U Rwanda rwahawe miliyari 73 azifashishwa hubakwa umuhanda Kagitumba-Kayonza-Rusumo

Yanditswe na Ishimwe Israel
Kuya 23 Kamena 2016 saa 05:50
Yasuwe :
0 0

Banki Nyafurika itsura amajyambere (BAD), yemereye Guverinoma y’u Rwanda n’iya Uganda inguzanyo ya miliyoni 245 z’amadolari y’Amerika yo gushora mu mushinga w’ ubwikorezi.

U Rwanda rwahawe miliyoni 94 z’amadolari (ni ukuvuga miliyari 73 727 020 000 z’amafaranga y’u Rwanda) nk’inguzanyo zizashyirwa mu bikorwa byo gusana no kwagura umuhanda Kagitumba-Kayonza-Rusumo ungana na kilometero 208.

Uganda yo izakoresha miliyoni 151 z’amadolari zisigaye mu kubaka umuhanda nyabagendwa wa kilometero 23.7 uzoroshya ingendo hagati ya Kampala (Busega) na Mpigi, nk’umwe mu ikoreshwa mu bucuruzi bw’umuhora wa ruguru.

Mu mezi abiri ashize nibwo Perezida Kagame yemeje ko umuhanda wa Kagitumba-Kayonza- Rusumo uhuza u Rwanda, Uganda na Tanzania ugiye gukorwa vuba ndetse asaba abaturage kuzawubyaza umusaruro.

Yagize ati“Umuhanda munini uva Kagitumba-Kayonza-Rusumo uri mu nzira yo gukorwa bundi bushya, iby’ibibanze byose ubu biri ku murongo bigiye gutangira, muzawurinde kandi muwukoreshe neza ubagirire akamaro.”

Uganda n’u Rwanda ni ibihugu bidakora ku Nyanja, guteza imbere ibikorwa remezo by’ubwikorezi ni imwe mu nkingi z’ingenzi zizasembura ibikorwa by’ubukungu n’imibereho myiza, binongere ubucuruzi.

Iyi mihanda yombi izafasha ibihugu kugera ku ntego zabyo zo kwihuriza mu muryango wa Afurika y’Iburasirazuba (EAC).Izagira uruhare runini mu kugabanya ubukene n’ubufatanye hagati y’ibihugu by’u Rwanda, Uganda, Tanzania.

Umuyobozi ushinzwe ubwikorezi n’ikoranabuhanga muri BAD, Amadou Oumarou, yavuze ko imishinga izakorwa izazamura imibereho y’abaturage n’iterambere muri rusange.

Yagize ati “ Umushinga uzagira uruhare mu kugabanya ubukene, kongera imibereho myiza y’abaturage aho uzakorerwa binyuze mu bikorwa remezo bizamura ubukungu. Uzagira uruhare mu iterambere ry’ubuhinzi no kongera ibiribwa, unafashe inganda binyuze mu koroshya ikiguzi cy’ubwikorezi n’ibindi nkenerwa.”

Muri uyu mushinga kandi hazanubakwa amasoko abiri yambukiranya imipaka; irya Kagitumba n’irya Rusumo, hanahugurwe abagore b’abacuruzi.

Biteganyijwe ko umuhanda Kagitumba-Kayonza-Rusumo uzubakwa mu myaka ibiri n’igice, uzagabanya igihe imodoka zakoreshaga ziwugenda ho 50%, kikava ku masaha atandatu akaba atatu.

Umuhanda Busega-Mpigi ni umwe mu ibamo imodoka nyinshi kuko nibura izigera ku bihumbi 26 ziwunyuramo ku munsi kandi ufite ibice bibiri gusa.

Abaturage bangana na miliyoni 2.14 bo mu bice bya Busega-Mpigi-Kagitumba-Kayonza-Rusumo bakora ubucuruzi cyangwa batwara imodoka bazungukira muri uyu mushinga.

Biyongeraho abo mu muhora wa ruguru unyuze Mirama na Kagitumba, n’abo mu muhora wo hagati unyuze Rusumo.

Muri rusange umushinga uzatwara miliyoni 376.5 z’amadolari y’Amerika. BAD izatanga miliyoni 244.6 z’amadolari, Umushinga w’Abayapani ufasha mu bikorwa bitandukanye by’iterambere (JICA) utange miliyoni 56.3, Umuryango w’Ubumwe bw’u Burayi(EU) utange miliyoni 22.4, Guverinoma y’u Rwanda n’iya Uganda zitange miliyoni 53.2 z’amadolari.

Umuhanda Kagitumba-Kayonza-Rusumo ugiye kuvugururwa unongerwe mu bugari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza