00:00:00 IGIHE NETWORK KN KINYARWANDA EN ENGLISH FR FRANCAIS

Hari imikorere n’imyitwarire ibangamira iterambere

Yanditswe na Dr. Gasana Sebastien
Kuya 22 Kanama 2021 saa 08:08
Yasuwe :
0 0

Ibyo umuntu akoze byose aba yifuza kubikuramo inyungu, haba ku buryo bw’ako kanya, mu gihe giciriritse cyangwa se mu gihe kirekire. Izo nyungu ndetse zishobora no kuba ziri mu moko atandukanye; kuko inyungu zishobora kuba zishingiye ku “mafaranga’’, cyangwa se ibindi bintu binyuranye.

Izo nyungu tuvuga ku muntu ku giti cye ni nako zishobora kugaragara iyo tubyerekeje ku gihugu. Kandi n’ubundi iyo tuvuze igihugu, ahanini tuba dushaka kuvuga, mbere na mbere, abaturage bacyo. Inyungu z’umuturage, cyangwa se igihugu, iyo zigenda ziyongera nibwo n’iterambere muri rusange, rishobora kwiyongera.

Imikorere y’abantu, turebeye ibintu muri rusange, cyangwa se iy’ umuntu ku giti cye, ishobora kuba imbogamizi y’iterambere, ku muntu umwe cyangwa benshi. Ku rwego rw’igihugu, iyo imikorere y’abantu banyuranye, ndetse no mu nzego zitandukanye, ikomeje kugenda iba mibi, bityo n’iterambere rikaba ryakomwa mu nkokora, bishobora gutera n’izindi ngaruka mbi nyinshi ku gihugu cyose.

Mu kugaragaza neza icyo twifuje kuvugaho, reka dufate nke muri zimwe mu ngero zifatika, kandi dukunze kubona kenshi mu gihugu.

Rwiyemezamirimo wambura abamukoreye

Ni kenshi twumva hirya no hino mu gihugu no mu itangazamakuru rinyuranye, abantu bavuga ko uwo bakoreye yanze kubishyura, nyamara bo bararangije neza gukora imirimo bagombaga gukora.

Kuri abo baba batarabonye ibihembo byabo bari bategereje rero bibagiraho ingaruka mbi zinyuranye, kandi bikadindiza ibikorwa byabo n’imishinga ibafitiye inyungu baba barateganyije gukora. Bityo, imibereho yabo n’imiryango yabo ntishobore kuba myiza.

Iyo bitabaye kwamburwa burundu, hari aho usanga abakozi, cyangwa se abandi bantu batanze ibikoresho binyuranye, batinda kwishyurwa, kandi nyamara uwo bakoreye atari uko, mu by’ukuri, yabuze icyo yakwishyura.

Ikirushaho gutangaza ni uko hari n’ubwo usanga bimwe mu bigo bya Leta, cyangwa ibiyishamikiyeho, nabyo bikora gutyo, kandi nyamara igihugu kiba cyaratanze amafaranga (ashobora no kuba avuye mu misoro y’abaturage) azakoreshwa muri ibyo bikorwa byose.

“Twasanze umushinga warizwe nabi”

Ni kenshi twumva iyo mvugo, cyane cyane iyo bigeze mu gihe cyo gusobanura uko imishinga Leta yashoyemo amafaranga kandi ifitiye igihugu akamaro ihagaze. Mu gushaka guhisha imikorere n’imyitwarire mibi y’abagize uruhare mu indindira cyangwa ugukora nabi kw’iyo mishinga, akenshi usanga hitabazwa iyo mvugo. Ibyo rero hari ubwo bivugwa, bikazasubirwamo n’abandi, abantu bakabyumva bikarangirira aho.

Ubu se koko twavuga ko igihugu kibuze abahanga bashobora kwiga imishinga neza ku buryo itegurwa neza kandi igashyirwa mu bikorwa uko bikwiye? Iyo usesenguye neza, akenshi usanga hari benshi baba bahishe ibindi iyo bavuga ngo umushinga uyu n’uyu basanze warizwe nabi. Reka dutange urugero rufatika rumwe: Ni gute watekereza kongera inka zitanga umukamo utubutse, ariko ukirinda gutekereza uko amata namara kuba menshi abantu bazayatunganya kugira ngo atangirika, cyangwa bakabasha kuyabonera isoko?

“Icyo kibazo ntitwari tukizi; ubwo tukimenye tugiye kugikurikirana”

Iyi mvugo nayo ni kenshi yumvikana, cyane cyane mu bayobozi b’inzego z’ibanze mu gihugu cyacu. Nayo iravugwa igasubirwamo, ku buryo hari abashobora kuyifata nk’aho buri gihe iba ari ukuri. Nyamara ureba neza uko inzego z’ubuyobozi ziteye asanga akenshi abayikoresha baba bashaka guhisha imikorere itanoze.

Iyo ibibazo bititaweho ku gihe ngo bishakirwe ibisubizo, amaherezo bishobora kuba imbogamizi y’iterambere ry’abo bibangamiye ndetse n’abandi.

Duhiniye aha, bitabaye ngombwa kujya mu bisobanuro n’ingero nyinshi, twavuga gusa ko ku gihugu, iterambere ari ikintu kigari cyane, kandi gisaba imikorere myiza n’imikoranire y’abantu n’inzego zinyuranye, ku buryo kugira ngo rigende rizamuka bisaba guhora hanozwa imikorere n’imyitwarire ya buri wese mu bafatanyabikorwa bose barigiramo uruhare.

Dr Sebastien Gasana
Umwarimu wa Kaminuza n’Umushakashatsi

Dr Gasana asanga imikorere mibi ishobora kuba imbogamizi ku iterambere ry'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .