00:00:00 IGIHE NETWORK KN KINYARWANDA EN ENGLISH FR FRANCAIS

Icyo ntekereza cyatuma Abanyarwanda baba indashyikirwa muri Jeux Olympiques

Yanditswe na Kwezi Jean
Kuya 27 Kanama 2021 saa 12:53
Yasuwe :
0 0

Ntangiye nandika inyajwi nyihuza n’ingombajwi ndetse n’ibihekane nawe unkurikire usoma wumve aho nganisha igitekerezo cyanjye, wirinde gutera inkunga umwe wavuze ko ushaka guhisha Umunyafurika amuhisha mu nyandiko.

Reka ntangire nkubaza, Ese waba warakinnye agapira kamwe twitaga akarere? Ugatera udushoti tuvuza ubuhuha uri ku ishuri cyangwa mu mu mudugudu waho utuye? Uribuka umukino w’agati, gusimbuka umugozi no gusamata? Wasimbutse urukiramende se bakajya bazamura intera bitewe n’uko ugenda utsinda abandi barimo kurunera? Wumvise amateka y’abasekuruza bacu ajyanye no gutera icumu no kurasa intobo? Kubuguza igisoro byo ndakeka warabibonye kandi wenda umwe mubo mu muryango wanyu azi kugikina.

Birashoboka ko wakundaga gutwara igurudumu wiruka ugana ku ishuri cyangwa uvayo? Uko biri kose wenda wakinnye biye uba mudahusha ukajya utera udutambwe ubara intera wayitayemo.

Ubu se ho ukurikira na Football, Volleyball, Handball, Tennis, Baskeball, Karate, Umukino w’amagare n’indi mikino nk’iyo igezweho ituruka imahanga? Harya wibuka ko siporo ari umuti ntagereranwa ku ndwara nyinshi zibasira imibiri yacu ariko kandi yaba n’ubucuruzi bwinjiza? Reka dukomeze tujyane usoma tugana ku ingingo nyamukuru.

Ubwo nakurikiranaga imikino mpuzamahanga bita Jeux Olympiques yaberaga mu Buyapani mu mujyi wa Tokyo guhera kuwa 23 Nyakanga 2021 kugeza kuwa 08 Kanama 2021, nashimishijwe no kubona bamwe mu bana b’ u Rwanda batwaye ibendera ry’igihugu bari ku murongo umwe n’abandi baturutse imihanda yose mu bindi bihugu bari baje guhatana.

Nakomeje kujya nkurikirana amakuru y’uko turimo kubyitwaramo iyo imahanga kugeza ubwo imikino yasojwe dutahira aho nta mudari n’umwe. Narababaye nk’abandi bose, cyakora mpumurizwa n’uko amarushanwa azahoraho; ndatekereza nibuka umugani ugira uti “Utabusya abwita ubumera’’ kandi ngo “uburiye umubyizi mukwe ntako aba atagize’’.

Nkuko bisanzwe iyo ngiye kuvuga amateka yacu mpera mu w’1994 ubwo Jenoside yakorerwaga Abatutsi yahagarikwaga n’ingabo zari iza FPR Inkotanyi. Ibintu byose byari byarasenyutse ari ukubaka bundi bushya kuva ku gusana imitima y’Abanyarwanda bari barokotse, gucyura impuzi ibihumbi zari mu bihugu bitandukanye, kubaka ibikorwaremezo byari byarasenyutse ndetse no kubaka ubukungu muri rusange.

Ibi byose nagendaga mbikurikirana kandi mbyirebera n’amaso yanjye. Ni muri uru rwego na siporo n’indi mikino ngororamubiri nayo yagizweho ingaruka zikomeye cyane. Kuri iyi ngingo ndashimira Leta y’ubumwe bw’abanyarwanda yakoze ibishoboka ngo imyidagaduro n’ibikorwa bya siporo byongere kubaho kugeza ubwo u Rwanda ruba igihugu cyizewe n’amahanga mu kwakira imikino mpuzamahanga ikomeye.

Gusimbuka urukiramende kera byahoze ari umukino Abanyarwanda bakinaga batarushwa

Ibi ntabwo byikoze ahubwo Inzego z’ubuyobozi bw’igihugu zirangajwe imbere na Nyakubahwa Perezida Paul Kagame zakoze akazi keza gakomeye, ndabashimiye.

Nubwo bimeze bityo ariko, ngarutse kuri Jeux Olympiques ntabwo twashoboye kwitwara neza nka bimwe mu bihugu by’ibituranyi, ari nacyo cyatumye mfata mudasobwa yanjye ndandika ngira ngo ntange umusanzu w’igitekerezo numva cyazamura imikino ngororamubiri na siporo muri rusange, kugeza ubwo twashobora kujya twegukana amakamba, ibikombe n’imidari mu ruhando mpuzamahanga.

Narasesenguye nsanga mu mikino ya Jeux Olympiques, imyinshi muri yo twari dusanzwe tuyifite mu mateka yacu, indi ikajya gusa nayo. Imikino nko gusimbuka urukiramende, gutera intosho, kwiruka, gutera imihunda, kwiruka n’indi nkiyo ntarondora, ikwiriye gusubizwa mu ndangagaciro z’imikinire yacu ikiyongera kuyo dusanzwe dukora izwi, bityo urubyiruko rukabyitabira ku bwinshi.

Byaba ari byiza habayeho umushinga rukumbi wo kuzahura imikino ngororamubiri yazimye cyangwa igana ku kuzimira yabaga mu muco wacu igasusurutsa abanyarwanda kandi igatezwa imbere duhereye ubu, abasore n’inkumi b’abanyarwanda bagatangira kwitoza no gutozwa.

Hakwiriye kubaho gutegura amarushanwa guhera mu midugudu, imirenge, uturere n’intara kugeza ku rwego rw’igihugu, bigahabwa imbaraga kugeza mu mashuri , ibigo bikajya birushanwa kugeza ubwo hazajya haboneka abadahigwa baserukira igihugu mu mikino nk’iriya.

Bikozwe neza byatanga umusaruro ufatika ubutaha muri Jeux Olympiques imidari imwe cyangwa yose igataha mu rw’imisozi igihumbi. Narasesenguye nsanga abanyarwanda dushoboye, ahasigaye haba gushyiramo ubushake cyane ko turi abantu bazi kwishakira ibisubizo ku ngingo zireba ubuzima n’iterambere ryacu.

Byaba byiza inzego zimwe nka Minisiteri y’ubutegetsi bw’igihugu, Minisiteri ya Siporo, Minisiteri y’umuryango, Minisiteri y’umuco n’urubyiruko, Minisiteri y’uburezi , Komite Olimpike n’indi miryango ifasha urubyiruko, bifashije mu bukangurambaga kugira ngo birusheho gutanga umusaruro.

Turamutse twitabiriye imikino isanzwe ari gakondo yacu ariko igaragarara muri Jeux Olympiques, usibye no kuba ari ishema ku gihugu, ni ubundi buryo bwo kurema akazi ku rubyiruko rwinshi dufite cyane ko ababikora neza bishobora kubatunga kandi bikazamura ubukungu bw’igihugu kuko iriya midari ifite igenagaciro ry’akayabo k’amafaranga ayiherekeza.

Ni ubundi buryo bwo kumenyekanisha igihugu muri rusange mu rwego rw’ubukerarugendo kuko aho imidari nk’iriya itangirwa muri Jeux Olympiques, bituma benshi bifuza kugera muri icyo gihugu. Ibi byazatuma hamwe n’uko u Rwanda tuzi gusigasira umutekano no kwakira neza abatugana, iriya mikino mu myaka iri mbere yazabera inaha iwacu nabyo bikaba irindi shema n’igitego dutsinze nk’abanyarwanda.

Ndasayuka kuri iyi ngingo nsaba urubyiruko gutangira kwihangira akazi muri uru rwego rw’imikino ngororamubiri navuze yose uko yakabaye, uhereye kuri iyo yari gakondo yacu kugeza ku yindi igenda iza iturutse imahanga. Akenshi usanga igishoro cyo kuyitangira ari gito kuko bisaba cyane imbaraga n’ubushake by’umuntu kuruta ibikoresho.

Iki ni kimwe mu bisubizo by’ubushomeri mu rubyiruko rwacu. Duhereye kuri iyo mikino ku mashuri aho twiga no mu midugudu dutuyemo, twatangira kwitoza dutegura amarushanwa y’ubutaha.

Umunsi umwe twazatwara imidari ya zahabu muri Jeux Olympiques, ibendera ry’igihugu cyacu rikazamurwa maze indirimbo yubahiriza igihugu amajwi yayo azamurwe turirimba ‘’Rwanda Nziza gihugu cyacu’’.

Banyarwanda bene wacu aho muri hose ku isi, dutahirize umugozi umwe, twunge ubumwe,tubane amahoro, twiyubakire igihugu.

Ubwo ikipe yahagarariye u Rwanda ubwo yatambukaga mu Buyapani mu mikino Olempike

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .