U Buyapani bwaje kuganiriza u Rwanda ibyo kuvugurura Loni hirindwa Jenoside

Yanditswe na Ferdinand Maniraguha
Kuya 17 Gicurasi 2016 saa 07:53
Yasuwe :
0 0

Nyuma y’amajwi menshi yagiye yumvikana ashinja Umuryango w’Abibumbye(ONU) kuba ntacyo wakoze ngo uhagarike Jenoside yakorewe Abatutsi mu Rwanda mu 1994, u Buyapani bwongeye kubishimangira buvuga ko bugiye gushyira imbaraga mu ivugururwa ry’imikorere y’uyu muryango kugira ngo ibyabaye mu Rwanda bitazasubira.

Ubwo kuri uyu wa 16 Gicurasi 2016, yasuraga urwibutso rwa Jenoside rwa Kigali ku Gisozi ndetse akunamira inzirakarengane zisaga ibihumbi 250 zihashyinguye, Intumwa idasanzwe ya Minisitiri w’Intebe w’u Buyapani, Seiichi Kondo yavuze ko ubwo yabwirwaga ibyabaye mu Rwanda yabanje kutabyemera ariko nyuma yo kubyibonera n’amaso yasanze biteye agahinda

Kondo washimye intambwe yatewe n’Abanyarwanda mu bijyanye no kwiyunga, yongeye gushimangira ko ubwo Jenoside yakorwaga Loni ntacyo yakoze ngo iyihagarike, ndetse na nyuma yayo ubwicanyi bukaba bukomeje mu bindi bihugu byo ku isi.

Ati”Ibihugu byinshi bikomeye ku isi biyoborwa n’inyungu zabyo bwite. Tugomba gukora cyane tukavugurura imikorere ya Loni kubera ko Akanama k’Umutekano katakoraga neza mu 1994. Ntitwavuga ko ari umuryango udafite inenge ariko nanone nta yandi mahitamo dufite.”

Kondo yakomeje avuga ko Minisitiri w’u Buyapani, Shinzo Abe yamutumye kuganira na Perezida Paul Kagame ku bijyanye no kuvugurura Loni ku buryo ibihugu bya Afurika byarushaho kwibona mu Kanama k’Umutekano mu rwego rwo gukosora amakosa yakozwe mu gihe cya Jenoside.

Yongeyeho ko kandi igihugu cye gifite inshingano zo kurandura burundu ingengabitekerezo ya Jenoside no guharanira ko itagira ahandi iba ku isi.

Uretse gusura urwibutso no kunamira inzirakarengane za Jenoside yakorewe abatutsi mu 1994 zihashyinguye, Kendo yanasuye inzu yagenewe gutangirwamo amasomo ku mateka mabi ya Jenoside yubatswe ku nkunga y’imiryango n’ibihugu bitandukanye birimo n’u Buyapani.

Kendo ku rwibutso rwa Jenoside ku Gisozi
Yavuze ko u Rwanda n'u Buyapani bikwiye gufatanya mu bukangurambaga Loni ikavugurura
Kendo yabuze amagambo yo gusobanura ibyo yiboneye byabaye mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza