Abatavuga rumwe na Leta bongeye gusaba ko Perezida Zuma yeguzwa

Yanditswe na Mukaneza M.Ange
Kuya 3 Gashyantare 2018 saa 09:15
Yasuwe : 5
0 0

Mu gihe habura iminsi mike ngo Perezida w’Afurika y’Epfo, Jacob Zuma ageze ijambo ku baturage, abatavuga rumwe na leta bongeye kuzamura amajwi basaba ko yeguzwa.

Biteganyijwe ko tariki ya 8 Gashyantare 2018 aribwo Zuma azageza ijambo ku baturage ba Afurika y’Epfo.

Mu nama bakoze ku wa Gatanu, abatavuga rumwe na Leta batangaje ko badateganya kwanga kwitabira uyu muhango Zuma azavugiramo ijambo, ahubwo bavuga ko bari kwiga uburyo bazahuriza hamwe imbaraga mu gushaka inzira yo kumukura ku butegetsi.

Nk’uko Radio Mpuzamahanga y’Abafaransa (RFI) yabitangaje,Godrich Gardee wo mu ishyaka riharanira ubwigenge mu bijyanye n’ubukungu, yatangaje ko igihugu kidashobora kugira intambwe gitera, igihe gifite Perezida umeze nka Zuma.

Yagize ati “Ntabwo mushobora kugira Perezida uzamara amezi atandatu yitaba Komisiyo ishinzwe iperereza kuri ruswa. Ntabwo mushobora kugira Perezida ugomba kujyanwa imbere y’ubutabera kubera ibyaha 783 bijyanye n’uburiganya, cyangwa Perezida uri gusabirwa kwegura.”

Biteganyijwe ko ku wa 22 Gashyantare aribwo Inteko Ishinga Amategeko izasuzuma ibijyanye n’ubusabe bw’abifuza ko Zuma yeguzwa, bunashyigikiwe na bamwe mu bo mu ishyaka rye rya ANC.

Ku rundi ruhande ariko abamushyigikiye bishyize hamwe batangira kugaragaza ko adakwiye gukorwaho, ahubwo bakwiye kumureka agashyira mu bikorwa ibyo yasezeranyije abaturage byose.

Umwe muri bo witwa Thandiswa Yasph yagaragaje ko kweguza Zuma ari umugambi wacuzwe n’abazungu, agahamya ko nta muntu ufite uburenganzira bwo gukuraho Perezida watowe binyuze mu mucyo n’abaturage biganjemo abirabura.

Iri huriro rishinja Umuyobozi mushya wa ANC, Cyril Ramaphosa, kuba yarabaye bihemu, rirateganya kwigaragambya ryamagana gahunda zose zifitanye isano no kweguza Zuma.

Perezida w’Afurika y’Epfo, Jacob Zuma yongeye gusabwa kwegura

[email protected]


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza