Umwihariko wa ‘The women’s Bakery’, uruganda rw’imigati rukoresha 100% by’abagore

Uruganda rwa The Women’s Bakery rukora imigati y’ubwoko bwose irimo iy’ubuki, imineke, karoti, igihaza, beterave n’iyindi, rukoresha 100% by’abagore, rukabigisha umwuga wo gukora imigati ku buryo nabo babasha kwikorera.

The Women’s Bakery ni uruganda rukoresha abagore ndetse rukabigisha, aho bahugurwa mu mezi atandatu ku buryo n’utazi gukora imigati abimenya akiga n’ibindi bintu bitandukanye birimo n’ibijyanye n’imirire.

Uru ruganda rufasha abagore bo mu ngeri zitandukanye kwiteza imbere, cyane cyane abakuze (guhera ku myaka 25 kuzamura) batigeze bagira amahirwe yo gukora akazi mu buzima bwabo.

‘The Women’s Bakery’ ifite ubushobozi bwo gukora imigati myiza iryoshye ifite intungamibiri, cyane ko bakora imara iminsi itatu gusa ntibashyiremo ibishobora kuyangiza ngo ikunde irambe.

Umuyobozi ushinzwe Iterambere n’Itumanaho muri “The Women’s Bakery”, Umutoniwase Françoise, yavuze ko uru ruganda rufite amashami mu Karere ka Gicumbi no mu ka Kamonyi ku Ruyenzi, aho bafasha abagore kwitinyuka bakumva ko bakora ibintu byiza abantu bakabikunda bakabigura.

Yongeyeho ati “Dufasha abagore tugendeye ku kureba ahari abakeneye ubufasha kuruta ahandi. Abantu batazi nk’umugati, ahantu hari abagore batazi gukora imishinga cyangwa abataragize amahirwe yo gukora tukifashisha Akarere nka Gicumbi ni ko twabigenje, hari n’abo twakuye mu nkambi.”

Nyuma yo guhabwa amahugurwa, aba bakobwa n’abagore batangira gukora imigati.

Umutoniwase yavuze ko uru ruganda rukora imigati itandukanye kandi ibyo ikoresha byose bigurwa mu Rwanda mu rwego rwo gukomeza guteza imbere isoko ryo mu gihugu.

Yakomeje agira ati “Dukora imigati itandukanye, ifite intungamubiri nta kintu na kimwe twongeramo. Hari ukongeramo kugira ngo itinde ntabwo tubikora, kuko imigati yacu imara iminsi itatu cyangwa ine, ifitemo amagarama arindwi ya ‘protéine’ ni ikintu dukenera cyane mu mubiri wacu.”

The Women’s Bakery ikora imigati isanzwe izwi irimo ubuki ariko ikagira akarusho ko gukora imigati mu mboga dusanzwe tubona mu Rwanda, aho ikora imigati ya karoti, igihaza, beterave, imineke n’iyindi.

Mutoniwase yavuze ko uruganda rwabo rufite intego yo gukomeza guteza imbere umugore, bagafungura amashami hirya no hino mu gihugu akora imigati kandi akoramo abagore gusa, bagakomeza kubafasha kugera ku iterambere.

Yasabye abantu ko bagura imigati yakozwe n’aba bagore bagomeza kubafasha kwiteza imbere no gutuma bigirira icyizere bakumva ko bashobora gukora ibintu bikundwa.

Uru ruganda rufite gahunda yo gukorana n’ibigo by’amashuri kuko abana bakeneye imigati irimo intungamubiri itongewemo ikindi kintu icyo ari cyo cyose.

The Women’s Bakery yatangiye gukora mu 2015, kuri ubu icururiza imigati mu duce turimo Remera no ku yandi mashami atandukanye. Uru ruganda rwanazirikanye gukoresha ikoranabuhanga mu kugeza serivisi nziza ku barugana aho rukorana na Vuba Vuba igemura amafunguro ku bantu mu ngo zabo cyangwa aho bakorera, muri za Supermarkets ndetse no muri za butike hirya no hino mu gihugu.

Uru ruganda ruteza imbere umugore rugaharanira ko nawe agira aho agera ahigejeje
The Women's Bakery ikoresha abagore gusa mu mirimo itandukanye
Bafite ahantu wafatira umugati, icyayi cyangwa kawa
Bakora imigati yo mu bwoko butandukanye
Women's Bakery ishyira imbere ibikorwa byo kuzamurira umugore ubushobozi
Umutoniwase yavuze ko uru ruganda rukorana n'abagore gusa rukabigisha gukora ibintu bitandukanye cyane cyane imigati

Amafoto: Women’s Bakery


Special pages
. . . . . .