Abanyamakuru b’abanyaburayi: Abamalayika ba sekibi

Yanditswe na Gatete Nyiringabo Ruhumuliza
Kuya 26 Kamena 2019 saa 12:06
Yasuwe :
0 0

Iyo abanyamakuru b’abanyaburayi cyangwa imiryango itegamiye kuri Leta y’i Burayi yigiza nkana ngo iraharanira uburenganzira bwa muntu muri Afurika, baba babikora mu nyungu za nde?

Ni impuhwe se baba bagirira miliyoni z’impfubyi n’abapfakazi ba Jenoside yakorewe Abatutsi, bishwe na Guverinoma yatewe inkunga n’abafaransa isi yose irebera?

Baba bashaka se gutabara amagana y’abimukira b’abanyafurika barohama mu Nyanja abanyaburayi bigaramiye? Tuvuge ko se baba bari kwifatanya n’imiryango y’abanya-Libye yabuze amajyo nyuma y’uko igihugu cyabo gishwanyagujwe na NATO, cyangwa baba bagirira impuhwe abana bo muri Syria basigaye mu matongo nyuma y’ibitero bya drones bagabweho n’ingabo za Amerika zikabicirira ababyeyi?

Twavuga iki se ku bana b’abanyeshuri muri Yemen, basenyewe ishuri bikozwe n’ibisasu by’abanyamerika n’abanya-Arabia Saoudite? Cyangwa se, baba barengera isi ngo itarimburwa n’ibisambo by’abakapitaliste ari nabyo byigaruriye itangazamakuru bakorera, bibaha inkunga ngo byicare ku butegetsi?

Mu by’ukuri baba bavugira nde? Reka turebe, ubundi ni ibihe bibazo bikomeye byibasiye uburenganzira bwa muntu muri iki gihe? Muri Libya, Syria, Yemen, Palestine, Iraq n’ahandi hirya no hino ku Isi: Ugereranyije n’ubwicanyi bwo muri Afurika, ukareba umubare w’abo bigiraho ingaruka itandukaniro ni rinini. Ni nde ubyihishe inyuma?

Ibihe byose byabayeho kuva kera. Ingabo z’abanyaburayi zagiye zitsemba ibihumbi by’imiryango y’abantu itandukanye ari nako batsemba ikinyabuzima kindi cyose bahasanze.

Uwageragezaga kubitambika baricaga. Urugero ni Ken Saro Wiwa, impirimbanyi yo muri Nigeria yashatse kurwanya ihumanywa ry’imigezi yo mu gace ka Niger Delta ryakorwaga na za sosiyete z’Abanyamerika n’Abongereza zicukura peteroli, uwo yarishwe.

Thomas Sankara, umunya-Burkina Faso wamaganye inkunga y’abanyaburayi mu ivangururaruhu ryaberaga muri Afurika y’Epfo, n’ibikorwa by’Abafaransa byo gushaka gutegeka ibihugu byo mu Burengerazuba bwa Afurika, na we yarishwe.

Mu kwikuraho ibi byose, ibihugu by’i Burayi byashatse inzobere mu kubeshya no kuyobya rubanda. Nibwo batangiye gushinga no guha akazi abanyamakuru, imiryango itegamiye kuri Leta, abavugabutumwa n’abandi ngo bavuge kuri demokarasi, uburenganzira bwa muntu n’Imana. Tekereza ibifi binini (sharks) byohereje intumwa zo guteza imbere imibereho myiza y’amafi mato!

Ikinyoma cyabo cya mbere ngo ni uko Afurika ibeshejweho n’imfashanyo z’abanyaburayi, nyamara siko biri. Inkunga itangwa igize 2 % by’umusaruro mbumbe wa Afurika.

Ku rundi ruhande, inyigo yakozwe na Ndikumana, Boyce na Saloum Ndiaye (2014) yerekanye ko kugeza mu 2010, amafaranga yasahurwaga muri Afurika yerekeza mu Burayi yanganaga na 39.5 % by’umusaruro mbumbe wa Afurika.

Gusahura umutungo ujyanwa mu kindi gihugu, bituma amafaranga atangwa ku zindi sirivisi zigamije imibereho myiza nko mu burezi, ubuzima aba make bityo bikadindiza iterambere. Ibyo nibyo bigaruka bigaha agaciro imiryango itegamiye kuri Leta n’abanyamakuru, ibyo Perezida Kagame yise ‘Kwishyira hejuru kw’abanyaburayi kudafite ishingiro’.

Intego zabo ni kirimbuzi, bazi neza ukuri ariko bahitamo kubeshya. Ku bushake bwabo, bavuga nabi amazina y’abayobozi ba Afurika, bakongera imibare y’inkunga, batesha agaciro iterambere bagahisha amafaranga yanyerejwe yoherezwa iwabo. Abanzi ba Afurika batwereka ko ari ibitangaza, intwari za Afurika bakazihindura ubusa.

Ni muri ubwo buryo, amabandi n’abicanyi bavuye mu Rwanda bahabwa inturo mu Burayi, abaharanira ukwishyira ukizana bakimwa intaho.

Mu kiganiro giherutse gukorwa ubwo habaga inama ku bufatanye bwa Afurika n’u Burayi, umunyamakuru umwe ukorera televiziyo yo mu Bufaransa yashatse kubaza Perezida Paul Kagame ku bimuvugwaho ku bijyanye n’uburenganzira bwa muntu.

Yagombaga kumuha igisubizo gitomoye kandi niko yabigenje koko uretse ko yaje kubabazwa no kubogama no kutitegura k’uwo munyamakurukazi, waje kumuca mu ijambo agatangira kuzamura ibinyoma byubatswe mu Burayi, bigaragaza Paul Kagame nk’umuntu mubi, umuyobozi ufunga abatavuga rumwe na we, abanyamakuru, akanica abanyapolitiki batavuga rumwe na we.

Nzagaruka kuri icyo kiganiro mu nyandiko itaha. Reka hano turebe kuri ibyo birego:
Icya mbere: Kwica abatavuga rumwe na Leta: Umunyarwanda uheruka kwicwa bikavugwa cyane ni Karegeya wari warahungiye muri Afurika y’Epfo. Karegeya ntabwo yari umunyapolitiki, yari umuterabwoba. Uyu mugabo wahoze akuriye ubutasi, yagiye yumvikana ku binyamakuru mpuzamahanga avuga ko azahirika Guverinoma y’u Rwanda yifashishije ubugizi bwa nabi.

Karegeya ni we wateguye ibitero bitandukanye mu mujyi wa Kigali hagati ya 2009 na 2014, bigahitana abantu 17 b’inzirakarengane abandi 407 bagakomereka.

Yari Osama Bin Laden wacu ariko itangazamakuru ryo mu Bwongereza, ryamugereranyije na Jamal Khashoggi w’u Rwanda, umuturage, umunyamakuru w’umunyamahoro wiciwe muri Ambasade ya Arabie Saoudite muri Turikiya.

Karegeya akimara gupfira muri Afurika y’Epfo, ibinyamakuru by’i Burayi byahise bitunga intoki u Rwanda nyamara n’ubu uwihishe inyuma y’urupfu rwe ntaramenyekana.

Gufunga abatavuga rumwe na Leta: Iyo hagize uvuga nabi Perezida Kagame na Guverinoma ye, batangira kumwita Mahtma Ghandi. Ibyaha yakoze byaba ibya kera n’iby’ubu ndetse n’ibizaza bimirwa no gutumirwa ubutitsa n’abanyamakuru ndetse n’inzobere zo mu nguni zose z’isi.

Umuntu ntiyabura no kugaruka ku nshuro nyinshi bagiye bibasira Perezida ku giti cye, ngo bagumure rubanda.

Mu Rwanda ntabwo ivanguramoko iryo ari ryo ryose ryemewe, kimwe no mu Budage, Israel n’ahandi bagize amateka ya Jenoside.

Nyamara ntabwo ariko biri muri Amerika n’ahandi aho ivanguramoko n’akato byiganje ndetse bikoreshwa nk’iturufu ya politiki. Icyo ni ikindi kintu tutumva kimwe nabo.

Nka bya bindi byo mu bucuruzi bwa mpandeshatu bw’abacakara, abanyarwanda b’abanyabyaha bahunze amategeko bagaruka mu ishusho y’abanyapolitiki bakwiriye icyubahiro, keretse iyo basanze igiciro basaba kiri hejuru ku buryo tutakibona kubera ko dufite ibindi bituraje ishinga nk’ubumwe, ubwiyunge, umutekano n’iterambere ryihuse.

Ubusanzwe, umunyapolitiki wese ufite ibyo abazwa n’inkiko araburanishwa, byamuhama agakatirwa agafungwa. Ariko inshuro nyinshi Perezida yagiye aha imbabazi abantu nk’abo nkuko anabigenza ku bakoze Jenoside.

Hari abandi banyapolitiki bakoze ibyaha mu Rwanda, bagaburiwe bwa bwirasi no kwishyira hejuru by’abanyaburayi. Bari gufatanya gucura imigambi yabo mibi ngo buri umwe abashe kugera ku ntego ze.

Umuntu arahuruduka akiyita umunyapolitiki kugira ngo acike ubutabera, abandi bakamusamira hejuru, bakamutera inkunga ngo abone uko atesha agaciro abayobozi b’u Rwanda.

Urugero ni iyi nkuru yasohotse muri New York Post (https://nypost.com/2019/06/14/woman-hand-licking-former-un-security-council-president-raped-me-twice/) ivuga uburyo umukobwa w’umunyarwandakazi wimenyerezaga yafashwe ku ngufu na Eugene Gasana wahoze ahagarariye u Rwanda muri Loni.

Ba bandi baharanira uburenganzira bw’abagore ndetse n’imiryango iharanira uburenganzira bwa muntu i Burayi bararuciye bararumira. Kubera iki? Kuko Gasana yamaze gutangaza ko atavuga rumwe na Kagame. Mu maso yabo, ni umutagatifu!

Iyi nkuru yasohotse bwa mbere mu rurimi rw’Icyongereza muri The New Times.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza