Brussels Airlines yashyiriyeho abakiriya uburyo bwo kubonera serivise kuri telefoni

Ikompanyi y’indege y’Ababiligi ya ‘Brussels Airlines’ iri kwifashisha ikoranabuhanga rya telefoni mu kurushaho kunoza serivisi itanga ku bakiriya bayo, zikabageraho ku buryo bworoshye.

Iyi kompanyi yihaye intego muri uyu mwaka yo guteza imbere ikoranabuhanga muri serivise zayo. Kubw’ibyo umukiriya ashobora gukurikirana amakuru yerekeye iby’ingendo akoresheje ‘Mobile App’ ya Brussels Airlines’ yatangijwe mu kwezi gushize.

Byongeye, Umuyobozi wungirije wa Brussels Airlines ushinzwe iby’ubucuruzi bwifashisha ikoranabuha na telefone, Sebastien Scarmure, avuga ko Brussels Airlines’ ifite urubuga rwa internet rufasha gutuma amakuru yose umukiriya akenera ayabona.

Yagize ati “Uko turushaho kubona amakuru ku bikorwa byacu, ni ko turushaho kumenya icyo abakiriya bacu bakeneye kandi tukakibagezaho mu buryo bunoze. Ubu 35 % y’ibyo dukora, bikorerwa ku rubuga rwacu brusselsairlines.com, kandi turimo kwita ku mbuga zacu kugira ngo tubashe kwita ku batugana n’abagurira amatike ku baduhagarariye. Abakiriya bakeneye gukurikirana amakuru y’ingendo zacu bashobora no kugira ibyo bahinduza bitabaye ngombwa gukoresha uburyo busanzwe bwo kujya ku biro.”

Akomeza agaragaza ko inashyira ingufu mu gukoresha imbuga nkoranyambaga za Facebook na Twitter.

Brussels Airlines’ ifite indege 49 zikora ingendo 300 ku munsi zihuza Buruseli n’ibindi bice by’isi birenga 90 mu Burayi, Afurika, Amerika na Canada.

Inerekeza ku mugabane wa Aziya, mu bihugu birimo Leta Zunwe Ubumwe z’Abarabu, u Buyapani na Thailand. Guhera muri uku kwezi, iyi kompanyi yatangiye no gukora ingendo eshanu buri Cyumweru zijya i Mumbai mu Buhinde.

Brussels Airlines’ itanga uburyo bwo gutwara imizigo mu ngendo zose.

Brussels Airlines yashinzwe na SN Airholding mu mwaka wa 2002.


Kwamamaza