Akarere ka Huye keretse urubyiruko umuti w’ubusambo n’amakimbirane ashingiye ku mutungo

Yanditswe na Prudence Kwizera
Kuya 19 Mutarama 2018 saa 07:38
Yasuwe : 3
0 0

Umuyobozi w’Akarere ka Huye, Kayiranga Muzuka Eugène, yabwiye urubyiruko ko nirwitabira umurimo rugakora ibikorwa bibyara inyungu bizarufasha kwinjiza amafaranga no kwitunga bikabarinda ubusambo n’amakimbirane ashingiye ku mutungo.

Hirya no hino mu turere hakunze kumvikana abasore cyangwa inkumi bafatirwa mu bikorwa by’ubujura cyangwa bakoze amahano yo kwica ababyeyi babo bapfa imitungo kandi abo babyeyi ari bo bayishatse.

Mu karere ka Huye ho hakunze kugaragara amabandi atobora inzu nijoro, ahanini ugasanga abafatirwa mu bikorwa bibi nk’ibyo ari abakiri urubyiruko.

Umuyobzi w’Akarere ka Huye, Kayiranga Muzuka Eugène, ubwo yitabiraga igikorwa cyo gutanga inyemezabumenyi ku banyeshuri 65 basoje amasomo y’imyuga mu kigo Karibu Peace Center (KPC) giherereye ku Karubanda mu Karere ka Huye, yakebuye abafite imyitwarire mibi.

Mu bahawe inyemezabumenyi harimo abize amasomo ajyanye no gutanga serivise z’ubukerarugendo, kwakira abashyitsi, gutunganya ibyumba byo mu mahoteli n’iyindi ndetse hahuguwe n’abakozi bo mu rugo bagera kuri 12 bigishwa akazi kabo gakorwa neza birinda amakosa n’amakimbirane yo mu ngo.

Nyuma yo kugaragarizwa ko abize muri icyo kigo bose babonye akazi abandi bihangira imirimo, Umuyobozi w’Akarere ka Huye, Kayiranga Muzuka Eugène, yasabye ubuyobozi bwacyo kwagura ibikorwa no kubimenyekanisha kurushaho kugira ngo abakigana babe benshi.

Muzuka yaboneyeho umwanya wo guhanura abakiri bato, abagira inama yo gukunda umurimo no kuwukora kuko ari byo bizabarinda ubusambo, ingeso mbi n’amakimbirane ashingiye ku mutungo.

Ati “Kwitabira umurimo no kuwukunda ni byo bizagabanya ya makimbirane kuko bimwe mu byo abantu bapfa ni ibishingiye ku mibereho (…) kuko uramutse ukora hari byinshi wageraho utararikiye iby’abandi. Turacyafite abantu batabitekerezaho, usanga hari abirirwa badakora kandi bakabaye baza kwiga hano bakagira ubumenyi bibafasha kugira icyo bakora kibaha amafaranga”.

Ubuyobozi bw’ikigo Karibu Peace Center (KPC) bwavuze ko abahize bose mu gihe cy’amezi umunani bafashijwe gushaka akazi, abandi bahakura ubumenyi bajya kwihangira imirimo.

Frank Ngiruwonsanga wahize avuga ko nyuma y’amezi umunani yahavomye ubumenyi kuri ubu akaba akora muri hoteli mu mujyi wa Kigali, kandi akora neza akazi ashinzwe.

Ati “Bitewe n’ubumenyi nakuye muri Karibu Peace Center nigiriye icyizere njya gushaka akazi i Kigali muri Hotel barakampa, ubu nkora mu bijyanye no gutegura no kwakira abantu kandi mbikora neza kandi hari aho bingejeje”.

Muri iki kigo hagaragamo na bamwe mu barangije kwiga Kaminuza banze kujya kwicara mu rugo no kuba abashomeri bahitamo gushaka umwuga bakora wabateza imbere.

Umuyobozi wa KPC, Philippe Gatete, avuga ko yashinze icyo kigo mu Rwanda agamije gufasha akarere ka Huye mu bukerarugendo, amahugurwa n’iterambere, bityo ahitamo gufasha ababyifuza kugira ngo nabo bagire aho bigeza.

Umuyobozi w'Akarere ka Huye, Kayiranga Muzuka Eugene, atanga inyemezabumenyi kuri umwe mu bize mu Kigo Karibu Peace Center
Abarangije mu kigo KPC bavuga ko ubumenyi bahavanye bwatangiye kubabyarira inyungu kuko abenshi bafite akazi abandi bihangiye imirimo
Umuyobozi wa KPC, Philippe Gatete, atanga inyemezabumenyi kuri umwe mu basore bahize

[email protected]


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Anastase 19/01/2018 saa 04:32

Ubu butumwa ni ingenzi. Urubyiruko rwitabire kubyaza umusaruro amahirwe ahari. Bitabire kwihugura ku ubumenyangiro kuko ni inzira yo kubona akazi cg gutera imbere muri rusange

Kwamamaza