AHO TWAHURIYE, ICYO NAMUKUNDIYE

Yanditswe na
Kuya 11 Gashyantare 2016 saa 01:19
Yasuwe :
0 0

Hashize imyaka itanu n’igice nkundana n’umusore witwa Rukundo twifuza kuzarushingana. Ni umusore mwiza pe! Ndamukunda kandi nawe arankunda. Niwe muntu tuvugana nkumva ndishimye, nkumva nisanzuye mubwira ibyo nshaka byose.

Urukundo rwacu rwatangiye nta numwe uzi ko bizabaho, kuko twahuriye aho tutakekaga ko twahurira. Twembi ntitwari tuziranye, twamenyaniye bwa mbere mu bukwe; njye nari nakenyereye umugore we yambariye umugabo.
We yari afitanye isano rya kure n’umugabo wari wakoze ubukwe, njyewe nziranye n’umugore ariko bitari cyane.

Muri ubwo bukwe Rukundo yari ari kumwe n’abasore biganye, baziranye cyane. Abambariye abageni twari twicaye dusa nk’abateganye n’abo basore. Mu bukwe bwose baraturebaga tukabona bongoreranye amagambo, bagaturikira rimwe bagaseka. Twabonaga ari nk’ibisanzwe, bimwe by’abasore babona umukobwa bakamuvugaho.

Njye sinari narigeze ngira umwanya wo kujya mu by’urukundo ngo ngire umusore dukundana birambye. Nabonaga batwitayeho cyane, ariko kuri njye numvaga nta mwanya munini nabiha, kuko kuri njye byari ibisanzwe.
Kamaliza, Kamali, …ni wowe bari kuvugaho – Niko umwe mu bakobwa twari kumwe yanyongoreye, ambwira ko hari umwe muri abo bahungu wari wakomeje kunyitegerezaho cyane.

Nyuma y’ubukwe, abahungu baje kuza kutwegera batuganiriza abenshi batwaka amanomero ya telefone nubwo abenshi muri twe b’abakobwa ntazo twari dufite kuko ari bwo twari tukirangiza amashuri yisumbuye.

Twe twumvaga birangiriye aho, kandi koko urebye byasaga nk’ibirangiriye aho.
Ubwo bukwe bwari bwari bwampinduriye ibitekerezo byanjye byose; nabonye ko nkwiye kwifata nkazakomeza gutegereza umusore umwe rukumbi tuzabana, kuko byari ibirori byiza buri wese yakwifuza kuzagira.
Nyuma y’ubwo bukwe Rukundo ntitwongeye kubonana, kandi nta n’uburyo byashobokaga. Gusa twaje kongera guhurira muri Kaminuza y’i Butare, ariko njye nari naramwibagiwe.

Tukihagera, twari twahangayikishijwe no kubona aho tuba. Nta bantu benshi nari mpazi. Nkigera mu kigo nabonye umusore aza ansekera nk’unzi, anyegera asa n’ushaka kumpobera. Nabonaga anzi, ariko nanga kumwereka ko ntamumenye, nanjye mumwenyurira nk’umuzi.

We yari yabibonye ko ntamwibuka, ahita atangira anyibwira, anyibutsa aho twahuriye. Yahise ambwira ko we yari amaze umwaka yiga muri iyi Kaminuza, amfasha kumenyera, antembereza ibice byose biyigize; by’umwihariko amfasha kubona icumbi ryabonaga umugabo rigasiba undi.
Yakomeje kunyitaho, agahora amvugisha, ambaza uko merewe kugeza menyereye ubuzima bwose bwa Kaminuza.

Imyaka ine namaze muri Kaminuza twari tubanye nka mushiki na musaza, ariko we yifuza ko twakundana bikava mu gufashanya bya hafi bikaba urukundo nyarwo. Njyewe ariko nari naranze kubimwizeza, ngifite amasomo mpugiyemo n’ibindi bibazo by’umuryango kuko ni njye mfura yagombaga kwita ku bavandimwe.
Uretse ibyo, hari abasore benshi bambwiraga ko bankunda, ku buryo numvaga nkeneye igihe gihagije cyo guhitamo uwuhuje n’ibyifuzo byanjye ntahubutse. Numvaga ngomba kwitonda cyane mu kuzashaka uwo tuzabana, natwe tugakora ubukwe bugatahwa n’imiryango twizihiwe.

Umunsi umwe naje gufatwa n’uburwayi butunguranye. Nisanga ndyamye mu bitaro bya Kabgayi, ntazi uko nahagejejwe. Icyo gihe, nari ndwaye ndembye, ndwaye tifoyide. Sinabashaga kugena uko ubuzima mbutwara, umuryango n’inshuti nibo bashoboraga kundamira. Aha niho nongeye guhurira na Rukundo, amba hafi yongera kunyereka urukundo.

Nta munsi atageraga aho ndwariye, akankoraho no mu gihe nari muri koma ntumva. Ngikanguka, uretse ababyeyi, niwe muntu nabonye wambaye hafi, ahangayikiye ubuzima bwanjye. Byankoze ku mutima, binyereka ko inshuti nyanshuti uyibona mu byago koko.
Nta kindi numvaga nashoboraga kumwitura, kitari ukumubwira ko ‘mukunda’.
Kuva ubwo twatangiye kujya tuvugana cyane, numva ndushijeho kumwisanzuraho ntangira kumva uburyohe bwo kugira uwo wabitsa amabanga yawe yose, mukizerana ukumva yaguhora iruhande.

Rukundo natangiye kujya mwita ‘Cheri’, kuri WhatsApp yanjye nkamushyiraho kuri profile numva ntewe ishema no kuba nkundana nawe. Twatangiye gusohokana, tukava i Kigali tukajya i Gisenyi, tugatemberana muri Parike y’Akagera.

Imiryango yacu ntitwiriwe tuyibwira ko dukundana, kuko nyir’amaso yerekwa bike ibindi akirebera. Twizera ko umunsi tuzabana tuzagira urugo rwiza, kandi si kera, ni vuba tuzabatumira. Twizeye kuzabyarana hungu na kobwa, tukonsa, tukarera, tugakuza.

Imana izakomeze ihe umugisha urukundo rwacu, kuko nasanze yarankundaga bihebuje.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .