Umwihariko mu gitaramo cyahariwe Minani Rwema wakunzwe hambere

Yanditswe na Munyengabe Murungi Sabin
Kuya 23 Kanama 2018 saa 05:03
Yasuwe : 3
0 0

Minani Rwema Célestin ufite amateka yihariye mu muziki yateguriwe igitaramo cyo kwibuka ibigwi bye, abo babyirukanye bazagaruka ku butwari bwamuranze akiri ku Isi byose bigaherekezwa no gusubira mu ndirimbo ze.

Igitaramo cyo kwibuka umuririmbyi Minani Rwema cyateguwe n’urubyiruko rwiga mu mahanga ruhuriye mu muryango ‘Critical Thinking For Peace’ ari na wo wateguye icyitwa ‘Umurage Nyawo Concert’ cyibukiwemo Kamaliza tariki ya 12 Kanama 2017.

Iki gitaramo cyo kwibuka ubuzima n’amateka yaranze Minani Rwema giteganyijwe kuri uyu wa Gatanu tariki ya 24 Kanama 2018, kuri Kigali Serena Hotel. Abahanzi biganjemo ababyirukanye na Minani Rwema ndetse n’abakibyiruka bigiye ku muziki we.

Twahirwa Aimable uri mu bagize uruhare rukomeye mu gutegura iki gitaramo, yabwiye IGIHE ko kuba cyarateguwe byamukoze ku mutima ndetse bishimisha mu buryo bwihariye umugore wa Minani Rwema.

Yagize ati “Nkanjye nk’umuntu uzi neza Minani Rwema n’uburyo yabaniye benshi, ubuzima bwe n’uko yitangiye igihugu akiriho, nanjye byankoze ku mutima. Ni ibintu bikomeye cyane ariko by’akarusho byashimishije umugore we cyane.”

Yongeyeho ati “Jacky[umugore wa Minani] yarambwiye ngo arumva aribwo agiye guherekeza neza Minani, ngo yahoze abyifuza ariko kuba bigiye gukorwa tukamwibuka tunaririmba ibihangano bye ni ikintu kizamuruhura mu buryo bukomeye.”

Muri iki gitaramo “Umurage Nyawo-Minani Rwema Concert” hazagaragaramo abahanzi batandukanye uhereye ku bahoze mu itorero Indahemuka, Patrick Gihana, Knowless Butera, Tonzi, Mani Martin, Jules Sentore, Mariya Yohani, Masamba Intore, Andy Bumuntu, Cyusa, Audia Intore, Muyango, Ange na Pamela, n’abandi.

Umuriza Jacqueline, umugore wa Minani Rwema ngo yumva aribwo agiye guherekeza mu cyubahiro umugabo we

Kizatangira saa kumi n’ebyiri z’umugoroba, kwinjira bizaba ari amafaranga 20,000 muri VVIP , mu myanya y’icyubahiro isanzwe[VIP] ni ibihumbi icumi (10,000 Rwf), ahandi ni ibihumbi bitanu (5,000 Rwf).

Minani Rwema yakunzwe mu ndirimbo zizwi cyane nka ‘Malayika’, ‘Rubera’, ‘Urabeho’, ’Mukiza’. Yavutse mu mwaka wa 1975 mu Gatumba mu gihugu cy’u Burundi, ari naho yakuriye akahigira amashuri abanza n’ayisumbuye mbere yo gutahuka mu Rwanda nyuma ya Jenoside yakorewe Abatutsi mu 1994.

Uyu muhanzi washimishiga benshi mu bihangano bye, yitabye Imana ku wa 30 Werurwe 2008, mu gihe yari n’umunyeshuri muri Kaminuza yigenga ya Kigali (ULK). Akaba yarigeze no kuba umuyobozi wungirije Komine ya Kanombe ushinzwe urubyiruko, siporo n’imyidagaduro.

Umuhanzi Minani Rwema yasize umugore we, Minani Umuliza Jackie bashakanye mu 2003 bakabyarana abana babiri ari bo Agahozo Aniela na Rwema Kevin.


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza