Uruganda AIF rwashyize ku isoko ifu ikungahaye ku ntungamubiri zifasha abana n’ababyeyi

Uruganda rukora ifu ikungahaye ku ntungamubiri mu Rwanda, Africa Improved Foods (AIF), rwamaze gushyira ku isoko ubwoko bubiri bw’ifu bufasha umwana gukura neza mu minsi 1000 ibanza y’ubuzima bwe.

Ubwo bwoko bw’ifu bwashyizwe ku isoko, asangiye izina rya ‘Nootri, hakabamo igenewe abana yitwa Nootri Toto n’igenewe abagore batwite n’abonsa yitwa Nootri Mama, yombi agatekwamo igikoma.

Ndayiragije Prosper, umuyobozi mukuru w’uruganda AIF, avuga izo fu zifite umwihariko wo kuba zikorerwa mu Rwanda hifashishijwe ibihingwa byera mu gihugu kandi zikagira intungamubiri zihagije zikenerwa n’abagore batwite n’abonsa ndetse n’abana bafite amezi atandatu kuzamura.

Ati “Dutewe ishema no kugeza ku Banyarwanda ifi za Nootri zifite umwihariko ku isoko ry’u Rwanda. Ni ikiribwa gifite intungamubiri nyinshi kandi gikorerwa mu Rwanda hifashishijwe ikoranabuhanga ryo mu Burayi kugira ngo duhe umwana intangiriro nziza y’ubuzima bw’umwana guhera akiri mu nda ya nyina.”

Ndayiragije avuga ko gukora izo fu byaturutse ku kuba bazi neza ko iminsi 1000 ibanza mu buzima bw’umwana ari ingenzi ku mikurire ye mu gihagararo no mu bwenge, bityo guha umwana indyo yuzuye muri icyo gihe bikaba ari impamba imuherekeza mu buzima bwe bwose.

Abahanga mu by’imikurire y’umwana bavuga ko abana bagejeje ku mezi atandatu bagomba guhabwa indyo yunganira amashereka kandi agakomeza konka kugeza nibura afite imyaka ibiri.

Ifu nk’izi zifasha abana guca ukubiri n’ikibazo by’imirire mibi kigaragara mu gihugu, dore ko imibare yerekana ko 38% by’abana bari munsi y’imyaka itanu mu Rwanda bagaragarwaho n’iki kibazo.

Ifu ikorwa na AIF igenewe abana igurishwa amafanga 1500 kuri garama 500 (500 g) naho iyigenewe abagore batwite n’abonsa igatangirwa ku mafaranga 1400 kuri izo garama. Ubwo bwoko bwombi bw’ifu za AIF zikorwa mu bigori na soya byera mu Rwanda, hongewemo intungamubiri zindi, nk’ ifu y’amata n’amavuta ya soya, buboneka mu bacuruzi hirya no hino mu gihugu.

AIF itangaza ko yiyemeje gufasha abanyarwanda kubona izo fu mu buryo buhagije ndetse idasize n’akarere u Rwanda ruherereyemo, aho ifite intego yo gukora toni 45,000 ku mwaka.

Uru ruganda ruherereye mu cyanya cyahariwe inganda mu Mujyi wa Kigali (Kigali Special Economic Zone) I Masoro runakora ifu itagurishwa yitwa Shisha Kibondo, ku bufatanye na leta y’u Rwanda, igatangwa ku buntu ku bana bavuka mu miryango ikennye ibarizwa mu cyiciro cya mbere cy’Ubudehe. Ku bufatanye kandi na Banki y’Isi, AIF ikora ifu yitwa Super Cereal mu rwego rwo guca imirire mibi no kugwingira mu bana bakomoka mu miryango ikennye.

Uruganda AIF rwashinzwe ku bufatanye bwa leta y’u Rwanda n’urugaga mpuzamahanga rw’ibigo by’imari birimo Ikigo cy’Abaholandi cyita ku buzima (Royal DSM), Banki y’Iterambere y’Abaholandi (FMO), Ikigega Nterankunga cy’Abongereza (DFID) na Banki y’Isi.

Ifu zikorwa n'uruganda rwa AIF zikungahaye ku ntungamubiri zifasha abana gukura neza

Kwamamaza