Kwamamaza

Uko Munyantwari na Gatabazi babona uruhare rwa Kagame mu kuzamura Abanyarwanda

Yanditswe kuya 16-09-2016 saa 13:06' na Ntakirutimana Deus


Imiyoborere myiza ibutegura igenamigambi ryiza ndetse n’abayobozi bareba kure, ni bimwe mu bifatwa nk’isoko y’ubukungu bw’igihugu. Ahabuze ibyo byose bishyira igihugu mu icuraburindi, aho usanga ibikorwaremezo bisenywa umunsi ku wundi ndetse n’abatari bake bakahatakariza ubuzima.

Imiyoborere y’u Rwanda iberewe ku ruhembe na Perezida Kagame ishimwa na bamwe mu bayobozi bavuga ko igejeje abaturage aheza ibarokoye icyobo cy’icuraburindi ry’umwijima w’ubukene bagiye bashyirwamo n’abayobozi babo batarebaga kure kugeza bashoye igihugu muri Jenoside yahitanye Abatutsi basaga miliyoni ndetse inasenya bimwe mu bikorwaremezo by’igihugu.

Perezida Kagame, ngo yahagurutse gitore, atangiza gahunda zirimo Girinka Munyarwanda, VUP /Ubudehe n’izindi zitandukanye zimaze kugeza aheza abanyarwanda mu rugamba agikomeje kurwana.

Guverineri w’Intara y’Amajyepfo, Munyantwari Alphonse na Depite Gatabazi Jean Marie Vianney bemeza ko izo gahunda zateje Abanyarwanda imbere ku buryo hari n’abo zitera ipfunwe bakabura icyo bazinenga, bakitwaza ibindi.

Mu kiganiro cyatambutse kuri RBA mu mpera z’icyumweru gishize, Guverineri Munyatwari yakomoje kuri izo gahunda n’aho zigejeje abazigenewe bavanywe mu bukene bukabije, biciye nko muri gahunda ya VUP itanga akazi ku bafite imbaraga, abatazifite bakagenerwa inkunga y’ingoboka.

Ati “Muribaza igihugu nk’u Rwanda n’amikoro gifite uyu munsi, gifata umwanzuro wo guha amafaranga abaturage bagaragara ko ntako bameze, badafite ingufu zo gukora.”

Mu bushobozi buke bwa Leta kandi ngo yanga ko hari umuturage wayo wagira icyorezo kimuhitana.

Munyantwari ati “Ubwisungane mu kwivuza mu mwaka ushize abantu bagera kuri 25% igihugu cyabishyuriye ubwisungane mu kwivuza, abantu bageze kuri ¼ igihugu kikabishyurira ntacyo batanze. Ni ibintu bigaragaza ko guverinoma y’u Rwanda yitaye cyane ku Banyarwanda kandi ifite gahunda nziza ku batishoboye. N’utaragerwaho ahabwa icyizere ko Leta itabirengagiza, ahubwo ko ishyira ingufu mu kubazamura.”

Depite Gatabazi yavuze ko izo gahunda zateje imbere Abanyarwanda bari mu gihugu cyahereye ku busa cyiyubaka nyuma ya Jenoside yagisenye mu 1994. Kuva icyo gihe ngo ubuyobozi bwiza ntibwasinziriye mu gushakira abaturage imibereho myiza.

Ati “Burya iyo ushaka kugereranya ibintu ugomba no guhera ku mateka. Uyu munsi ni he ushobora kubona igihugu nk’u Rwanda gishobora kugura inka kikaziha abaturage? Nabibonye gusa mu Buholandi byabateje imbere bagira amata n’ibindi, [...]Uyu munsi aho inka zigeze ziteza imbere abaturage.”

Izo nka ngo zageze ku baturage benshi ku buryo muri Gakenke hari akagari gasigayemo imiryango 16 itarabona inka gatuyemo imiryango hafi Magana. Yagaragaje kandi ko mu bice bitandukanye abaturage bahawe izo nka batangiye kuzibonaho umusaruro ugaragara.

Ati “ Icyo kintu mwumve uburemere gifite! Gicumbi imiryango irenga 70% yarazihawe, amata avayo ku munsi yinjira muri Kigali arenga litiro ibihumbi 75.”

Uretse amata yinjira muri Kigali ngo hari n’andi abaturage basigarana ayo kunywa, ndetse n’ajyanwa gukorwamo ibindi biribwa n’ibinyobwa mu duce dutandukanye tutari Kigali. Ibyo byose ngo byerekana amafaranga aba mu cyaro mu mifuka y’abaturage.

Leta kandi ngo yagiye ifasha abaturage mu yindi mirimo ibateza imbere, irimo kunoza ubuhinzi.

Urugero Depite Gatabazi atanga ni inganda z’ibyayi Leta yagiye yegurira abikorera abaturage bakagiramo imigabane ingana na 30%.

Guverineri w'Intara y'Amajyepfo, Munyantwari Alphonse

Abahinzi b’icyayi muri Gicumbi ngo bari gutera imbere kuko ngo muri 2001, abahinzi bagurirwaga ku mafaranga 17 ku kiro cy’icyayi, mbere yaho bahembwa ingorofani n’amasuka, ariko ubu ngo bageze ku mafaranga hafi 200 ku kiro. Ikindi ni uko n’inganda zigitunganya hari izindi nyungu zibagenera zirimo ubwasisi.

Agaruka kuri Perezida Kagame, Depite Gatabazi yavuze ko muri manda ze abaturage bagiye bagerwaho n’ibyo byiza bitandukanye, by’umwihariko umuriro ukaba warageze kuri benshi bajyaga babona insinga zibaca hejuru.

Gatabazi ati “Iwacu aho navukiye mu murenge wa Mukarange(Gicumbi), hanyuze amashanyarazi mu 1963 ntaravuka, avuye Ntaruka ajya gucanira uruganda rwo ku Murindi. Yari ateye mu mirima yacu. Bakagutwarira ubutaka , bakakurandurira imyaka ntacyo baguhaye ariko amashanyarazi tuyabonye muri iyi manda ya Nyakubahwa Perezida wa Repubulika.”

Gatabazi yavuze ko mu dusantere two muri uwo murenge hari amashanyarazi bahawe na Perezida Kagame ubwo yabasuraga.

Ati “Akiri Visi Perezida yaje kudusura abaza abaturage niba bafite amashanyarazi bati ‘ntayo, acanira uruganda’ bo bacana udutadowa, ariko yayabagejejeho.”

Guverineri w’Intara y’Amajyepfo, Munyantwari Alphonse yavuze ko mu ntara ayoboye abaturage bazamuwe na gahunda yo guhuza ubutaka, yabanje kumvwa nabi, ariko ubu ikaba yarabagejeje ku rwego rwo gusarura umuceri mwinshi bitewe n’ingomero zivomerera ubutaka bahuje zagiye zicukurwa mu turere tugize iyo ntara.

Kwibumbira mu makoperative na byo ngo byatumye bongera umusaruro bahuza n’imbaraga bitabira Umurenge SACCO, bagurizwa amafaranga batera imbere.

Ati” SACCO ubu zibitse za miliyari z’amafaranga y’abatuye mu byaro uyateranyije, mu cyaro ntawatekerezaga ko hari amafaranga nk’ariya.”

Abahera ku mibare gusa ngo baribeshya

Abo bayobozi bavuga ko imibare atari yo yonyine ikwiye guherwaho mu kureba uburyo u Rwanda n’abarutuye bateye imbere, kuko ngo hari n’ibindi bihishe iryo terambere.

Munyantwari atanga urugero rw’amata menshi agaragara i Nyanza ku bajya bahanyura, yerekana ko yazamuye abayagurisha. Iterambere ry’u Rwanda kandi ngo rigaragazwa na raporo z’abanyamahanga zerekanye ko u Rwanda ruri mu bihugu byagabanyije intera iri hagati y’abakize n’abakennye.

Gatabazi yavuze ko mu bitagaragarira mu mibare hari abantu benshi bashobora kuba barungukiye mu iyubakwa ry’inzu nyinshi mu gihugu. Atanga urugero ko mu iyubakwa rya Kigali Convention Centre hari abaguriwe ibikoresho byayubatse, imicanga, amatafari n’ibindi.

Ati “Abakozeho, abafundi, uwagurishije umucanga, amabuye, uwahazanye ikintu cyose, bavanyemo ayabo kandi hari icyo byahinduye.”

Depite Gatabazi Jean Marie Vianney

Imiyoborere myiza kandi ngo yafashije Abanyarwanda gutera imbere mu bijyanye n’uburezi kuko ngo mbere hari umurenge washoboraga gusangamo abantu nka 20 barangije kaminuza, ariko ubu ugasanga bageze nko kuri 300.

U Rwanda mu cyerekezo kirambye cyo kwigira

Depite Gatabazi yavuze ko u Rwanda rwateye imbere no ku bijyanye n’ingengo y’imari, kuko mbere yari muri miliyoni Magana, ariko ubu ikaba igeze kuri miliyari ibihumbi kandi Abanyarwanda babigizemo uruhare.

Ati “Izo miliyari zikoreshwa mu bikorwa bijya mu baturage, iyo ngengo Leta yiyishyurira hafi 64% byayo kandi mbere harashobokaga hafi 20% cyangwa 30”. Iyo ntambwe itewe muri iki gihe cya manda ya Perezida Kagame. N’asigaye asaga 35% nayo aza mu rwego rw’abaturage kuko ni inguzanyo kandi yishyurwa n’abaturage.”

Yongeyeho ati “Inkunga zirimo na zo ni nka cumi na kangahe ku ijana, kandi tuzibona tuzikwiye kuko tuzikoresha neza. Ibyo bintu iyo ubiteranyije ni bwo ubona neza intambwe tumaze gutera.”

Aba bayobozi bavuze ko hari intambwe igikenewe guterwa, ariko ko hari abibeshya ku buryo abaturage bahawe ijambo bagakoresha uburenganzira bwabo mu gusaba gukorerwa ibikorwa byinshi gusumba ibyo bagejejweho, bakibeshya ko u Rwanda nta ntambwe rwateye.

Ku bakomeza kunenga u Rwanda ku bijyanye n’iterambere no guharanira imibereho myiza y’abaturage, ngo baribeshya kuko rukomeje mu nzira nziza ibereye Abanyarwanda.

Munyantwari ati “ Ababikora barimo ababa babigambiriye bashaka kugaragaza ko nta gikorwa, barimo ababura icyo banegura inka bati dore urwo rucebe, ariko narwo ntaruhari, urebye ibimaze kugerwaho ubigereranyije n’amikoro igihugu gifite.”

Depite Gatabazi we avuga ko bamwe mu banenga u Rwanda barimo Abanyarwanda baba hanze bagwa mu mutego wo kugereranya ibikorerwa abaturage bo mu bihugu babamo byamaze gutera imbere, abibutsa ko na byo byamaze imyaka myinshi byubaka ubwo bukungu budakwiye kugereranywa n’ubw’u Rwanda bwongeye kuzanzamuka nyuma ya 1994.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved