Yiyemeje korohereza abaturage batishoboye kubona umuriro w’imirasire y’izuba

Hategekimana Amri w’imyaka 35 ni rwiyemezamirimo washinze sosiyete yitwa ‘Serve & Smile’ iri gufasha abahinzi n’aborozi n’abandi banyarwanda batishoboye bataragerwaho n’amashanyarazi kubona umuriro ukomoka ku mirasire y’izuba.

Iyi sosiyete ikorera hirya no hino mu gihugu igira ibikoresho byifashishwa mu gukoresha ingufu zikomoka ku mirasire y’izuba, birimo n’amatara, ibigeza ku baturage ikanabakopa bakishyura bamaze kubona amafaranga.

Mu kiganiro na IGIHE, Hategekimana yasobanuye ko ibi bikoresho birimo ibyo sosiyete ye yikorera.

Yagize ati “Kugira ngo ngire icyo gitekerezo cyo gukora ikompanyi ikora ibijyanye n’ingufu zikomoka ku mirasire y’izuba nabikuye muri Uganda kuko niho naboneye itara rikoresha imirasire y’izuba nagiye gusura inshuti yanjye, nararimusabye noneho ndaza ntangira kwiga uko narikora.”

Uyu mugabo yemeza ko nyuma yo kubona iryo tara rikoresha ingufu zikomoka ku mirasire y’izuba, yararyiganye, agenda agera no ku bindi bikoresho by’imirasire y’izuba.

Yagize ati “Kubera ko nanjye navukiye mu muryango ukennye utagira amashanyarazi nkaba narigiye ku gatadowa na barumuna banjye, byatumye nkura nifuza gukora cyangwa kuvumbura ikintu cyazafasha abandi banyarwanda batishoboye kuva mu icuraburindi.”

Avuga ko mu 2008 ari bwo yatangiye gukora mu bijyanye n’ingufu zituruka ku mirasire y’izuba n’abandi bafatanyabikorwa batandukanye. Bigeze muri 2013 aba rwiyemezamirimo, ashinga “Serve & Smile ” ikora ibijyanye n’ingufu zituruka ku mirasire y’izuba mu gihugu hose, cyane cyane mu Ntara y’Iburasirazuba.

Iyi sosiyete yaje gukura kugeza aho ubu ifite abakozi bagera kuri 200. Byongeye ikaba iri mu zagiriwe icyizere na leta, bikorana muri gahunda yihaye yo kugeza amashanyarazi byibuze ku banyarwanda bagera 70% mu mwaka wa 2018.

Uretse umusanzu atanga mu iterambere ry’igihugu, Hategekimana Amri avuga ko nawe umushinga we umaze kumuteza imbere umugeza ku mafaranga arenga miliyoni 80, yarahereye ku busa.

Hategekimana Amri agaragaza bimwe mu bikoresho bikoresha ingufu z'imirasire y'izuba
Ibikoresho bya Serve & Smile bifasha kugeza ku baturage ingufu zikomoka ku mirasire y'izuba

Kwamamaza