Kamichi yabyukije umuziki nyuma y’imyaka itanu acecetse

Yanditswe na Munyengabe Murungi Sabin
Kuya 23 Kanama 2018 saa 11:14
Yasuwe : 3
0 0

Bagabo Adolphe[Kamichi], yashyize hanze indirimbo nshya yise ‘My Karabo’ nyuma y’igihe kigera ku myaka itanu cyari gishize acecetse ndetse adakora mu nganzo.

Uyu muhanzi uba muri Leta Zunze Ubumwe za Amerika kuva muri Mata 2014, yari amaze imyaka itanu adashyira hanze indirimbo. Yaherukaga gukora muzika mu mwaka wa 2013 ari nabwo bwa nyuma yagaragaje imbaraga mu byerekeye umuziki mu Rwanda, na nyuma yo kugera muri Amerika nta ndirimbo yigeze yumvikanamo.

Kamichi wakundaga kwiyita ‘Cardinal’ akiba mu Rwanda, yamamaye mu ndirimbo ‘‘Aho Ruzingiye’’, ‘‘Barandahiye’’, ‘‘Byacitse’’, ‘‘Kabimye’’, ‘‘Ifirimbi ya Nyuma’’, ‘‘Imitoma Irenze’’ n’izindi zakunzwe hambere.

Ubu, yashyize hanze indirimbo nshya yise ‘My Karabo’ y’urukundo. Yavuze ko yamaze iyi myaka yose ataririmba kugira ngo abanze yisuzume neza amenye umurongo nyawo agomba guha umuziki we.

Yagize ati “Nari nkeneye gukora umuziki nk’uko nawukoraga nkiwutangira. Ntangira kuririmba narabikundaga, nashakaga kumva ijwi ryanjye nkifuza no kumenya ibyo abantu bakunda. Nakoze umuziki nshaka kumva ko nshoboye kuririmba ko ndi umuhanzi, narabikoze hazamo amafaranga, haza n’itangazamakuru rirankurikirana n’abafana bariyongera; aho kugira ngo nkore umuziki nk’uko nawukoraga byatumye abantu bankunda ahubwo nkawukoraga nk’uko abantu babinsaba n’uko itangazamakuru ribinsaba, ntabwo nari njyewe muri make.”

Yongeyeho ati “Nari nkeneye guhumeka bundi bushya, nari nkeneye kongera umuriro muri batiri[battery], mu magambo make nari nkeneye kongera kumva nuzuye. Ubu nditeguye, iyi ni indirimbo imwe ndangije hagiye kuza n’izindi.”

Kamichi uri mu bahanzi bakunzwe bikomeye muri Afrobeat mu Rwanda, yabwiye IGIHE ko iyi ndirimbo ‘My Karabo’ ari imwe muri nyinshi azagenda ashyira hanze uko iminsi ihita indi ikaza, ni imwe mu zizaba zibumbiye kuri album ‘Itangiriro igice cya Kabiri’ ateganya gushyira hanze.

Ati “Umuziki ni kimwe mu bintu bikomeye nkunda mu buzima bwanjye, abafana banjye barabizi ko nkunda umuziki usibye ko inshuti zanjye zizi ko nkunda itangazamakuru kurusha umuziki. Ibyiza cyane nibwo bigiye kuza kandi bizagenda biba byiza kurushaho.”

Kamichi agiye gusohora album yise 'Itangiriro igice cya 2'

Kamichi umaze igihe gito asezeranye imbere y’amategeko, yijeje abafana be ko agiye kongera umuvuduko w’uburyo asohoramo indirimbo kugira ngo bakomeze kuryoherwa n’ibihangano bye.

Kamichi yari amaze imyaka itanu ataririmba

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
jeff 23/08/2018 saa 11:34

Uyu muhanzi ni umuhanga cyane. Kamichi courage kabisa turagukunda sanaaaaaa.

Kwamamaza