Ikoranabuhanga rishya aho ubasha gupima ingano y’intungamubiri wariye, gutuma ama-robots n’ibindi

Yanditswe na Zigiranyirazo Bajecteur
Kuya 21 Ugushyingo 2017 saa 08:50
Yasuwe : 6
0 0

Muri iki gihe isi iri mu mpinduramatwara ya kane mu by’inganda aho ikoranabuhanga rikataje mu nzego zose haba mu buzima, ubwikorezi, ubumenyi bw’ikirere ndetse n’ikoreshwa ry’imashini zikora ibyo abantu bari basanzwe bakora bibatwaye imbaraga nyinshi.

Mu imurika ngarukamwaka ry’ibijyanye n’ikoranabuhanga mu gihugu cy’u Buyapani aho uyu mwaka ryabereye mu mujyi wa Chiba, hamuritswe udushya turi mu igeragezwa dushobora guhindura ubuzima bwa muntu nituramuka dutangiye gukoreshwa nkuko CNN yabitangaje.

1. Agakoresho gafasha mu kumenya umuvuduko mu gihe cyo gukanjakanja

Aka gakoresho kazwi ku izina rya “bitescan” kambarwa ku gutwi hanyuma kagafasha umuntu mu gihe ari gukanjakanja ku buryo amenya inshuro abikoze ku munota no kuba yamenya umuvuduko ari gukoresha.

Aka gakoresho kazajya ku isoko umwaka utaha. Uruganda Sharp rwagakoze rwatangaje ko intego yarwo ari ugufasha abantu kugira akamenyero ko gukanjakanja mu buryo bunoze.

2. Uburyo bwo gukoresha icyumviro cy’ugutwi bwizewe kurusha igikumwe

Birashoboka cyane ko wajyaga wibwira ko uburyo bwo gukoresha igikumwe wenda ufungura telefone yawe n’ahandi bwizewe, nyamara abahanga bemeza ko ubu buryo bushobora kwinjirirwa no kwiganwa n’abantu bazobereye mu by’ubujura bw’ikoranabuhanga.

Ubu buryo bushya bwakorewe igeragezwa mu Buyapani bwo rero ngo burizewe cyane kuko hazajya hifashishwa porogaramu yitwa EGRO ishyirwa muri telefone.

Iyo umaze kuyishyira muri telefone, ufata telefone yawe ukayishyira ku gutwi, ugutwi ukakuringaniza rwagati mu kirahure cyawe cya telefone (touch screen). Kubera EGRO, hari ijwi ihita isohora bitewe n’uko yumvise ugutwi kwawe kandi nta muntu ijya isohorera ijwi risa n’iry’undi.

Bivuze ko ubwo buryo aribwo ukoresha ufunga telefone yawe niyo yakwibwa nta wabasha kuyifungura.

Bifata isegonda rimwe gusa kugira ngo EGRO ibe yamaze kugenzura ugutwi kwawe.

3. Imashini (robots) zizajya zivana ibintu hamwe zikabijyana ahandi ntawe uziherekeje

Izi mashini zikoze mu buryo uko zitambuka ziba zikurura amakuru y’aho ziri noneho zikabasha guhitamo icyerecyezo zifashishije amakarita y’indangacyerecyezo ari mu mutwe wazo.

Ushinzwe ayo ma-robots icyo akora ni uguhitamo aho iyo mashini iraza kugeza ibyo ayihaye, ubundi yo yishakira inzira kugeza ubwo igeze aho wahisemo.

Iyo mashini kandi ishobora no kugera aho igahindura inzira igaca mu yindi ariko ikaza kugera aho bayibwiye. Ifite utwumvirizo umubiri wose ku buryo ishobora kumenya niba igiye guhura n’umuntu cyangwa ikindi kintu.

Igenda metero 1.8 ku isegonda kandi ishobora kugenda yikoreye ibilo bigera ku 130, icyakora uko uyiha ibilo byinshi niko umuvuduko igenderaho ugabanyuka.

Izi mashini uretse kuba wazikoresha mu buzima busanzwe zishobora gukora no mu nganda. Hari urugero rw’iyaherezaga abantu ibyo kunywa ku kibuga cy’indege muri Koreya y’Epfo.

4. Akuma kazajya gafasha mu kugenzura indyo ijyanye n’ibyo umuntu akeneye

Ni ikoranabuhanga rizajya ryifashishwa mu gupima ibyo kurya umuntu agiye gufungura kugira ngo amenye neza ko agiye gufata ibihwanye n’ibyo umubiri we ukeneye.

Aka kuma kazajya kamenyesha ugakoresheje niba ingano y’intungamubiri ziri butangwe n’ibyo agiye kurya ihwanye n’ibyo umubiri we ukeneye. Iyi izajya inafasha cyane ku bantu bafata ibyo kurya bategetswe na muganga kugira ngo bakomeze gusigasira ubusugire bw’imibiri yabo.

Aka kuma bizajya bigatwara iminota ibiri cyangwa itatu kangenzura amafunguro hanyuma ikoranabuhanga ryako rihite rigaragaza intungamubiri ziri mubyo ugiye gufungura.

5. Ikoranabuhanga rizajya rifasha umwana kugubwa neza mu cyimbo cy’umukozi wo mu rugo

Akamashini kazwi ku izina rya Cocotto kazajya gafasha mu kurera abana neza aho gafite ubushobozi bwo kumenya ko afite ibitotsi kakamusaba kuryama, yanakanguka kakamubaza niba yasinziriye neza. Si ibyo gusa kuko aka kamashini kazajya kabasha kuba kamumanurira uturirimbo tumufasha kugubwa neza.

6. Inyamaswa ifasha abantu kugubwa neza

Hariho abantu benshi bikundira utunyamaswa tubana n’abantu mu rugo nk’imbwa cyangwa injangwe. Mu ikoranabuhanga ryamurikiwe muri Chiba haje kumurikwa akamashini kameze nk’injangwe itagira umutwe kitwa Qbo kashimishije benshi kakaba karakozwe n’uruganda rwa Yukai rwo mu Buyapani.

Umuntu akoze kuri ako kantu, kazunguza umurizo wako gahoro gahoro, kakazafasha abantu kunezerwa nkuko inyamaswa zisanzwe zabigenzaga.

Aka kanyamaswa kazashyirwa bwa mbere ku isoko muri Kamena umwaka utaha, byitezwe ko kamwe kazagura amadolari ijana, karimo na bateri ishobora kumara amasaha umunani itarashiramo umuriro.


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
nonox 21/11/2017 saa 03:12

Isi igeze Ku ndunduro kbs. Twaririmbaga chaumage tutarabona. Ariko ntacyo itera amapfam itera n’aho bahahira

Kwamamaza