Kwamamaza

Perezida Kagame na Magufuli bafunguye ikiraro gihuza u Rwanda na Tanzania

Yanditswe kuya 6-04-2016 saa 13:01' na Kanamugire na Umucunguzi


Perezida Paul Kagame na John Pombe Magufuli wa Tanzania, bafunguye ku mugaragaro ikiraro cya Rusumo n’ibiro bikoreramo abashinzwe za gasutamo n’abinjira n’abasohoka ku mpande z’ibihugu byombi, igikorwa cyafashwe nk’amateka akomeye hagati y’ubuhahirane bw’ibihugu byombi.

Ni igikorwa cyitabiriwe n’abadamu b’aba bakuru b’ibihugu, Jeannette Kagame na Jannet Magufuli.

Mu ijambo Perezida Magufuli yageje ku bitabiriye iki gikorwa, yabanje kuvuga ko kuva yatorerwa kuyobora Tanzania, uru rukaba ari rwo ruzinduko rwa mbere agiriye mu mahanga, muri gahunda yo kuringaniza amafaranga asohorwa n’igihugu cye,kuko yagiye atumirwa mu bihugu by’i Burayi ntajyeyo, ariko atumiwe mu Rwanda ntiyazuyaza.

Magufuli yashimiye Perezida Kagame yise “inshuti n’umuvandimwe” wamuhaye ikaze mu Rwanda.

Yakomeje agira ati “Nashimishijwe no kuza gufungura ikiraro cya Rusumo. Ikiraro cya Rusumo ni amateka akomeye yubatswe hagati ya Rwanda na Tanzania.”
Magufuli yavuze ko iyi ari inshuro ya gatatu aje mu Rwanda, aho agomba kumara iminsi ibiri akifatanya n’Abanyarwanda mu bikorwa byo kwibuka.

Yakomeje agira ati “Ibihugu byacu bya Afurika turakize, dufite ibintu byose, amabuye y’agaciro n’ibindi. Icyo dukeneye gukora ni ukubyaza umusaruro ibyo Imana yatwihereye. Nidushyira hamwe, nta kabuza tuzagera kuri byinshi.”

Perezida Kagame yavuze ko kuri uyu munsi baje gufungura ikiraro cya Rusumo cyubatswe ku nkunga y’Abayapani binyuze muri JICA, ndetse n’imihanda iruhuriraho na yo yafashijwe na Banki Nyafurika itsura amajyambere, anashimira abo bose babigizemo uruhare ngo bishoboke.

Yakomeje agira ati “Twaboneyeho n’umwanya wo gukorana n’inshuti zacu z’abatanzania duhereye kuri Perezida John Pombe Magufuli. Twishimiye rero no kumwakira hano iwacu. Ntabwo yagarukiye mu bikorwa byo gufungura runo rutindo gusa ahubwo ni n’umushyitsi wacu, uyu munsi n’ejo.”

Iki kiraro gihuza u Rwanda na Tanzania kinyura hejuru y’uruzi rw’Akagera, runyurwaho nibura n’abantu 2000 ku munsi.

Perezida Kagame yakomeje agira ati “Abantu 2000 bambuka hano ku munsi ntabwo ari bake, ariko turashaka ko biyongera, aho kuba ibihumbi bibiri bikube ink’inshuro eshanu babe 10 000. Bizaba bivuze ko gukorana ibyashara bigenda byiyongera kandi byiyongera ku nyungu z’Abanyatanzania n’Abanyarwanda.

Umukuru w’igihugu yavuze ko ibikorwa nk’ibi bishingira ku mubano mwiza abaturage ndetse n’abayobozi b’ibihugu byombi bifuza ko utera imbere kandi bakaza bishyiramo imbaraga, anasaba ko bizakoreshwa neza kugira ngo birambe.

Ikiraro cya Rusumo cyambutswaho toni zigera ku 180 ku munsi.

Mu kwezi kumwe gushize nibwo uyu mupaka watangiye gukora aho abashinzwe za gasutamo n’abashinzwe abinjira n’abasohoka bakorera hamwe, igihe cyakoreshwaga mu kugenzura imodoka kikaba cyaragabanyutse kikava ku isaha kikagera ku minota 20.Kugenzura umuntu byavuye ku minota 10 igera kuri ibiri.

Ikiraro cya Rusumo ku munsi kinyuzwamo imodoka zigera ku 145 zipakira ibicuruzwa zibivana ku cyambu cya Dar Es salaam muri Tanzania, kikaba cyuzuye gitwaye miliyoni 48 z’amadolari ya Amerika.

Perezida Kagame na Perezida Magufuli bafungura ku mugaragaro Ikiraro cya Rusumo n'Ibiro bya Gasutamo bihuriweho n'impande zombi
Ikiraro mpuzamahanga cya Rusumo n'Ibiro bya Gasutamo ku Rusumo byafunguwe ku mugaragaro n'abakuru b'Ibihugu byombi

Amafoto agaragaza uko umuhango wo gufungura gufungura ikiraro gihuza ibihugu u Rwanda na Tanzania wagenze n’abakuru b’ibihugu byombi bageza ijambo ku bari bitabiriye

Perezida Kagame ageza ijambo ku bitabiriye umuhango wo gufungura ku mugaragaro ikiraro gihuza u Rwanda na Tanzania
Mu ijambo rye Perezida Magufuli yavuze ko uruzinduko rwe mu Rwanda rugamije kunoza umubano w'ibihugu byombi

Kwamamaza
IZINDI NKURU WASOMA
Sakuru boot camp
2016-08-22 18:09:26
ABE 3rd Batch
2016-08-22 18:09:02
JICA suppliments
2016-08-22 18:08:59
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved