Urugendo rwa Uwimpaye watangije ubucuruzi bwo kuri internet bwinjiza miliyoni 2 Frw ku munsi

Yanditswe na Tombola Felicie
Kuya 12 Werurwe 2018 saa 12:27
Yasuwe :
5 3

Uwimpaye Yvette ni rwiyemezamirimo ukiri muto aho ku myaka 29 yashinze urubuga Murukali Market Smart rukorerwaho ubucuruzi rumaze gutera intambwe ikomeye nk’uko yabisobanuye.

Ni ubucuruzi abantu batiyumvishaga ko bushoboka kuko n’abo yabibwiraga baramusekaga bakamwemeza ko mu Rwanda ibyo bitakunda igihe cyose atari isoko ry’abazungu agiye gutangiza.

Mu kiganiro Uwimpaye yagiranye na IGIHE ku rugendo rwo kuba rwiyemezamirimo ukora ubucuruzi bwo kuri internet, yatangaje ko yagize icyo gitekerezo ubwo yari yarabyaye, akabura aho atumiza ibyo akeneye atavuye mu rugo kandi atabasha gusiga uruhinja ngo ajye ku isoko.

Nk’umuntu wize ibaruramari, yakuze yumva ko azakora ubucuruzi ariko ntiyari azi ubwo ari bwo.

Ati “ Igitekerezo nyamukuru cyo gutangiza urubuga rucururiza kuri internet cyanjemo igihe nari narabyaye muri 2015, nta mukozi mfite nirirwa mu rugo njyenyine, umugabo ari buze kurya saa sita, noneho ngasanga ntari busige uruhinja ngo njye ku isoko kuko no mu maduka hari ubwo usanga badafite ibyo washakaga.”

Nk’umuntu ukunda gukora ubushakashatsi ngo yagiye kuri internet akajya yandika muri ’google’ ikintu ashaka kugura ariko akabura urubuga na rumwe yahahiraho mu Rwanda. N’izo yabonye zacuruzaga imyenda n’inkweto, nta biribwa, ibinyobwa cyangwa ibindi bikoresho by’isuku bikenerwa mu rugo buri kanya byari biriho.

Ati “Aho niho nahereye nibaza ngo ubuse abandi bahura n’iki kibazo babigenza bate, natekereje ku basaza baba badafite imbaraga, nibaza k’umuntu waba arwaye adafite uwo atuma kandi hari ibyo akeneye, nibaza ku banyamahanga bashobora kuza mu Rwanda batazi naho amaguriro aherereye.”

“Nahise nshaka icyo nakora kuko ibyari bimbayeho byo kubura ibyo nari nkeneye kandi mfite amafaranga yo kuba nahaha mfite na internet yo kuba nabitumiza, numva ko nta kabuza biba no ku bandi.”

Agitangira yacuruzaga ibihumbi 15 ku kwezi

Uwimpaye avuga ko yakoze urubuga www.murukali.com agashyiraho amoko y’ibicuruzwa, utanze komande akajya kumuhahira ku maguriro kuko nta bubiko yagiraga, agatega akabimushyira aho bumvikanye.

Mu mezi atanu abanza abantu baramuhamagaraga bakamuseka kuko yabaga yarashyizeho nimero z’ubucuruzi bwe, abandi bakamubwira ko abeshya bitabaho gutumiza ibintu utagiye ku isoko.

Ati “ Hari abazaga aho nakoreraga mu mujyi, bagasanga imbere yanjye hari mudasobwa gusa bagacika intege bakibaza ubwoko bw’ibicuruzwa biri ku rubuga rwacu kuri internet ukuntu ari bwinshi ariko baza aho ndi bakabibura , nahitaga mbasobanurira ko twebwe tutari iduka ahubwo duhahira abadutumye tukanabibashyira.”

Ashobora gucuruza miliyoni ebyiri ku munsi

Uwimpaye watangiye ari umuntu umwe rukumbi avuga ko inzozi zatangiye gusohora nubwo urugendo rukiri rurerure. Ubu afite abakozi 12 harimo barindwi bahoraho n’abanyabiraka. Ikigo cye kimaze kugira imodoka ifasha mu kwegerereza abakiliya ibyo babahahiye, igikorwa kimara iminota iri hagati ya 30 n’amasaha atatu.

Ati “Iyo byagenze neza ducuruza miliyoni ebyiri z’amafaranga y’u Rwanda ku munsi kuko hari n’ibigo bigenda bikora komande tukabigemurira .”

“ Dukomeje urugendo rwo kwiyubaka inzozi zanjye ni uko umuntu ufite internet yayibyaza umusaruro akumva ko ibiciro byo guhahira kuri internet ntaho bitaniye n’iby’abandi kandi adatakaje umwanya cyangwa ngo abo atumye bamushyire ibyo atashakaga.”

BK yamuhaye inguzanyo kuko ibikorwa bye bitanga icyizere

Muri ba rwiyemezamirimo bakiri bato kandi batanga icyizere baherutse kugurizwa hafi miliyoni 60 na BK bakazazishyura badatanze inyungu, Umushinga wa Uwimpaye wahawe miliyoni esheshatu ibintu avuga ko byamwongere ingufu mu kazi ke.

Ati “ Ibyo nkora nabishobojwe n’uko ndi umuntu ushakashaka kuri internet ndeba n’uburyo abandi babibyaza umusaruro, ushobora kubijyamo utabikunda bazajya batanga komande ukayibona hashize icyumweru.Umuntu akwiriye kujya mu bintu yiyumvamo kandi akunze.”

Uwimpaye avuga ko nk’umuntu watangije amafaranga atageze kuri miliyoni imwe ubu ashimishwa no kuba igishoro kigeze muri miliyoni 25 abariyemo imodoka n’ibicuruzwa baba bafite mu bubiko kugira ngo badatinza abakiriya

Uwimpaye avuga ko urugendo mu bikorwa bye rukiri rurerure
Uwimpaye Yvette watangije ubucuruzi bwo kuri internet bwibanda ku biribwa ,ibinyobwa n'ibikoresho byo mu rugo
Abakira abakiliya ba murukali.com
Abakozi b'ikigo Murukali Market Smart
BK yamuhaye inguzanyo ya miliyoni esheshatu azishyura adatanzeho inyungu
Mu byo abantu batumiza murukali harimo na divayi
Bimwe mu bicuruzwa byo murukali
Abagore bakunda gutumiza cyane ibiribwa ku rubuga murukali

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza