Inkuru zongeye gucicikana zibika umuririmbyi Stromae

Yanditswe na Munyengabe Murungi Sabin
Kuya 23 Kanama 2018 saa 09:34
Yasuwe : 4
0 0

Inkuru z’ibihuha zivuga urupfu rw’umuririmbyi Stromae zongeye gukaza umurego muri iki cyumweru, abatangaje ibi bashimangiraga ko yazize impanuka y’imodoka.

Stromae yaherukaga kuvugwa mu nkuru zimubika muri Nzeri 2016, icyo gihe ibinyamakuru bitabarika byanditse bishimangira ko “yapfiriye i New York”. Ibi byari ikinyoma cyashingiwe ku gitabo cyanditswe n’Umubiligi Thierry Coljon akacyita ‘Stromae est mort à New York’.

Ikinyamakuru 20 Minutes cyatangaje ko inkuru zimaze iminsi mike zisakazwa ku mbuga nkoranyambaga zivuga ko umuhanzi Stromae yitabye Imana zasohowe bwa mbere n’imbuga za internet zanditswe mu Burusiya.

Icyabitangaje bwa mbere ndetse inkuru yacyo ikagera kure cyitwa ‘Archive.org”, ibyo cyavuze byageze henshi kubera uburyo cyasabaga buri wese kubanza kuyisangiza inshuti[Share] kuri Facebook mbere y’uko wabasha kuyisoma. Muri iyi nkuru, uwayanditse yavuze ko ‘Stromae yazize impanuka y’imodoka ku myaka 34’.

Umuvugizi wa Stromae ntacyo yigeze avuga kuri izi nkuru ndetse n’uyu muhanzi ubwe yakomeje guceceka yanga kugira icyo abivugaho ari nako byagenze muri Nzeri 2016 ubwo igitabo ‘Stromae est mort à New York’ cyatangiye kuvugwaho bigatuma ibinyamakuru bimwe byibeshya bikandika ko yapfuye koko.

Ibinyamakuru byasakaje inkuru ya Stromae ni nabyo byanditse nyinshi zavugaga impfu z’ibyamamare mu bihe bitandukanye ariko nyuma bigatahurwa ko ari ibihuha.

Mu mwaka ushize ni nabyo byasohoye inkuru yavugaga ko ‘Samy Naceri yitabye Imana’ ndetse bigera kure cyane; byabaye ngombwa ko Naceri asohora itangazo ryamagana aya makuru.

Stromae ntaragira icyo avuga ku makuru amaze iminsi amuvugwaho

Stromae amaze igihe atagaragara mu ruhame ndetse nta ndirimbo ye bwite arasohora mu mezi umunani ashize avuze ko yasubukuye muzika. Aheruka kugaragara muri Mutarama 2018 nyuma y’aho muri Mata 2018 yagaragaye mu birori byo kwerekana imideli ye byabereye i Paris.

Ibi bimaze iminsi bicicikana, mu gihe Stromae n’umugore we Coralie Barbier bitegura kwibaruka umwana wa mbere; kuba atagaragara benshi babihuza no kuba ahugiye cyane kwita ku mugore we ukuriwe.

Stromae n'umugore we baritegura kwibaruka umwana wa mbere
Stromae ubwo yari mu bikorwa byo kwerekana imideli ye i Paris

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza