00:00:00 IGIHE NETWORK KN KINYARWANDA EN ENGLISH FR FRANCAIS

Uko u Bufaransa bwinjije u Burusiya muri Centrafrique bugasigara bubogoza

Yanditswe na Ferdinand Maniraguha
Kuya 3 Ugushyingo 2021 saa 02:43
Yasuwe :
0 0

Mu binyamakuru mpuzamahanga bitandukanye by’umwihariko iby’i Burayi na Amerika, inkuru ivuga kuri Centrafrique ntiyasozwa hatavuzwe kuri Wagner, Sosiyete y’Abarusiya ifatwa nk’iy’abacanshuro ikomeje kwiganza mu bihugu bitandukanye ifasha gucunga umutekano.

Iyo sosiyete ni ishusho y’ukuboka guhishe k’ubuhangange u Burusiya butangiye kugira kuri uyu mugabane wahoze ari akarima k’Abanyaburayi n’Abanyamerika.

Mu bashyushya izo nkuru cyane, ibinyamakuru n’abanyapolitiki bo mu Bufaransa baza ku isonga kuko bamaze imyaka myinshi bica bagakiza muri Centrafrique.

Hari abakeka ko kujya muri Centrafrique k’u Burusiya byapfuye kuza, nyamara u Bufaransa nibwo bwabahamagaye.

Muri Werurwe 2016 nibwo Perezida Faustin-Archange Touadéra yarahiriye kuyobora Centrafrique, asimbuye Catherine Samba Panza wari wagiyeho mu nzibacyuho, nyuma y’imvururu n’intambara zadutse mu 2012 zigahitana ubuzima bwa benshi.

Touadéra yahawe igihugu kikirimo ibibazo, inyeshyamba zigose umurwa mukuru Bangui mu mpande zose, muri make igihugu cyari kikiri mu ntambara. Ingabo za Leta (FACA) zari zimaze imyaka itatu zifatiwe ibihano na Loni, ku buryo icyo gihugu ntaho cyari cyemerewe kugura intwaro.

Umutekano muri Centrafrique bawukeshaga ingabo za Loni zoherejwe kubungabunga amahoro (MINUSCA), n’iz’u Bufaransa zoherejwe mu 2013 mu gikorwa cyo kugarura amahoro cyiswe “Operation Sangaris”.

Ingabo z’u Bufaransa urebye nizo zafashaga cyane Leta ya Centrafrique mu bikorwa byo kugarura amahoro birimo imirwano, kuko ingabo za Loni zo ubutumwa bwazo ahanini butemera imirwano mu gihe hatabayeho gushotorwa.

Touadéra yagiye ku butegetsi na we yizeye uwo mutekano, gusa ku munsi yarahiriyeho icyizere cyahise kiyoyoka. Ubwo Touadéra yarahiraga, Minisitiri w’Ububanyi n’Amahanga w’u Bufaransa, Jean Yves Le Drian yari ahari.

Imihango yo kurahira irangiye, Le Drian yagiranye ikiganiro n’abanyamakuru, atangaza ko Operation Sangaris izarangirana n’umwaka wa 2016.

Mu kiganiro cyiswe ‘Chronique : Faut il détester les russes qui débarquent en Afrique ?’ cyakozwe n’umunyamakuru wa RFI, Alain Foka ufite ubunararibonye kuri Politiki ya Afurika, yagaragaje ko amagambo ya Le Drian i Bangui ataguye neza Touadéra wari umaze kurahira.

Ati “Perezida Touadéra yaguye mu kantu, nta kintu bari barigeze babimubwiraho. Byahise bimuyobera, yibaza uko azabasha guhangana n’ibitero by’inyeshyamba hirya no hino mu gihugu”.

Umwanzuro wo kuvana Ingabo z’u Bufaransa muri Centrafrique, byongeye bikavugwa mu masaha make Touadéra arahiye, byari ikimenyetso simusiga ko ubutegetsi bwe batabushaka ndetse ko iminsi yabwo ibarirwa ku ntoki.

Mu gushakisha uko yakwirwanaho, muri Mata 2016 Touadéra yahise yerekeza i Paris guhura na Perezida François Hollande. Icy’ibanze yamusaga kwari ukongerera igihe Operation Sangaris, mu gihe agishakisha ubundi buryo bwo kurinda umutekano w’igihugu yari ahawe kuyobora.

Imbere y’itangazamakuru i Champs-Élysées, Hollande yijeje Touadera ko Sangaris izaguma muri Centrafrique, bagakomeza gufasha FACA kwiyubaka.

Touadéra agishingura ikirenge i Paris, Le Drian yasubiye imbere y’itangazamakuru, anyuranya na shebuja Hollande, yongera gushimangira ko Operation Sangaris igiye guhagarikwa.

Muri Gicurasi 2016, Hollande na we yagiriye uruzinduko i Bangui, anyuranya n’icyizere yari yahaye Touadéra , yunga mu rya Le Drian ko Operation Sangaris itazakomeza.

Impamvu Hollande yatanze, ngo ni uko igihugu cye cyari gifite ingabo ahantu henshi ku Isi, bityo ko basuzumye bagasanga ari byiza kuzigabanya. Ziba zibaye indimi ebyiri za Perezida mu kwezi kumwe.

Ntibyatinze Ukwezi k’Ukuboza 2016 kwarageze, Operation Sangaris irasozwa burundu, ingabo z’u Bufaransa ziva ku butaka bwa Centrafrique, zisiga iza Centrafrique mu gihirahiro.

Uyu ni umusirikare w'u Burusiya, yari yicaye acunze umutekano ahantu ku muhanda i Bangui

U Bufaransa bwakururiye u Burusiya i Bangui

Touadéra yanze gukurayo amaso, yizera ko u Bufaransa babanye mu bukoloni na nyuma y’aho, bushobora kwisubiraho bukagoboka ‘umuvandimwe’.

Muri Werurwe 2017, Touadera yasubiye i Paris kwinginga Hollande , amubwira ko niba kumuha abasirikare bo kumufasha bidashoboka, nibura yamuhereza intwaro kugira ngo igisirikare cye kizifashishe mu guhangana n’ibitero by’inyeshyamba byari byugarije Bangui.

Hollande yemereye Touadera intwaro 1500 nubwo yasoje manda ye atazitanze.

Muri Nzeri 2017 ubwo Perezida Emmanuel Macron yajyaga ku butegetsi, Touadera yihutiye kujyayo. Yagiye kwibutsa ko icyo gihugu cyamwemereye intwaro, bityo ko akizitegereje n’umutima wiyoroheje.

Macron yabwiye Touadera ko intwaro rwose zihari, ariko ko bafite ikibazo cy’u Burusiya bwitambitse umwanzuro wo kuziha Centrafrique mu kanama gashinzwe umutekano muri Loni.

Perezida Touadera yakubiswe n’inkuba, yibaza icyo apfa n’u Burusiya ku buryo bwanga ko ingabo zihabwa intwaro zo kwikiza umwanzi. Macron yabwiye Touadera ko byaba byiza avugishije u Burusiya, akabusaba kwisubiraho, intwaro z’u Bufaransa zikoherezwa muri Centrafrique.

Macron yavuze ko u Burusiya aribwo bwitambitse umugambi wo guha Centrafrique intwaro

Alain Foka avuga ko Touadera yahise ashaka uburyo ahura n’abayobozi b’u Burusiya akababaza icyo bapfa. Yaje kugirirayo uruzinduko ahura na Minisitiri w’Ububanyi n’Amahanga, Sergey Lavrov.

Touadera yabajije Lavrov icyo Centrafrique yacumuye, ku buryo n’udutwaro duke umugiraneza yari abahaye batwitambika, kandi bazi neza ibihano bikakaye Loni yabafatiye.

Lavrov na we yaguye mu kantu, abwira Touadera ko ntacyo u Burusiya bupfa na Centrafrique. Yavuze ko batigeze banga ko intwaro zoherezwa, ko icyo banze ari uko intwaro zakoreshejwe zitangwa nk’inkunga ngo zongere gukoreshwa.

U Burusiye bwagendeye ku ngingo ivuga ko “intwaro zafatiwe ku rugamba zidashobora kongera gukoreshwa ahubwo zangizwa.”

Amatsiko yabaye menshi kuri Touadera, ashaka kumenya neza aho intwaro zishaje zihuriye n’izo basabye u Bufaransa.

Lavrov yamubwiye ko intwaro u Bufaransa bwari bugiye kumuha ari izambuwe umutwe w’iterabwoba wa Al Shabaab muri Somalia, ariyo mpamvu banze ko zongera gukoreshwa.

Mu gihe Touadera yari akiri kwibaza ibimubayeho, Lavrov yaramubajije ati “ariko ubundi mwari mwasabye u Bufaransa intwaro zingana gute? Undi ati “ Twasabye 1500”.

Lavrov yaratangaye , ahamagara shebuja Perezida Vladimir Putin , bemeranya ko bazaha Touadera intwaro 3000 kandi nshyashya, aho kuba izishaje nk’izo u Bufaransa bwari bugiye kumuha.

Kubera ko intwaro u Burusiya bwari butanze zari nshya kandi zitandukanye n’izo ingabo za Centrafrique zari zisanzwe zikoresha, byabaye ngombwa ko Touadera asaba n’abantu bo gutoza ingabo ze kuzikoresha.

U Burusiya bumaze guha Centrafrique intwaro, bwanayihaye abasirikare bo gutoza FACA kuzikoresha

U Burusiya bwandikiye Akanama k’Umutekano ka Loni, bukamenyesha ko hari abantu babo bagiye koherezwa muri Centrafrique kwigisha FACA gukoresha intwaro.

Alain Foka avuga ko umunsi intwaro z’u Burusiya zageraga muri Centrafrique, abahagarariye ibihugu biri mu kanama ka Loni gashinzwe umutekano bari bahari barimo Amerika, u Bufaransa, u Bwongereza, u Bushinwa n’abandi.

Ibyo bitandukanye n’ibivugwa mu itangazamakuru, ko u Burusiya bwinjiye rwihishwa muri Centrafrique.

Touadera mu binyamakuru by’i Burayi yatangiye gufatwa nk’umugambanyi uri kugurisha igihugu k’u Barusiya, abategeza ubukungu bw’igihugu.

We aherutse kuvuga ko yitabaje u Burusiya kuko bwagaragazaga ubushake bwo kubafasha mu kugarura umutekano mu gihe abandi bari babatabye mu nama.

Abajijwe niba abaje koko ari abacanshuro, yavuze ko we yasabye u Burusiya ingabo, ko atigeze asaba abacanshuro. Touadera yavuze ko inyungu zose u Burusiya bufite muri Centrafrique, ari nk’izo ikindi gihugu cyahagirira mu mubano usanzwe w’ibihugu.

Izo ngabo z’u Burusiya ku bufatanye n’iz’u Rwanda zasabwe mu mpera z’umwaka ushize ubwo Bangui yari yugarijwe n’ibitero by’inyeshyamba, zabashije kurinda umutekano zirukana inyeshyamba, umutekano uragaruka.

Foka yavuze ko u Bufaransa bukwiriye kwigaya ku mahitamo bwakoze aho kuyatwikiriza ibindi birego, kuko aribwo bwazanye u Burusiya muri Centrafrique kuko iyo buhagumisha Operation Sangaris, Touadera atari kujya gushaka abamufasha kurinda umutekano ahandi.

Sosiyete y'Abarusiya, Wagner niyo yahawe ikiraka cyo gufatanya n'izindi nzego gucunga umutekano muri Centrafrique
Hollande yemerewe Touadera kongera manda y'abasirikare b'u Bufaransa muri Centrafrique, bukeye aramwihakana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .