Kigali Marriott Hotel yatangiye gukusanya inkunga yo gufasha abana barererwa muri SOS

Yanditswe na Ishimwe Israel
Kuya 3 Ukuboza 2019 saa 02:38
Yasuwe :
0 0

Kigali Marriott Hotel yatangiye gukusanya inkunga yo gufasha abana batishoboye barerwa n’Umuryango wa SOS Rwanda mu rwego rwo kwifatanya nabo mu minsi mikuru isoza umwaka wa 2019.

Ubu bukangurambaga bwiswe “Road for Awareness’’ bugiye kubera mu Mujyi wa Kigali ku nshuro ya kabiri buteganyijwe ku wa Gatandatu, tariki ya 7 Ukuboza 2019.

Buzasozwa n’urugendo ruzatangira saa Cyenda kugeza nimugoroba, aho abazarwitabira bazava kuri Kigali Marriott Hotel- SP Station- Ecole Belge- Sky Hotel-Gitega-Kigali Conference and Exhibition Village [Camp Kigali], banyure Serena Hotel basoreze kuri Kigali Marriott.

Umuyobozi ushinzwe Imicungire y’Abakozi muri Kigali Marriott Hotel, Nicole Ingabire Munyangabe, yavuze ko gukusanya inkunga bigamije gufasha abana barererwa muri SOS kubona ubwisungane mu kwivuza n’uburezi bukwiye.

Muri uyu mwaka inkunga yo gufasha abana barererwa muri SOS Children’s Villages Rwanda izakusanywa binyuze mu kugurisha imipira yo kwambara ku 5000 Frw. Iboneka kuri Kigali Marriott Hotel.

Yagize ati “Usibye igikorwa cyo kugurisha imipira twatangiye, tunakira impano z’ubwoko bwose. Ibyo tuzaha abana barererwa muri SOS ntibyakemura ibibazo bafite ariko tugomba kugira icyo dukora.’’

Yavuze ko iki gikorwa cyateguwe nk’uburyo bwo kwishimana n’abana mu bihe by’iminsi mikuru isoza umwaka.

Ati “Noheli ni umunsi mukuru w’abana, iyo ubasuye ubashyiriye akantu gato babifata nk’ibidasanzwe. Iki gikorwa ni impano ku bana kuko gishobora kuzamura imibereho yabo mu gihe kirambye.’’

Ingabire yasobanuye ko imigendekere myiza yacyo izaha abandi urugero bakarushaho gukangukira ibikorwa byo gufasha abatishoboye mu gihugu.

Usibye ibijyanye no gukusanya inkunga, abakozi ba Kigali Marriott Hotel na bo batangiye kugura imipira yo kwambara nk’uburyo bwo gutanga umusanzu wabo mu kwita ku batagira kivurira.

Kigali Marriott Hotel yateguye iki gikorwa ngarukamwaka ifatanyije na Legacy Clinics, Rotary Club na Rotaract KIE.

Ku rwego rw’Isi, ubu bukangurambaga bwatangiye mu 2008 mu gihe mu Rwanda bwatangiye mu 2016 ubwo iyi hoteli yahatangizaga ibikorwa byayo.

Mu Ugushyingo 2018, abakozi ba Kigali Marriott Hotel bahaye abana bo muri SOS asaga miliyoni 1 Frw n’impano y’Umunsi Mukuru wa Noheli. Ni igikorwa cyakurikiye icyo gukusanya inkunga ya miliyoni 10 Frw yo gufasha ibikorwa bya SOS Rwanda.

Marriott International ikorera mu bihugu bitandukanye ku Isi, uretse gutanga serivisi nka hoteli inafatanya n’abaturage mu iterambere ry’igihugu bakoreramo binyuze mu gufasha abatishoboye, aho isanzwe inafasha SOS mu bihugu byose ikoreramo.

Mu 1979 nibwo SOS yatangije ibikorwa byayo mu Rwanda, byahuriranye n’uko uyu mwaka wari warahariwe umwana ku Isi. Umudugudu wa mbere wa SOS Children’s Villages Rwanda washinzwe ku Kacyiru mu Karere ka Gasabo. Ifite n’ibigo i Gicumbi, Nyamagabe na Kayonza.

Ibikorwa bya SOS byibanda ku kwita ku bana batagira kivurira no gufasha imiryango itishoboye kugira ngo ibiteho nibura umwana akurire mu muryango akunzwe, yubashywe kandi afite uburenganzira bwose.

SOS yakira abana badafite umuntu n’umwe wo kubitaho kuva k’ukivuka kugeza acutse, akaba umusore cyangwa inkumi akaremerwa agatangira ubuzima bwo kwigira. Imaze gufasha abana basaga 17,353 kandi hafi ya bose bize neza kugera barangije Icyiciro cya kabiri cya Kaminuza, imyuga n’ibindi.

Umuyobozi ushinzwe Abakozi muri Kigali Marriott Hotel, Nicole Ingabire Munyangabe, yavuze ko inkunga izakusanywa izakoreshwa mu kwita ku burezi n'ubuvuzi bw'abana barererwa muri SOS
Igikorwa cya "Road for Awareness" giteganyijwe kubera mu Mujyi wa Kigali ku wa 7 Ukuboza 2019

-  Amafoto yaranze ‘Road for Awareness’ mu 2018

Abakozi ba Kigali Marriott Hotel bafatanyije urugendo n'abana barererwa muri SOS
Iki gikorwa cy’urukundo cyanyujijwe muri gahunda ya ‘Road for Awareness’ cyabaye ku wa 11 Kamena 2018
Muri iki gikorwa hatangirwamo ubutumwa butandukanye buganisha ku gufata neza abana no kwita ku batagira kivurira
Umuyobozi Mukuru wa Kigali Marriott Hotel, Rex A.G. Nijhof (iburyo) yifatanyije n'abakozi n'abana bafashwa na SOS Rwanda muri 'Road for Awareness'
Abakozi n'abayobozi ba Kigali Marriott Hotel bifatanyije n'abana bo muri SOS mu rugendo rwazengurutse mu Mujyi wa Kigali rwagati
Umuyobozi Mukuru wa Kigali Marriott Hotel, Rex A.G. Nijhof na Gakwaya John Ushinzwe Ubuyobozi muri SOS Rwanda batanze ubutumwa mu gusoza icyo gikorwa
Nyuma yo kugurisha imipira yo kwambara hagamijwe gufasha abana batishoboye, hakozwe na siporo rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza