Umuzimu wasaritse abarwanya u Rwanda uzorohera Twagiramungu na Rusesabagina bihuje?

Yanditswe na Musangwa Arthur
Kuya 20 Kamena 2019 saa 11:42
Yasuwe :
0 0

Umunyapolitiki utavuga rumwe na Leta y’u Rwanda, Faustin Twagiramungu, yihuje ku mugaragaro n’Ihuriro MRCD, riyobowe na Paul Rusesabagina, mu bufatanye bwiswe ubwo guhuza imbaraga mu kurwanya ubutegetsi bw’u Rwanda, hakoreshejwe inzira zose.

Amasezerano hagati y’ishyaka RDI Rwanda Rwiza, rya Twagiramungu na MRCD, igizwe na RRM ya Nsabimana Callixte ‘Sankara’, ufungiwe mu Rwanda, PDR Ihumure na CNRD Ubwiyunge ya Gen. Irategeka Wilson wiyomoye kuri FDLR, yasinywe kuri uyu wa Kabiri i Bruxelles mu Bubiligi.

MRCD niyo Nsabimana ‘Sankara’, yari abereye umuvugizi na Visi Perezida wa kabiri. Ifite ishami rya gisirikare ryitwa FLN, ikaba ari umutwe w’iterabwoba wagabye ibitero mu Majyepfo y’u Rwanda, bigahitana abaturage icyenda, 19 bagakomereka ndetse n’imitungo myinshi igasahurwa indi ikangizwa.

Uwari umuvugizi w’uyu mutwe Nsabimana yumvikanye ku maradiyo ya BBC na VOA, n’imbuga nka YouTube yigamba ibyo bitero, avuga ko ari ibya FLN iyobowe na Habimana Hamada.

Umusesenguzi mu bya politiki y’ibiyaga bigari, akaba impuguke mu itangazamakuru, Albert Rudatsimburwa, avuga ko kuba Twagiramungu yahisemo kwihuza ku mugaragaro n’umutwe w’iterabwoba, MRCD, bisobanura ko atakiri muri politiki gusa ahubwo yinjiye no mu iterabwoba.

Avuga ko Twagiramungu yifuza guhirika ubuyobozi bw’u Rwanda ariko akaba yarabuze uko abigenza, bityo akaba yihuje n’abandi babimazemo iminsi, ariko ku bwe iri huriro ntacyo ryageraho.

Ati “Ni amagambo gusa, ni ukuvugira kuri radiyo hirya no hino ariko ntacyo bivuze, nta n’ikintu gifatika gihari”.

Inenge kuri Rusesabagina na Twagiramungu

Rudatsimburwa avuga ko aba bagabo bose bafite inenge izingiye ku ‘bushobozi buke’ butuma ubufatanye bwabo ntacyo bwageraho.

Mbere ya Jenoside yakorewe Abatutsi mu 1994, Paul Rusesabagina yari umuntu usanzwe, yavukiye i Murama ya Gitarama ku wa 15 Kamena 1954, ariko nyuma yagiye gutura i Bruxelles mu Bubiligi na Leta Zunze Ubumwe za Amerika.

Uburyo abantu bamuzi bwahinduwe cyane na filimi Hotel Rwanda yamukinweho nk’uwarokoye abantu 1268 muri Hôtel des Mille Collines, abayobejwe nayo batangira kumuhundagazaho ibihembo kugeza kuri ‘Presidential Medal Award of Freedom’, yahawe na Perezida George W. Bush wa Amerika mu Ugushyingo 2005.

Rudatsimburwa agaruka ku mateka ya Rusesabagina akavuga ko atari umunyapolitiki, ahubwo yari umuntu wakoreraga hôtel akaza kugirwa igitangaza na filimi bityo agatangira kwibaza ko uwo muntu uri muri filime ari we kandi atari we.

Ati “Ni ukwisumbukuruza gusa kandi nta bushobozi afite uretse ko yabonye abantu bamwumva kuko bibaza ko ari wawundi wo muri filime ariko mu banyarwanda nta kintu avuze, ntacyo bamuziho uretse ibyo ahwihwisa mu maradiyo gusa n’ahandi”.

Umunyapolitiki utavuga rumwe na Leta y’u Rwanda, Faustin Twagiramungu, yihuje ku mugaragaro n’Ihuriro MRCD, riyobowe na Paul Rusesabagina

Akomereza kuri Twagiramungu, akavuga ko we yabaye umunyapolitiki kuva kera ariko ubu akaba ari ‘umunyapolitiki wasigajwe inyuma n’amateka’, kuko uko u Rwanda rwateye imbere ntacyo bimubwiye akiri mu bya kera yari yaramenyereye ku ngoma zindi.

Mu nteruro imwe Rudatsimburwa ati “Nta hantu bishobora kubageza kuko nta ruhare bafite no ku banyarwanda”.

Umuzimu wasaritse abarwanya u Rwanda bazawukira?

Si ubwa mbere abatavuga rumwe n’ubutegetsi bw’u Rwanda, bifatanyije bagashyiraho amahuriro ngo bahuze imbaraga bagere ku mugambi wabo ariko bikarangira bishwanyutse ntacyo bigezeho.

Ingero ni nyinshi cyane. Ntawe utazi uko RNC ya Kayumba Nyamwasa yashwanyutse. Uguterana amagambo hagati ya Dr Théogène Rudasingwa na Kayumba Nyamwasa, bari bahuriye muri RNC, mbere y’uko bacikamo ibice, byatumye n’abo bizezaga ibitangaza bacika intege.

Aha niho havutsemo amashyaka atemewe mu Rwanda arimo na RRM ya Nsabimana, nayo yacitsemo ibice mbere y’ifatwa rye kubera ubwumvikane buke, gusuzugurana no kutemera uburyo abayobozi bishyira mu myanya.

Hari kandi n’amatiku hagati y’abasivili n’abahoze mu gisirikare. RRM igizwe n’abantu ahanini bavuye mu Rwanda bahunze ibyaha bakoze cyangwa andi makosa.

Twagiramungu ubwe nawe yashinze ihuriro ry’amashyaka atavuga rumwe na Leta y’u Rwanda (CPC), ryari rigizwe na FDLR, UDR, RDI, CNR, na PS Imberakuri, igice cya gatatu. Abarigize baje kunaniranwa nawe bamushinja igitugu.

Muri rusange iyo ugiye kwitegereza umuzimu wasaritse aya mashyaka, ni ugupingana no kuryana, buri wese arwanira kuba ku isonga no guhabwa ibyubahiro by’umukuru w’ishyaka cyangwa uzayobora igihugu igihe bageze ku butegetsi.

Rudatsimburwa yongeraho izindi mpamvu abashinga aya mahuriro ntacyo bageraho ari uko ikibagenza ari inyungu zabo bwite, kwitwaza iturufu y’amoko n’intege nke basanganywe.

Ati “Ubundi mu mvugo zabo usanga nka Rusesabagina afite akantu ko kuzana iby’amoko, RNC usanga ikibazo bafite ari umuyobozi mukuru. Ni uguhuza gusa ariko ubona ko bafite intege ziri hasi cyane, bakibaza ko guhuza imbaraga byatuma bazamura urwego rw’imbaraga zabo ariko akenshi ubona ko kuba ari abantu bifitiye gahunda zabo bwite, birangira akenshi bashwanye kuko hari aho batazahuza”.

Rudatsimburwa akomeza agira ati “Ntibafite ingengabitekerezo ifatika yatuma babona n’imfashanyo, birangirira aho. Mu by’ukuri (Twagiramungu), aba ashaka kwihuza n’abandi kuko nta bushobozi na buke afite, niwe wenyine wibaza ko izina gusa rikurura ariko hashize imyaka 25 uriya muntu ntabwo azwi, ntawe yakurura, nta na benewabo yakurura.”

Avuga ko FPR Inkotanyi yashobotse bitewe no guhuza mu bitekerezo byari bifitiye akamaro abanyarwanda bose yaba abari impunzi n’abandi bari mu gihugu babaho mu buzima bw’ingoma ya Habyarimana.

Ati “Niyo mpamvu FPR yakuruye abantu n’ubushobozi bw’abo bantu. Ikindi harimo n’abantu bafite ubunararibonye bw’uko niba byanze muri politiki hari uko babikora bakurikije ubushobozi bwo gushoza intambara. Abandi ntabyo bafite, akenshi banafashwa n’abantu bashaka kugirira u Rwanda nabi ariko nabo kubera aho u Rwanda rugeze nta ngaruka yindi bifite uretse gukerereza iterambere ryabo”.

U Budage ntibwakwicarana n’abahoze ari aba-Nazi

Twagiramungu n’abandi bafatanyije kurwanya ubutegetsi bw’u Rwanda, ntibasiba kumvikana bavuga ko bazagaruka mu Rwanda habaye ibiganiro.

Rudatsimburwa asanga ntaho ibi biganiro byahera kuko u Rwanda rudaheza kandi ruhora rushishikariza impunzi n’abari mu mahanga gutaha, bityo n’abo bashaka ibiganiro bakwiye gutaha niba hari icyo bahindura ku cyerekezo cy’u Rwanda, bakagikora.

Icyakora avuga ko harimo n’abantu kuganira na bo byagereranywa no kuvuga uti ‘u Budage bw’iki gihe bukwiye kwicarana n’abahoze ari aba-Nazi cya gihe cya Hitler’ kuko abuzukuru babo babisabye.

Abo Twagiramungu yifatanyije nabo harimo abashyiriweho impapuro mpuzamahanga zibata muri yombi, Rudatsimburwa avuga ko nta kabuza uyu musaza agomba gufatwa nk’umuterabwoba kuko kuba yifatanyije nabo bivuze ko yemera ibyo bakora.

Kugeza ubu ikibazwa ni ikidasanzwe ubufatanye bwa MRCD na RDI Rwanda Rwiza buzanye ku buryo bidatinze abantu batazumva iri huriro ryatewe n’umuzimu wasaritse abarwanya u Rwanda, nabo bagacikamo ibice.

Rusesabagina wihuje na Twagiramungu, ni umwe mu bashyiriweho impapuro zisaba ko batabwa muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza