Umusaruro w’Ihuriro ry’Abagore bo mu Nteko mu kubaka ihame ry’uburinganire

Yanditswe na Jean Pierre Tuyisenge
Kuya 13 Werurwe 2018 saa 01:18
Yasuwe :
3 3

U Rwanda rwashyize imbaraga mu guhangana n’amakimbirane yo mu ngo byagaragaye ko agira ingaruka ku mubare munini w’abenegihugu bitewe no gushyamirana hagati y’abashakanye bituma bicana, abandi bakiyahura.

Ikibazo cy’amakimbirane yo mu miryango cyahagurukije inzego zirimo iza leta n’izigenga bitewe n’uburemere bwacyo n’ingaruka gifite ku gihugu n’abagituye.

Muri uru rugamba, Ihuriro ry’Abanyarwandakazi bari mu Nteko Ishinga Amategeko - FFRP (Forum des Femmes Rwandaises Parlementaires), nk’imwe mu nkingi mwikorezi y’uburinganire n’ubwuzuzanye mu gihugu, yatanzemo umusanzu utajegajega.

FFRP yatangiye ahagana mu 1996, irimo abagore 12 hagamijwe kureba uburyo ihame ry’uburinganire ryakwimakazwa mu muryango Nyarwanda; yari igamije kandi guharanira ko abagore n’abagabo bagira uburenganzira bungana imbere y’amategeko ibinyujije mu buvugizi n’ubukangurambaga.

Mu kiganiro IGIHE yagiranye na Depite Mutesi Anita uhagarariye FFRP, yavuze ko bishimira intambwe imaze guterwa ku birebana no kurwanya amakimbirane no kuzuzanya hagati y’abagore n’abagabo n’uburyo umugore yibona mu muryango.

Yagize ati “Ikintu twishimira cyane kuva aho Ihuriro ryagiriyeho ni impinduka mu rwego rw’amategeko aho abagore bari mu Ihuriro FFRP bagize uruhare runini mu gukora ubuvugizi aho babona hari imbogamizi ahanini wasangaga ziterwa no kuzitirwa n’amategeko, ayo rero yarahindutse.”

Yakomeje avuga ko wasangaga hari ubusumbane bukabije hagati y’abagabo n’abagore, amategeko akaba hari ibyo yashyize ku murongo.

Depite Mutesi Anita uhagarariye FFRP yavuze ko bishimira intambwe imaze guterwa ku birebana no kurwanya amakimbirane yo mu miryango

Amwe mu mategeko FFRP yatumye ajyaho harimo, iryafashije iby’izungura aho abagore nabo basigaye bafite uburenganzira ku butaka bw’ababyeyi nka basaza babo bitandukanye na mbere.

Binyuze mu itegeko N° 22/99 ryo ku wa 12/11/1999 ryuzuza igitabo cya mbere cy’urwunge rw’Amategeko Mbonezamubano, igice cya gatanu cyerekeye imicungire y’umutungo w’abashyingiranywe, impano n’izungura. Gishyiraho uburinganire mu izungura, uburyo izungura rikorwa n’igihe izungura rikorwa.

Iri huriro kandi ryasabye ishyirwaho ry’itegeko n° 003/2016 ryo ku wa 30/03/2016 rishyiraho rikanagena imitunganyirize y’ubwishingizi bw’ibigenerwa umugore uri mu kiruhuko cyo kubyara, ryasohotwe mu Igazeti ya Leta n° Special yo ku wa 20/04/2016.

Iri tegeko rigena ikiruhuko gihabwa abagore babyaye kimara amezi atatu, rikanagena n’ibindi bakomeza kugenerwa birimo umushahara wabo n’ibindi baba basanzwe bahabwa bari mu kazi.

Depite Mutesi yavuze ko hanakozwe ubukangurambaga bwaharuriye inzira yo gutinyura abakobwa ku bijyanye no gukora imirimo yafatwaga nk’iyahariwe basaza babo.

Kugeza ubu abana b’abakobwa bagera kuri 44% bitabiriye amashuri y’imyuga n’ubumenyingiro ndetse Ikigo cy’Igihugu gishinzwe guteza imbere Amasomo y’Imyuga n’Ubumenyingiro (WDA) gitangaza ko mu banyeshuri 97,633 biga mu mashuri y’imyuga n’ubumenyingiro, muri bo 45,738 ari abakobwa.

Abakobwa baritinyutse mu bijyanye no guhaha ubumenyi bw'imyuga n'ubumenyingiro

Hari kandi n’itegeko ryashyizweho riharanira ko uburinganire bw’abagore n’abagabo bwinjizwa mu ngengo y’imari; Mutesi ati “ Kugeza ubu nta muntu ujya unyura hano mu nteko Ishinga Amategeko azanye Ingengo y’Imari atagaragaje ihame ry’uburinganire.”

Yavuze ko kugeza ubu umugore n’umugabo basigaye bareshya, haba mu mashuri, mu itangwa ry’akazi, mu mikino no mu zindi serivisi zose zigamije iterambere rusange.

Hari abumvise ihame ry’uburinganire nabi FFRP ibagarura mu nzira

Nubwo hakozwe ubukangurambaga bugamije kumvikanisha ihame ry’uburinganire n’ubwuzuzanye mu miryango, hari abatararyakiriye neza; binashibukamo amakimbirane yahitanye ubuzima bwa benshi.

Imibare ya Polisi y’Igihugu yo mu Ukwakira 2017 igaragaza ko hagaragaye ibirego 546 by’abashakanye barwanye mu ngo, ubwicanyi hagati y’abashakanye mu mezi icyenda ya mbere ya 2017 bwabaye 69. Naho urugomo rwavuyemo impfu rwabaye ni 25, muri aba abagabo ni 10 abagore bapfuye ni 15.

Gusa FFRP ifatanyije n’izindi nzego ziharanira iterambere ry’umuryango zirimo Minisiteri y’Uburinganire n’Iterambere ry’Umuryango (MIGEPROF) n’Ibiro bishinzwe gukurikirana Iyubahirizwa ry’Uburinganire bw’Abagabo n’Abagore (GMO) itangaza ko bajya mu turere hirya no hino bagamije gushishikariza abagabo n’abagore kwiyumva nk’umuntu umwe.

Yavuze ko muri Werurwe, ukwezi kwahariwe kuzirikana umugore, bari mu bikorwa byinshi by’ubukangurambaga bugamije kumvikanisha iryo hame. Mu rwego rwo gushyigikira umugore, FFRP muri uku kwezi iri gutanga ibikoresho mu mashuri abanza n’ayisumbuye bizifashishwa n’abana b’abakobwa mu cyumba bita icy’abakobwa.

FFRP yatangiye ahagana mu 1996 ikorana n’abagera kuri 12. Ubu ifite abanyamuryango bageze kuri 92 barimo abadepite n’abasenateri.

U Rwanda rukataje mu guha umugore ijambo mu nzego zifata ibyemezo, mu Nteko Ishinga Amategeko bagera kuri 63.75%
Abanyarwandakazi bari mu nteko ubwo bari mu matora yabaye mu 2018
Mutesi Anitha amaze imyaka isaga ibiriri ayobora FFRP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza