Tom Close yasohoye amashusho y’indirimbo yakoreye i Dar Es Salaam (Video)

Yanditswe na IGIHE
Kuya 18 Mutarama 2018 saa 08:36
Yasuwe : 3
2 1

Muyombo Thomas [Tom Close] yashyize ahagaragara indirimbo itangiza imishinga afite mu 2018, amashusho yayo yakozweho na Hanscana wo muri Tanzania ukomeje kwigaragaza muri Afurika.

Iyi ndirimbo yise "Naba Umuyonga" igaruka ku butumwa bw’urukundo hagati y’abantu babiri bakundana bafite ubwoba bwo gutandukana. Isohotse ikurikira izindi yakoze mu mwaka ushize zirimo "Uramutse Wemeye", "Ferrari" n’iyitwa "Igikomere" yakoranye na Bull Dogg.

Mu kiganiro yaherukaga kugirana na IGIHE ku byerekeranye n’umushinga w’iyi ndirimbo nshya yasohoye, Tom Close yavuze ko yahisemo Hanscana kuko ari umwe mu bamaze kubaka izina mu gukora amashusho y’indirimbo muri Tanzania ndetse akaba akataje gutera intambwe imuganisha ku gukorana n’abahanzi b’ibyamamare muri Afurika.

Tom Close yagize ati "Ni indirimbo ikubiyemo ubutumwa bw’urukundo hagati y’abantu babiri batinya gutandukana. Nahisemo Hanscana kuko ari umwe mu ba Director bari gukora neza ku Mugabane wa Afurika muri iyi minsi. Mufata nk’umuhanga, ashyira imbaraga mu kazi akora."

Hanskana amaze gukorana n’abahanzi bakomeye mu Karere barimo Diamond mu ndirimbo "Nasema Nawe", Ali Kiba mu yitwa "Single", Vanessa Mdee na Roberto mu yitwa "Vitamin U", Joh Makini, Christian Bella, Khaligraph Jones, Eddy Kenzo, yaherukaga gukorana na Knowless mu yitwa "Uzagaruke".

Tom Close avuga ko nyuma y’iyi ndirimbo yiteguye gusohora ibindi bihangano byinshi mu 2018 bizajya bijyana n’amashusho mu kurushaho kwegera abakunzi be no gukora birushijeho.

Tom Close ni umwe mu bahanzi bakomeye mu Rwanda bashyize itafari ku muziki ugezweho muri iki gihe, ni we wabimburiye abandi yegukana igihembo gikuru cya Primus Guma Guma Superstar. Afatanya akazi ko guhanga n’ak’ubuvuzi.


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
iradukunda orivier 19/01/2018 saa 05:45

couraje umusa nukuri turabakunda cyane tomu wagirango iyo ndirimo nijye yayiririmbiye

2
kaka 18/01/2018 saa 11:41

wow!!!congz tom ndamwemera pe!!

Kwamamaza