Christian University of Rwanda ifite intego yo gushimangira ireme ry’uburezi yatangije ikigo cyigisha Icyongereza

Hashize iminsi havugwa ikibazo mu mashuri atandukanye yo mu Rwanda kijyanye n’ireme ry’uburezi, ahavugwa umubare munini w’abarangiza amasomo ariko badatanga umusaruro bitezweho iyo bageze mu kazi.

Nubwo iki kibazo cyagiye kigarukwaho mu buryo bwinshi ariko, icyashyizwe mu majwi cyane ni imyigishirize n’abarezi badafite ubumenyi buhagije by’umwihariko mu rurimi rw’Icyongereza kandi arirwo bakoresha bigisha andi masomo.

Mu gihe inzego zose zaharugukiye iki kibazo ndetse Minisitiri y’Uburezi ikaba iherutse gushyira hanze itangazo rikubiyemo ingamba zafashwe mu kugihashya, Christian University of Rwanda yafashe iya mbere itangiza ikigo kizafasha abanyeshuri, abarezi n’abandi babyifuza kuzamura ubumenyi bwabo mu ndimi.

Ubuyobozi bw’iyi kaminuza buvuga ko izi ngamba zafashwe kugira ngo abasanzwe bayigamo n’abazaza kuyigamo basoze amasomo bafite ubushobozi bwo guhangana ku isoko ry’umurimo haba mu Rwanda no mu ruhando mpuzamahanga.

Christian Univeristy of Rwanda Language Centre (CHUR LC) izatangira ishyira imbaraga mu Cyongereza, aho ibyo bazigisha bizunganira amasomo y’indimi yari asanzwe atangwa n’iyi kaminuza.

Umunyeshuri azajya abanza guhabwa ikizamini kugira ngo hamenyekane niba ashyirwa mu cyiciro cya mbere (beginners), icya kabiri (Intermediate) cyangwa icyisumbuye (Advanced level) bitewe n’ubumenyi afite mu rurimi.

Hateganyijwe uburyo bwihariye aya masomo y’inyongera agomba gutangwamo, ibitabo bihagije mu isomero n’urubuga ruriho imfashanyigisho ziri mu nyandiko n’amashusho.

Iki kigo cya Christian University of Rwanda kandi kizaba kiri mu mashami yayo ya Kigali na Karongi, kizajya cyigisha n’izindi ndimi zirimo Ikinyarwanda, Igiswahili, Igishinwa, Igifaransa n’Ikidage.


Kwamamaza