Internet ya 4G yagejejwe mu turere twose tw’igihugu

Yanditswe na IGIHE
Kuya 3 Mutarama 2018 saa 09:22
Yasuwe : 4
0 0

Gukoresha internet icikagurika bigiye kuba amateka mu Rwanda nyuma y’aho internet ya 4G imaze gukwirakwizwa mu turere twose tw’igihugu.

Ikigo gikwirakwiza 4G mu Rwanda, KT Rwanda Network (KTRN) cyatangaje ko umwaka wa 2017 warangiye 95 % by’igihugu bigezemo internet ya 4G, bivuye ku 8 % mu 2014 ndetse na 17 % mu 2015.

Mu mpera z’icyumweru gishize ubwo KTRN yishimiraga icyo gikorwa, John Ntwali Ndorimana, umuyobozi muri icyo kigo, yavuze ko kuba 4G yageze mu bice byose by’igihugu bigiye kugira uruhare mu kwihutisha iterambere.

Yagize ati “Kuba 4G iboneka hose bizateza imbere ubucuruzi n’ibindi bikorwa, byongere n’umuvuduko w’iterambere ry’ubukungu n’imibereho myiza.”

The NewTimes yatangaje ko Ndorimana yasabye abanyarwanda kubyaza umusaruro ayo mahirwe, bakora ibibateza imbere.

Ati “Ubu abafite ubucuruzi bashobora kugenzura uko buhagaze bifashishije telefone zikoresha 4G. Turasaba abanyarwanda bose cyane cyane abakora ubucuruzi gukoresha aya mahirwe kugira ngo bateze imbere ubucuruzi bwabo bifashishije ikoranabuhanga ryihuse.”

Umwaka ushize KTRN yibanze ku gushyira 4G ku biro by’imirenge, ibigo nderabuzima, amabanki, ahari imidugudu y’icyitegererezo, ahatuwe cyane no mu duce tw’ubucuruzi.

Ndorimana avuga ko kongera aho 4G igera bizajyana n’udushya mu mitangire ya serivisi, nk’aho hashobora gukorwa porogaramu ifasha umukiliya wa banki kubaza umujyanama we amakuru ajyanye n’inguzanyo barebana, gufasha umurwayi kubonana na muganga batari kumwe n’ibindi.

Internet ya 4G yatangijwe mu Rwanda mu Ugushyingo 2014. Kugeza muri Werurwe umwaka ushize, abanyarwanda bangana na 62 % nibo babashaga kugerwaho n’iyo internet.

Uturere twose twagejejwemo Internet ya 4G

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
HATANGIMANA Dieudonne 07/01/2018 saa 01:41

Abagikoresha 3G muhindure nicyo nakangurira abataragera kuri 4G, gusa nanjye ndimo arko vuba aha ndahindura da,

Nyabihu network iracyari nkeya ariko...gusa iyo 4G muvuga umuvuduko ni mucye cyane mukosore kbsa

2
divin 04/01/2018 saa 06:37

kuhagera hose nibyiza, ariko nibagabanye ibiciro. ikindi kuki internet ya 3G igenda gake ubundi ikabura? njye mbona baduha 2G bakabeshya ko ari 3G. 3G bayigabanyije imbaraga yakabaye ifite kugirango bamamaze 4G. nibaza niba ibi bintu bigira ababikurikirana? banyamakuru mutubarize abo bireba

3
divin 04/01/2018 saa 06:37

kuhagera hose nibyiza, ariko nibagabanye ibiciro. ikindi kuki internet ya 3G igenda gake ubundi ikabura? njye mbona baduha 2G bakabeshya ko ari 3G. 3G bayigabanyije imbaraga yakabaye ifite kugirango bamamaze 4G. nibaza niba ibi bintu bigira ababikurikirana? banyamakuru mutubarize abo bireba

Kwamamaza