISH FR FRANCAIS

Imigirire n’imitekerereze twakwimakaza nk’Abanyarwanda

Yanditswe na Kwezi Jean
Kuya 12 Nzeri 2021 saa 01:30
Yasuwe :
0 0

Umuntu ni ikinyabuzima gitekereza kandi kirangwa n’ibikorwa bishobora kuba byiza cyangwa bibi bitewe n’imico n’imigirire ya buri umwe ku giti cye. Uko wavutse, imibereho wakuriyemo mibi cyangwa myiza ,uburere n’uburezi wahawe byose bigira imbaraga zerekana uwo uri we kugeza ku nyurabwenge yawe ariyo ikuyobora.

Nubwo abemeramana mu nzira ya gikirisitu bavuga ko umuntu avukana icyaha cy’inkomoko dukizwa nuko twakiriye Yesu Kristo , ariko kandi narasesenguye nsanga ubusanzwe umuntu aho avukiye mu muryango, igihugu cyangwa umugabane bimugira uwo ari we biturutse ku kuba yarahuye n’ibimuhindura uku cyangwa.

Umutimanama we ushobora kuganza ibyiyumviro n’imikorere y’abo abamo n’aho aba, aribyo bita kwivukira hakabaho n’abakora neza neza nkabo basanze batagize icyo bahindura. Niyo mpamvu ushobora kuba ubana n’abakora ibikorwa bibi kuko wivukiye ufite umutimanama w’ubumuntu, ukabaganza ahubwo ukaba wabahindura, waba wararezwe neza ugaharanira ko icyiza kiganza ikibi.

Nafashe umwanya ntekereza kuri gakondo yacu u Rwanda turimo none, nsubiza amaso inyuma aho nashoboraga kugeza imitekerereze no gusesengura kwanjye nshingiye ku mateka nzi, yaba ayo nasomye mu bitabo cyangwa numvanye abakuru. Nasanze u Rwanda ari igihugu cyabayeho ariko kandi cyanyuze mu bikomeye byasize ibikomere nibura uhereye mu 1959 ubwo bamwe mu Banyarwanda bameneshwaga, abandi bakicwa. Igikomere u Rwanda rwagize vuba aha mu myaka 27 ishize gishingiye kuri Jenoside yakorewe abatutsi mu 1994 aho abasaga miliyoni bishwe bazira gusa uko bavutse.

Nyuma y’aho abandi Banyarwanda baba abataragize uruhare ruziguye muri jenoside ndetse n’abarugize, umubare munini wabo werekeje ubuhungiro . Mu buhungiro kuko atari ahantu heza uko biri kose abagiyeyo nabo bagize ibibazo buri wese ku giti cye.

Mu myaka yakurikiye 1996, Leta y’ubumwe bw’Abanyarwanda yafashe ingamba zo kujya gucyura izo mpunzi nyinshi zari muri Zaïre ariyo Repubulika Iharanira Demukarasi ya Congo y’ubu, bamwe barataha abandi bakomeza bajya mu mashyamba y’icyo gihugu kugeza ubwo bamwe bisanze mu bindi bihugu biri kure y’u Rwanda.

Abarokotse jenoside yakorewe abatutsi bari bafite ibikomere bikomeye ku mutima no ku mubiri, ku buryo hari hakenewe ihumure kuri bo, gusa nashimye cyane ukuntu bitwaye nyuma y’ibyago bikomeye bagize. Mu gihe muri rusange Abanyarwanda bariho barwana no kuzanzamuka, mu 1998 ibitero by’abacengezi nabyo byari bimeze nabi, byangiza byinshi bisiga n’ibindi bikomere.

Hamwe n’ibyo byose rero haracyari kare kuba u Rwanda rwakira ibikomere nk’ibyo mu myaka 27 gusa. Leta y’Ubumwe bw’Abanyarwanda, yaharaniye gusana ibyangiritse harimo ubumwe, amahoro, umutekano n’iterambere kandi nubwo bitari byoroshye byinshi byagezweho mu buryo bufatika bugaragarira buri wese.

Narasesenguye nsaga kuyobora u Rwanda rwahuye n’amakuba nk’ayo tuzi bitoroshye ariyo mpamvu nshimira Nyakubahwa Perezida Paul Kagame waharaniye ko Abanyarwanda babana amahoro bakiteza imbere bikaba byaragezweho kabone nubwo wenda haba hari bimwe byo kunoza kuko kubaka ni urugendo cyane cyane ku gihugu cyari cyarasenyutse mu nguni zose z’ubuzima.

Hamwe n’amateka n’ibibazo twanyuzemo numva buri wese yakwirinda gufata umubabaro yagize agashaka kuwuhindura urwitwazo n’inyundo asenyesha inyungu rusange zaho turi naho tugana heza. Numva byaba byiza guharanira ko abana bavutse nyuma ya jenoside yakorewe abatutsi n’ibindi binyejana bizakurikira twabasigira umurage w’u Rwanda ruzira urwango,ruteye imbere kandi rutekanye.

Bimaze iki kuzura ibitekerezo bishaje byateza amacakubiri mu Banyarwanda mu gihe twariho duhanganye no kunga ubumwe no kubaka igihugu cyiza? Numva twagakwiriye gutanga.

Umusanzu w’ibitekerezo kuri gahunda zitandukanye zo kubaka igihugu no kwiteza imbere byose, bigakorwa mu bwubahane twirinda gukomeretsa no gusenya ibyagezweho tuzirikana ko kubaka bihenda.

Byaba byiza Abanyarwanda twimakaje umuco w’urukundo n’ubupfura tugaharanira ubumwe bwacu byose tubikora kubw’ineza y’abavuka n’abazavuka bakazasanga twarabateguriye neza. Numva atari byiza gukomeretsa imitima igihungabanye twitwaje ikibuga cyiswe icya politiki cyane ko nasesenguye ngasanga n’iri jambo bamwe barikoresha rimwe na rimwe nabi kuko bagarukira hafi mu bunini bwaryo abandi bakaritinya kubera inyito y’isura ryahawe.

Buri wese ni umunyapolitiki bitewe n’intego aharanira kugeraho.Umuhinzi-mworozi afite wenda politiki y’uko azorora, agahinga akihaza nyuma agasagurira amasoko. Umunyeshuri mwiza wasanga afite politiki ngari yo kwiga akaminuza akavumbura ibyateza u Rwanda imbere. Umucuruzi ashyiraho politiki y’ukuntu azatanga serivisi nziza ku baguzi agaharanira gutanga imisoro ku gihe bikaba imbarutso yo guteza imbere igihugu. Umuyobozi mwiza ashyiraho politiki yo kuyobora neza abo ashinzwe akabageza ku iterambere bifuza.

Umuryango umuntu avukamo nawo burya uba ufite politiki ngari y’iterambere ryawo. Abantu twese turi abanyapolitiki ahubwo dutandukanira mu bikorwa gusa bishamikiye kuri iyo mirongo migari buri wese aba anyuramo kugira ngo agere ku ntego ye.

Ku ngingo y’imitekerereze n’imigirire ni byiza ko mu gihe habaye ikibazo runaka bitajya biba icyita rusange. Ibi ndabivugira ko nasesenguye ngasanga hari abakora amakosa mu kazi kabo bikaba rusange kandi tubizi neza ko umuntu ashobora gutana mu nshingano ku giti cye. Ni kimwe no mu muryango hatabura inkonkobotsi ikora amakosa ariko ibyo ntibikwiriye kwitirirwa uwo muryango wose, icyaha cyangwa ikosa ni gatozi ku muntu ku giti cye.

Banyarwanda bene wacu aho muri hose mba numva dukwiriye kuba abasirimu mu mitekerereze n’imigirire tukamenya gutandukanya ibihe. Twunge ubumwe twese tureke kujya twimena inda, turusheho kuba ibihangange mu ruhando mpuzamahanga. Natwe erega twahiga u Bushinwa,u Burusiya, Amerika n’ibindi bihugu by’i Burayi twubahira ubuhangange, burya nabo babanje guharanira ubumwe bwabo.

Dukomere ndabona u Rwanda rumurika icyizere.

Igitekerezo cya KWEZI Jean

John Kwezi asanga abanyarwanda bakwiriye gushyira hamwe bakubaka igihugu gikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .