Abaramyi Dena Mwana na Maggie Blanchard bategerejwe mu gitaramo cyo guhembuka i Kigali

Yanditswe na Ishimwe Israel
Kuya 26 Kamena 2018 saa 10:21
Yasuwe : 2
0 0

Iminsi irabarirwa ku ntoki ngo abaramyi bazwi ku ruhando mpuzamahanga barimo Umunya- Haïti, Maggie Blanchard na Dena Mwana ukomoka muri Repubulika Iharanira Demokarasi ya Congo bitabire igitaramo i Kigali kiri mu mujyo w’ibitegurwa n’Umurundi, Bigirimana Fortran.

Iki gitaramo cyiswe “Fragrance of Worship” kigiye kubera ku butaka bw’u Rwanda ku nshuro ya kabiri, giteganyijwe ku wa 1 Nyakanga 2018, muri Christian Life Assembly (CLA) i Nyarutarama.

Aba bahanzi bategerejwe mu Mujyi wa Kigali muri iki cyumweru batanze ubutumwa bw’integuza ku bakunzi babo n’ab’ibihangano banditse mbere y’iminsi mike ngo bahataramire.

Maggie Blanchard utuye mu Mujyi wa Québec muri Canada yatangaje ko yiteguye gutaramira mu Rwanda.

Yagize ati ‘‘Nje kubatangariza igitaramo cya ‘Fragrance of Worship’ kizabera iwanyu i Kigali ku nshuro ya kabiri aho nzaba ndi kumwe na Bigirimana Fortran. Nimuze twishimane kuko hari ibihe byiza mu Mana yacu ikwiye icyubahiro n’ikuzo. Tuzabonana.’’

Maggie Blanchard azwi mu ndirimbo zamamaye bihugu bivuga Igifaransa zirimo ‘‘Personne ne peut t’aimer’’, ‘‘Libéré’’, ‘‘Il agira’’ n’izindi. Yaherukaga mu Rwanda mu Ukwakira 2017, ubwo yari yatumiwe mu gitaramo muri Zion Temple mu Gatenga.

Mwanakitata Denise Muwayi [Dena Mwana] na we watumiwe muri iki gitaramo yamenyekanye mu ndirimbo zirimo ‘‘Si la mer se déchaîne’’, ‘‘Nzambe Monene’’, ‘‘Lift Your Name’’ n’izindi. Yashimangiye ko azataramira i Kigali mu mpera z’icyumweru.

Yagize ati ‘‘Ndabatumiye muzaze muri benshi mu gitaramo Fragrance of Worship. Muzaze duhimbaze Imana turi kumwe, turabategereje. Muhabwe umugisha.”

Iki gitaramo kizatangira saa kumi z’umugoroba ku wa 1 Nyakanga 2018, cyatumiwemo abahanzi bo mu Rwanda barimo Gaby Kamanzi na Serge Iyamuremye n’Umuyobozi wa Zion Temple, Apôtre Dr Paul Gitwaza uzabwiriza ijambo ry’Imana.

Muri Fragrance of Worship, Bigirimana uheruka guhabwa Impamyabumenyi mu bijyanye na Bibiliya yakuye mu Ishuri Impact Ecole Biblique Internationale (IEBI), azanamurika album ye ya gatatu na DVD y’amashusho ya “Ntaco Nzaba” yafatiwe i Kigali mu 2016.

Dena Mwana mu baramyi bazitabira Fragrance of Worship

Kwinjira muri iki gitaramo ni amafaranga 5000 Frw mu myanya isanzwe n’ibihumbi 10 Frw mu y’icyubahiro (ugahabwa na CD cyangwa DVD ya Bigirimana Fortran).

Amatike yo kucyinjiramo yageze ku isoko ndetse aboneka ku rubuga rwa internet www.esangeticketing.com aho agurwa hifashishijwe Airtel Money, Tigo Cash na Mobile Money.

Umuramyi Bigirimana ukomoka mu Burundi ari mu byishimo by’impamyabumenyi mu bya Bibiliya aheruka guhabwa n'ishuri ryo mu Bufaransa
Umuyobozi w'Itorero Zion Temple Celebration Centre ku Isi, Apôtre Dr Paul Gitwaza, yatumiwe muri iki gitaramo
Amatike y'igitaramo Fragrance of Worship yageze ku isoko
Iki gitaramo cyanatumiwemo Intumwa Dr Paul Gitwaza

Maggie Blanchard yahamije ko azaba ari muri Fragrance Of Worship 2018

Dena Mwana mu bahanzi batumiwe muri Fragrance of Worship 2018


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza