Twitter yongereye umubare w’inyuguti zigize ubutumwa

Yanditswe na Herve Ugirumukunda
Kuya 8 Ugushyingo 2017 saa 08:08
Yasuwe : 8
0 0

Urubuga nkoranyambaga rwa Twitter, rwongereye umubare w’inyuguti zigize ubutumwa umuntu yemerewe gutanga inshuro imwe ‘tweet’, ziva ku 140 zigera kuri 280.

Twitter yari imaze iminsi ikora igerageza ku kongera izi nyuguti, dore ko bamwe mu bayikoresha bari baramaze kubyemererwa.

Ejo hashize yavuze ko abantu bose bayikoresha bazajya bemererwa kwandika interuro ndende uretse abakoresha Igishinwa, Ikiyapani n’Igikoreya kubera ko izo ndimi zo muri Aziya zizwiho gukoresha inyuguti nke mu gutanga igitekerezo. Nko mu kiyapani impuzandengo y’igitekerezo gishyitse igizwe n’inyuguti 15 gusa.

Mu itangazo uru rubuga rwashyize ahagaragara, rwavuze ko kongera umubare w’inyuguti bizafasha abarukoresha kwisanzura bihagije.

Ryagize riti “Umwanya munini utuma abantu barushaho gutangaza ibitekerezo byabo muri ‘tweet’ imwe bagashobora kuvuga ibyo bashaka, banatanga ubutumwa mu buryo bwihuse kurusha ubwari busanzweho.”

Ikinyamakuru The Verge ariko gisanga kongera umubare w’inyuguti bizahindura isura ya Twitter isanzwe izwiho ubutumwa bugufi kandi bwihuse, kuko ubu abantu bazajya bandika byinshi bakanabishyira mu bika.

Ubusanzwe bavugaga amagambo make bagakangurira abantu gusura urundi rubuga rwa internet ruriho ibyo bavugaga.

Mu gihe cy’igerageza, abantu 5% bonyine nibo batanze ubutumwa bufite inyuguti zirenga 140 zari zisanzweho naho 2% batanze ubutumwa burenze 190.

Abakoresha Twitter bakiriye uyu mwanzuro mu buryo butandukanye, benshi bemeza ko abanyapolitiki n’ibindi byamamare bagiye kurushaho kurondogora.

Batanze urugero kuri Perezida wa Leta Zunze Ubumwe za Amerika, Donald Trump, ukunda gukoresha uru rubuga avuga imyumvire ye kuri politiki y’igihugu ayoboye n’amahanga, bemeza ko noneho yashyizwe igorora.

Abakoresha uru rubuga baracyasaba ubuyobozi bwarwo kwemererwa gukosora amakosa y’imyandikire igihe ubutumwa bwamaze gutangazwa kuko ubu igishoboka ari ugusiba ubutumwa bwose.


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mazimpaka 08/11/2017 saa 11:27

twitter ni nziza pe

2
kalisa 08/11/2017 saa 01:54

Ibi turabyishimiye cyane. Hari igihe nandikaga ubutumwa ntibusobanuke neza kubera words limit.

Kwamamaza