Abahinzi b’imyumbati bakanguriwe kwitegura guhingira igihe mu gihembwe gitaha

Ni kenshi hajya humvikana ibibazo by’abahinzi bavuga ko imbuto yabuze ariko leta ikomeza gushyira imbaraga mu kongera imbuto kandi nziza, kuri ubu abahinga imyumbati bakaba bizezwa ko imbuto ihari, bagasabwa gutegura imirima hakiri kare kugira ngo bazashobore guhingira igihe mu gihembwe cy’ihinga cya mbere cya 2018 kizatangira muri Nzeri 2017.

Umuyobozi uhagarariye Ikigo cy’Igihugu gishinzwe Ubuhinzi (RAB) muri zone y’Amajyepfo, Gasana Parfait yabwiye IGIHE ko imbuto y’imyumbati imaze kwiyongera kandi ko RAB irimo gukora ubushakatsi ku zindi mbuto zihangana n’indwara ya kabore, zikazunganira imbuto imwe ihari kugeza ubu.

Yagize ati “Imbuto twatangiye kuzana mu 2015 imaze kwiyongera kuko tugenda tuyiha abatubuzi. Abahinzi turabizeza ko imbuto ihari, nibategure imirima bazahingire igihe muri Nzeri n’Ukwakira. Nubwo idahagije uko twifuza, tugeze hafi 80% by’iyikenewe. Turasaba abahinzi kuyifata neza, ntibayivange n’indi myumbati isanzwe kuko ari imbuto nziza ariko ishobora kwanduzwa indwara ya kabore.”

Gasana yavuze ko RAB ikomeje igenzura risuzuma ubwiza bw’imbuto y’imyumbati, agakangurira abahinzi kuzakoresha imbuto yemejwe na RAB gusa no gufatanya bahanahana imbuto no kubadafite ubushobozi bwo kuyigura, ubu ingeri ya sentimetero hagati ya 25 na 30 ikaba igura amafaranga umunani.

Umuyobozi Mukuru w’uruganda rwa Kinazi Cassava Plant (KCP), Nsanzabaganwa Emile, avuga ko uruganda rwiteguye gufasha abahinzi mu kubagezaho imbuto y’imyumbati ku buntu aho yaba iri hose mu gihugu.

Yagize ati “Nta muntu ukwiye kunanirwa kwitabira ubuhinzi avuga ko nta mbuto ihari, nubwo tutavuga ko ihagije ariko yariyongereye ku buryo bugaragara. Abantu bakwiye gushyiramo imbaraga bagahinga ubuso bugaragara. Twizeye ko umusaruro uziyongera mu gihe kiri imbere.”

Ubusanzwe abahinzi b’imyumbati, bibumbiye mu makoperative ari hirya no hino mu gihugu, barambagiza imbuto nziza yamaze kugenzurwa n’Ikigo cy’Igihugu gishinzwe Ubuhinzi (RAB), hanyuma uruganda rutunganya ifu y’imyumbati (KCP)rukabafasha kuyikura aho bayibonye rukayibagereza ku mirima yabo.

Ugemuye umusaruro azajya ahita yishyurwa

Imyumbati ni igihingwa kiboneka henshi mu Rwanda kandi usanga buri gihe gisarurwa no mu gihe cy’ihinga, bityo hagakenerwa isoko rihagije ry’uwo musaruro. Kuri ubu, Kinazi Cassava Plant ni rwo ruganda rwakira umusaruro mwinshi w’imyumbati wo mu Rwanda kuko rugura uwo mu Ntara y’Amajyepfo, Iburasirazuba ndetse mu gihe gito rukazatangira kugura n’umusaruro wo mu Burengerazuba, nk’uko Nsanzabaganwa abivuga.

Yagize ati “Nta muntu uzazana umusaruro ku ruganda ngo azagaruke kwishyuza. Umuntu azajya azana umusaruro, atahane amafaranga ye. Twiteguye kwakira umusaruro, uwo abahinzi bazatugezaho wose dufite ubushobozi bwo kuwakira kandi si ubushobozi bw’ibigendanye n’imashini zo kuwutunganya gusa ahubwo n’amafaranga yo kwishyura arahari. Turifuza ko abahinzi bashyiramo imbaraga, bakatugemurira umusaruro mwiza.”

KCP ni uruganda ruherereye mu Karere ka ruhango rukaba rufite ubushobozi bwo kwakira toni 120 z’imyumbati buri munsi, rugakoramo ifu igurishwa mu gihugu no mu bindi bihugu birimo Leta Zunze Ubumwe z’Amerika, Canada, ibihugu by’i Burayi n’Afurika y’Iburengerazuba.

Umuhinzi w'imyumbati arimo kuyikorera
Uruganda rw'Imyumbati rwa Kinazi rwiteguye kwakira umusaruro wose rugahita rwishyura abahinzi

Kwamamaza