Baherereye he? Ibirari by’abari bagize Guverinoma ya mbere nyuma ya Jenoside

Yanditswe na Ferdinand Maniraguha
Kuya 19 Nyakanga 2019 saa 08:40
Yasuwe :
0 0

Ku wa Kabiri tariki 19 Nyakanga 1994 nibwo hagiyeho Guverinoma y’Ubumwe. Imyaka 25 irashize!

Ni Guverinoma yagiyeho nyuma y’iminsi ibiri gusa ingabo zari iza FPR Inkotanyi zimaze kubohora imijyi ya Ruhengeri na Gisenyi, zinahagarika Jenoside yari imaze guhitana Abatutsi basaga miliyoni imwe.

Nubwo intambara y’amasasu yasaga n’irangiye, umutima ntiwari hamwe kuko abanyapolitiki benshi n’ibikomerezwa bya Leta ishinjwa gutegura no gukora Jenoside, bari hakurya gato muri Zaire bisuganya ngo bagaruke ku butegetsi bari bamaze kwirukanwaho.

Tariki 17 Nyakanga nyuma yo kubohoza ibice byose by’igihugu, FPR Inkotanyi yasohoye itangazo riteguza Guverinoma y’inzibacyuho yari igiye kujyaho, rinashimangira ko muri iyo Guverinoma hatazabonekamo abo mu mashyaka ya MRND, CDR n’andi yagize uruhare muri Jenoside.

Guverinoma y’Ubumwe yari igizwe n’abaminisitiri 17 ariko tariki 19 harahiye 14, abandi bongerwamo tariki 20 Nyakanga.

Mu baminisitiri bashyizweho uwo munsi, Gen Major Paul Kagame wari Visi Perezida akaba na Minisitiri w’Ingabo, ni we musirikare rukumbi wari urimo.

Mu ijambo Paul Kagame yavuze kuri uwo munsi wo gushyiraho Guverinoma nshya, yavuze ko akazi kakiri kose bityo ko bisaba Guverinoma nshya gukoresha ingufu.

Yagize ati “Turebye aho tuva n’aho tugana, ndabona ko nta n’umwe wari ukwiye kuvuga ko twasoje inshingano zacu, ngo ajyeho yicare hasi atekereze ko ibibazo byose byarangiye. Ni igihe cyo guhaguruka tugakorera hamwe, nk’uko twabikoze mu bihe byashize bigatuma tugera aho tugeze uyu munsi, tugashyiraho guverinoma dufitiye icyizere ko izayobora igihugu ikakigeza mu nzira y’iterambere.”

Guverinoma yo ku wa 19 Nyakanga, imyanya umunani yahawe FPR Inkotanyi, itatu ihabwa ishyaka MDR, itatu ihabwa PL, PSD ihabwa imyanya ibiri naho umwe uhabwa PDC.

Abari bagize Guverinoma ya mbere y’Ubumwe

1. Perezida: Pasteur Bizimungu

Pasteur Bizimungu ni we wahise agirwa Perezida w’inzibacyuho. Uyu mugabo uvuka muri Gisenyi, yari umunyamuryango wa FPR Inkotanyi wigeze no kuyobora ikigo cya Electrogaz cyahoze gishinzwe ingufu ku butegetsi bwa Perezida Juvenal Habyarimana.

Bizimungu ubu ufite imyaka 69 yabaye Perezida kugeza kuwa 23 Werurwe 2000 ubwo yeguraga ku mwanya wa Perezida.

Bizimungu yaje gushinga ishyaka PDR Ubuyanja ritemewe n’amategeko, mu 2002 aza gutabwa muri yombi ashinjwa kurema umutwe utemewe no kunyereza umutungo wa Leta, umwaka wakurikiyeho akatirwa gufungwa imyaka 15.

Pasteur Bizimungu yabaye Perezida wa Guverinoma y'Ubumwe

Mu 2006 Bizimungu yandikiye ibaruwa Perezida Kagame asaba imbabazi, azihabwa mu 2007 ahita arekurwa. Ubu aba mu Rwanda mu bikorwa bye bwite.

2 : Visi Perezida & Minisitiri w’Ingabo: Paul Kagame

Muri Guverinoma y’Ubumwe, Minisitiri w’Ingabo yagizwe Général-Major Paul Kagame anaba Visi Perezida. Paul Kagame yagumye kuri uwo mwanya kugeza muri Werurwe 2000 ubwo yatorerwaga gusimbura Bizimungu ku mwanya wa Perezida. Ni inshingano yakoze neza ndetse aza gutorerwa izindi manda, kugeza uyu munsi.

Gen Maj Paul Kagame yabaye Visi Perezida na Minisitiri w’ingabo

3. Minisitiri w’Intebe: Faustin Twagiramungu

Guverinoma ya mbere yagiyeho nyuma ya Jenoside yari iyobowe na Faustin Twagiramungu nka Minisitiri w’Intebe.

Twagiramungu w’ishyaka MDR ni umwe mu banyepolitiki bari barahanganye n’ingoma ya Habyarimana, bashyigikiye imigambi y’ubumwe n’ubwiyunge mu banyarwanda.

Minisitiri w’Intebe yagizwe Faustin Twagiramungu wo mu ishyaka MDR

Uyu mugabo uvuka mu yahoze ari perefegitura ya Cyangugu, yaje kwegura tariki 28 Kanama 1995, ahita afata iy’ubuhungiro agana mu Bubuligi ari naho akiba. Asigaye agaragara mu bikorwa birwanya Leta y’u Rwanda ndetse aherutse kwifatanya n’Ihuriro P5 ry’amashyaka aba hanze y’u Rwanda, atavuga rumwe na Guverinoma y’u Rwanda.

4. Minisitiri w’Intebe wungirije & Minisitiri w’umurimo : Alexis Kanyarengwe

Kanyarengwe Alexis wo mu Muryango FPR Inkotanyi ni we wahawe umwanya wa Minisitiri w’umurimo akaba na Minisitiri w’Intebe wungirije.

Uyu mugabo ukomoka mu yahoze ari Ruhengeri (Amajyaruguru), ni umwe mu bahoze ari ibikomerezwa ku ngoma ya Habyarimana dore ko ari umwe mu basirikare icyenda bafatanyije na Habyarimana guhirika ubutegetsi bwa Grégoire Kayibanda kuwa 5 Nyakanga 1973.

Kanyarengwe wafatwaga nka nimero ya kabiri ku butegetsi bwa Habyarimana, baje gushwana mu 1980 ashinjwa gushaka kumuhirika, nyuma aza guhunga igihugu ari nabwo yifatanyaga na FPR mu rugamba rwo kubohora igihugu.

Kanyarengwe wabaye umuyobozi w’Umuryango FPR Inkotanyi kugeza mu 1998, yaje kuvanwa muri Guverinoma mu 1997. Alexis Kanyarengwe yitabye Imana tariki 13 Ugushyingo 2006 azize uburwayi, ashyingurwa mu irimbi rya Remera mu mujyi wa Kigali.

5. Minisitiri w’ububanyi n’amahanga: Jean Marie Ndagijimana

Nk’igihugu cyari kimaze kuva muri Jenoside, ibihugu byinshi bigifata nk’ikitariho, ntabwo byashobokaga kwisubiza ikuzo hatabayeho kugira Minisiteri y’ububanyi n’amahanga kandi ikora cyane.

Ndagijimana wari mu ishyaka MDR ni we wahawe uwo mwanya atamazeho kabiri. Uyu mugabo uvuka mu yahoze ari Cyangugu yamaze amezi ane kuri uwo mwanya, aza guhungira mu Bufaransa atwaye amafaranga yari yahawe ngo ajye gufunguza za ambasade.

Perezida Paul Kagame aherutse kubikomozaho ati “Minisitiri w’ububanyi n’amahanga wa mbere wagiyeho icyo gihe yagambanye n’abandi bayobozi muri Guverinoma nka Minisitiri w’Intebe icyo gihe, ahabwa amafaranga mu ntoki, ibihumbi amagana by’amadolari, ngo ajye mu mahanga asubukure ibikorwa bya za ambasade cyangwa afunguze inshya. Uyu mugabo ntabwo yagarutse! Kandi yari amaze amezi angahe mu kazi, iyo yari guverinoma ya mbere y’inzibacyuho.”

Jean Marie Ndagijimana yari Minisitiri w’ububanyi n’amahanga

6. Minisitiri w’Umutekano: Seth Sendashonga

Guverinoma y’inzibacyuho yashyizwe kuwa 19 Nyakanga 1994, ntiyasize n’umwanya wa Minisitiri w’Umutekano. Uwo mwanya wahawe Seth Sendashonga wakomokaga mu yahoze ari Perefegitura ya Kibuye, wari impunzi muri Kenya ku butegetsi bwa Perezida Habyarimana.

Sendashonga wari umunyamuryango wa FPR Inkotanyi, yavuye muri Guverinoma mu 1995 ahita ajya mu buhungiro muri Kenya. Aho niho yaje kurasirwa tariki 16 Gicurasi 1998.

Sendashonga wari umunyamuryango wa FPR Inkotanyi, yavuye muri Guverinoma mu 1995 ahita ajya mu buhungiro muri Kenya

Perezida Paul Kagame aherutse kuvuga ko Sendashonga nyuma yo guhunga igihugu yakoranye n’abashakaga guhungabanya umutekano ku buryo yari yatangiye ‘kurenga umurongo’.

7. Minisitiri w’Ubutabera : Alphonse Marie Nkubito

Minisiteri y’ubutabera yahawe umunya-Cyangugu, Alphonse Marie Nkubito wari impirimbanyi y’uburenganzira bwa muntu.

Nkubito yayoboye iyo Minisiteri kugeza mu 1995. Yaje kwitaba Imana kuwa 13 Gashyantare 1996 azize uburwayi.

8. Minisitiri w’Uburezi: Pierre-Célestin RWIGEMA

Pierre-Célestin Rwigema uvuka i Gitarama mu Ntara y’Amajyepfo ubu, ni we wagizwe Minisitiri wa mbere w’Uburezi bw’amashuri abanza n’ayisumbuye nyuma ya Jenoside.

Rwigema wari mu ishyaka MDR, yaje kuva kuri uwo mwanya aba Minisitiri w’Intebe asimbuye Faustin Twagiramungu. Umwanya wa Minisitiri w’Intebe yawuvuyeho muri Werurwe 2000, aza guhungira muri Leta Zunze Ubumwe za Amerika.

Yagarutse mu gihugu mu mwaka wa 2011, aza no gutorerwa kuba umudepite uhagarariye u Rwanda mu Nteko Ishinga Amategeko y’Umuryango wa Afurika y’Iburasirazuba (EALA) ari nawo akiriho kugeza ubu.

Minisitiri w’Uburezi yabaye Pierre-Célestin Rwigema

9. Minisitiri w’Amashuri Makuru n’ubushakashatsi : Dr Joseph Nsengimana

Dr Nsengimana ni we wagizwe Minisitiri w’amashuri makuru n’ubushakashatsi. Uyu mugabo wavukiye i Busogo muri Musanze yashyizwe kuri uyu mwanya kubera ko yari asanzwe ari inzobere mu bijyanye n’uburezi, dore ko yabaye umwarimu muri Kaminuza zirimo iy’u Rwanda n’iya Lubumbashi.

Nyuma yahawe indi myanya ikomeye irimo kuba minisitiri w’abakozi ba Leta n’umurimo, Minisitiri w’ubutaka, gutuza abantu no kurengera ibidukikije ndetse aba umujyanama wihariye wa Perezida Paul Kagame.

Dr Joseph Nsengimana ni we wagizwe Minisitiri w’amashuri makuru n’ubushakashatsi.

Guhera mu 2006 yagiye mu kazi ko kuba ambasaderi, agasoza mu 2014 ubwo yari ahagarariye u Rwanda muri Ethiopia no mu Muryango wa Afurika Yunze Ubumwe. Ubu Nsengimana aba mu Rwanda aho akorera imirimo itandukanye.

10. Minisitiri w’Imari: Marc Rugenera

Ibigega n’isanduku by’igihugu muri Guverinoma ya mbere byaragijwe Marc Rugenera, umunya-Gitarama wo mu ishyaka PSD.

Uwo mwanya Rugenera yawuvuyeho mu 1997 aba Minisitiri w’Ubucuruzi nyuma aba Minisitiri w’ubukerarugendo.

Ubu Rugenera yashinze ndetse ayobora ikigo cy’ubwishingizi cya Radiant.

11. Minisitiri w’Inganda: Prosper Higiro

Minisitiri w’inganda wa mbere nyuma ya Jenoside yabaye Prosper Higiro, umurwanashyaka wa PL ukomoka mu yahoze ari Kibungo.

Uyu mugabo w’imyaka 58, nyuma yo kuva muri Guverinoma yabaye umusenateri ndetse n’umwe mu bakandida biyamamaje ku mwanya wa Perezida wa Repubulika mu matora yo mu 2010.

Higiro aherutse kugirwa ambasaderi muri Canada. Uyu yabaye umuyobozi mu nzego zitandukanye zirimo kuba Umunyamabanga Mukuru w’Ihuriro ry’Inteko zishinga Amategeko z’Umuryango uhuza ibihugu byo mu Karere k’Ibiyaga Bigari (FP-ICGRL).

Minisitiri w’inganda wa mbere nyuma ya Jenoside yabaye Prosper Higiro, umurwanashyaka wa PL

12. Minisitiri w’Ubuzima: Dr Joseph Karemera

Karemera wahoze ari impunzi muri Uganda, ni umunyarwanda ukomoka mu yahoze ari Perefegitura ya Byumba, wabaye Minisitiri wa mbere w’ubuzima w’u Rwanda rwa nyuma ya Jenoside.

Uwo mwanya yawuvuyeho agirwa Minisitiri w’Uburezi. Ntakivugwa cyane ariko ni umwe mu bagitanga ibitekerezo bihamye mu muryango wa politiki akomokamo ari wo FPR Inkotanyi.

13. Minisitiri ushinzwe itumanaho no gutwara abantu n’ibintu: Immaculée Gahima Kayumba

Gahima wo mu muryango FPR Inkotanyi, ni umunya-Butare wabaye mu buhungiro mu gihugu cy’u Burundi mbere ya Jenoside.

Nubwo atakivugwa cyane, Madamu Gahima wanabaye umusenateri ubu ari mu Rwanda aho akorera imirimo itandukanye.

14. Minisitiri w’imibereho myiza: Mugabo Pie

Mugabo Pie yabaye Minisitiri w’imibereho myiza y’abaturage muri Guverinoma ya mbere y’ubumwe, ari umuyoboke w’ishyaka PL.

Uyu mugabo w’inzobere mu mategeko yanabaye umucamanza na Perezida w’Urukiko rukuru. Aba mu Rwanda aho atanga serivisi zitandukanye zijyanye n’iby’amategeko.

15. Minisitiri ushinzwe impunzi: Dr Jacques Bihozagara

Nk’igihugu cyari kivuye muri Jenoside n’intambara yo kubohora igihugu, hari abaturage basaga miliyoni ebyiri bahunze kandi bakenewe mu kongera kubaka igihugu. Byari ngombwa gushyiraho Minisiteri ishinzwe gucyura impunzi, cyane ko ubuhunzi bwari mu bibazo byatumye FPR Inkotanyi ishingwa.

Dr Bihozagara yitabye Imana muri Werurwe 2016, agwa muri Gereza ya Mpimba mu Burundi aho yari amaze umwaka afungiwe kubera impamvu za politiki.

Minisitiri ushinzwe impunzi yabaye Dr Jacques Bihozagara

16. Minisitiri w’Umuryango n’Iterambere ry’umugore: Inyumba Aloysia

Inyumba wakomokaga mu muryango FPR Inkotanyi ni we wagizwe Minisitiri ushinzwe iterambere ry’umuryango n’umugore.

Nk’uwaturukaga mu muryango FPR Inkotanyi, Inyumba yatangije urugamba rwo gutinyura no gushishikariza abagore kumva ko bashoboye, nyuma y’uko bari bamaze no kugira uruhare mu rugamba rwo kubohora igihugu.

Yitabye Imana tariki 6 Ukuboza 2012 azize uburwayi.

Minisitiri w’Umuryango n’Iterambere ry’umugore, Aloysia Inyumba (ibumoso) aganira na Perezida Paul Kagame

17. Minisitiri w’Urubyiruko n’amashyirahamwe: Patrick Mazimhaka

Uyu mugabo wabaye umuyobozi wungirije wa FPR Inkotanyi mbere gato y’urugamba rwo guhagarika Jenoside, ni we wahawe kuyobora urubyiruko muri Guverinoma ya mbere yabayeho nyuma ya Jenoside.

Muri 2003 yatorewe kuba umuyobozi wungirije muri Komisiyo y’Akanama ka Afurika yunze Ubumwe.

Yitabye Imana ku wa 25 Mutarama 2018 azize uburwayi.

Minisitiri w’Urubyiruko n’amashyirahamwe, Patrick Mazimhaka

18. Minisitiri w’ingufu n’imirimo rusange: Charles Ntakirutinka

Charles Ntakirutinka yabaye Minisitiri w’ingufu n’imirimo rusange nk’umunyamuryango w’ishyaka PSD.

Ntakirutinka uvuka ku Gikongoro, mu 2001 afatanyije na Pasteur Bizimungu wahoze ari Perezida bashinze ishyaka PDR Ubuyanja ritari ryemewe n’amategeko.

Yatawe muri yombi mu gihe kimwe na Bizimungu mu 2002, ahamywa ibyaha birimo gukangurira abaturage kwigumura no kurema umutwe w’abagizi ba nabi. Yakatiwe igifungo cy’imyaka icumi, ayirangiza mu 2012.

Ubu yasubiye mu buzima busanzwe ariko ntakigaragara mu bikorwa bya Politiki.

19. Minisitiri w’ubukerarugendo n’ibidukikije: Nayinzira Jean-Népomuscène

Nayinzira yabaye Minisitiri w’Ibidukikije n’ubukerarugendo muri guverinoma yaguye y’inzibacyuho yatangajwe ku wa 19 Nyakanga 1994, yari iyobowe na Faustin Twagiramungu.

Yaje kuba umudepite ariko mu 2002 aza kwegura mu nteko ishinga Amategeko ashinjwa imyitwarire idahwitse. Nayinzira yagarutse mu ruhando rwa politiki ahatanira kuba Perezida wa Repubulika nk’umukandida wigenga, mu matora ya Perezida yo mu 2003.

Uyu mugabo wavukiye mu yahoze ari Perefegitura ya Gisenyi ku wa 10 Werurwe 1943, yitabye Imana kuwa 13 Kanama 2014.

20. Minisitiri w’Ubuhinzi, Ubworozi n’Amashyamba: Dr Iyamuremye Augustin

Dr. Iyamuremye wo mu ishyaka PSD ni we wabaye Minisitiri Minisitiri w’Ubuhinzi, Ubworozi n’amashyamba muri Guverinoma ya mbere y’Ubumwe, icyakora we yashyizweho tariki 18 Kanama 1994 hashize ukwezi abandi bari mu mirimo.

Yabaye Minisitiri w’Ububanyi n’Amahanga kuva mu 1999 kugeza muri 2000. Yanabaye kandi Minisitiri w’Itangazamakuru.

Iyamuremye ni we wayoboye Komisiyo yashinzwe kwiga ku ngingo z’Itegeko Nshinga ryavuguruwe mu 2015. Kuri ubu Iyamuremye ni umuyobozi w’Urwego rw’Igihugu Ngishwanama rw’Inararibonye.

Iyamuremye wo muri PSD yabaye Minisitiri Minisitiri w’Ubuhinzi, Ubworozi n’amashyamba muri Guverinoma ya mbere y’Ubumwe

21. Minisitiri w’Igenamigambi, Birara Jean-Berchmas

Birara yagizwe Minisitiri tariki 2 Nzeri 1994 nyuma y’amezi asaga abiri Guverinoma nshya igiyeho. Ni umunyapoliti wari mu ishyaka MDR, uvuka mu yahoze ari Perefegitura ya Byumba.

Yirukanywe muri Guverinoma mu Ukwakira 1997. Ubu ari mu kiruhuko cy’izabukuru, aba mu Mujyi wa Kigali.

22. Minisitiri w’Itangazamakuru: Nkuliyingoma Jean Baptiste

Nkuliyingoma yagizwe Minisitiri ahagarariye ishyaka MDR. Akomoka mu yahoze ari Perefegitura ya Byumba.

Yavuye muri Guverinoma muri Kanama 1995 ubwo Twagiramungu wari Minisitiri w’Intebe yeguraga, bombi bafata iy’ubuhungiro.

Urebye urutonde rw’abaminisitiri ba Guverinoma ya mbere yagiyeho nyuma ya Jenoside, nta n’umwe ukiri muri Guverinoma. Bake baracyari mu mirimo ya leta, abandi bari mu kiruhuko cy’izabukuru kubera imyaka bagezeho; bahunze igihugu kubera amakosa bakoze abandi bakomeje imirimo mu rwego rw’abikorera.

Perezida Bizimungu (ibumoso) aganira na Visi Perezida Gen Maj Paul Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza