U Rwanda rwahawe miliyoni 184.1$ yo kubaka umuhanda Kagitumba-Kayonza-Rusumo

Yanditswe na Kanamugire Emmanuel
Kuya 5 Kanama 2016 saa 11:01
Yasuwe :
0 0

Banki Nyafurika Itsura Amajyambere, AFDB, Leta y’u Buyapani n’Umuryango w’Ubumwe bw’Ibihugu by’u Burayi byahaye u Rwanda miliyoni 184.1 z’amadolari ya Amerika agenewe kubaka umuhanda Kagitumba-Kayonza-Rusumo.

Muri aya mafaranga harimo inguzanyo ya Banki Nyafurika Itsura Amajyambere,AFDB ingana na miliyoni 94 z’amadolari, inguzanyo ya miliyoni 68.4 yatanzwe n’u Buyapani ibinyujije mu Kigo gifasha mu bijyanye n’iterambere (JICA) mu gihe asigaye ari inkunga yatanzwe n’Umuryango w’Ubumwe bw’Ibihugu by’u Burayi, EU.

Amafaranga yatanzwe na AFDB azishyurwa mu gihe cy’imyaka 40, ku nyungu iciriritse ya 0.75%, mu gihe u Buyapani buzajya buhabwa inyungu ya 0.01%, bose bakazasonera u Rwanda imyaka 10 rutishyura inyungu.

Ubwo hashyirwaga umukono kuri aya masezerano uko ari atatu, kuri uyu wa 13 Nyakanga 2016, Minisitiri w’Imari n’Igenamigambi, Amb. Claver Gatete yavuze ko byari bikenewe cyane ko Kagitumba-Kayonza-Rusumo haba umuhanda mwiza wubatswe mu buryo bugezweho kuko ari ingirakamaro cyane.

Yavuze ko bari bamaze igihe baganira n’abaterankunga kugira ngo bubake uyu muhanda ugira akamaro kanini mu buhahirane n’ibihugu bituranye n’u Rwanda kuko unyuramo ibicuruzwa binyura mu muhora wa ruguru ndetse n’uwo hagati.

Ati "Turabona ko ufite akamaro cyane ku bijyanye n’ubuhahirane ku mpande zombi, mu muhora wa ruguru n’uwo hagati nkuko nabivuze. Turabona rwose bizagira impinduka nini ku banyarwanda no ku bucuruzi muri Rusange.”

Yakomeje avuga ko kandi uyu muhanda numara kuzura uzagira uruhare mu gutuma urwego rw’ubwikorezi rurushaho kunoza imikorere ndetse ikazagira uruhare mu iterambere ry’abagore.

Uhagarariye AFDB mu Rwanda, Negatu Makonnen yavuze ko ari iby’igiciro gikomeye kuba batanze iyi nguzanyo yo kubaka uyu muhanda.

Ati” Uyu niwo mushinga munini uzana impinduka banki iteye inkunga kuva yatangira mu 1974. Turashimira leta y’u Rwanda yagize uruhare mu isinywa ry’aya masezerano. Uyu mushinga ni umusingi mu gushimangira ubuhahirane mu karere”

Ambasaderi w’u Buyapani mu Rwanda, Takayuki Miyashita, yavuze ko iyi ariyo nguzanyo nini bahaye u Rwanda nyuma y’imyaka 27, bakaba babikoze mu rwego rwo gutanga umusanzu mu kwagura ibikorwa remezo byiza igihugu cyatangiye kubaka.

Yakomeje avuga ko kandi u Buyapani bushima cyane ibyagezweho n’u Rwanda kubera ubuyobozi bwiza bwabashije kunga abaturage no gushyiraho uburyo buhamye bwo kurwanya ruswa.

Iyi nguzanyo n’inkunga byatanzwe uyu munsi bizakoreshwa mu kubaka umuhanda ufite kilometero 208 zirimo Kagitumba-Kayonza (km116) na Kayonza-Rusumo (km92).

U Rwanda ruzatanga miliyoni 12.5 z’amadorali azakoreshwa mu gutanga ingurane ku nzu zigera ku bihumbi 565 zizasenywa, bikaba biteganyijwe ko imirimo yo kubaka uyu muhanda izatwara imyaka ibiri n’igice.

Negatu Makonnen, uhagarariye AFDB mu Rwanda na Minisitiri w'Imari n'Igenamigambi, Amb. Claver Gatete bashyira umukono ku masezerano y'inguzanyo
Negatu Makonnen, uhagarariye AFDB mu Rwanda na Minisitiri w’Imari n’Igenamigambi, Amb. Claver Gatete bahererekanya amasezerano nyuma yo kuyashyiraho umukono
Takayuki Miyashita, Ambasaderi w'u Buyapani mu Rwanda na Minisitiri w'Imari n'Igenamigambi, Amb.Claver Gatete
Hiroyuki Takada, Umuyobozi wa JICA mu Rwanda hamwe na Amb. Gatete, Minisitiri w'Imari n'Igenamigambi

Amafoto:Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza