U Rwanda rushobora kuba igihugu cya mbere cya Afurika cyinjiye muri OECD

Yanditswe na Ishimwe Israel
Kuya 29 Kanama 2018 saa 09:09
Yasuwe :
0 0

U Rwanda rushobora kuba igihugu cya mbere cya Afurika cyinjiye mu Muryango w’Ubufatanye mu bukungu, OECD, nyuma y’ubukangurambaga buri gukorwa n’Abanya-Israel babiri.

Abanya-Israel, Yehuda Weinstein wabaye Intumwa Nkuru ya Leta na Ron Prosor wabaye Ambasaderi muri Loni bari gufasha u Rwanda mu bukangurambaga bwo kurwinjiza mu Muryango w’Ubufatanye mu Bukungu n’Iterambere, OECD (Organization for Economic Co-operation and Development.

OECD uhuriza hamwe ibihugu 36 bifite ubukungu buhagaze neza ku Isi.

Iyi mikoranire igaragaza agahenge mu mubano wa Israel na Afurika yakundaga gufasha Palestine mu ntambara n’iki gihugu.

Weinstein yatangarije The Jerusalem Post ko ari urugendo rushya rutangiye hagati ya Israel na Afurika.

Israel yaharaniye gukura agatotsi mu mubano na Afurika, yubaka umurunga ukomeye na Perezida Kagame (uyoboye Umuryango wa Afurika Yunze Ubumwe-AU) ubwo Weinstein yasuraga u Rwanda.

Nyuma yo gusoza inshingano ze nk’Intumwa Nkuru ya Leta (2010–2016), ni bwo u Rwanda rwashatse kwinjira muri OECD.

Weinstein na Prosor (Binjije Israel muri OECD mu 2010 nyuma y’imyaka itatu itegereje) bahuye na Perezida Paul Kagame na Minisitiri w’Ububanyi n’Amahanga, Louise Mushikiwabo baganira inyungu z’igihugu mu kuwinjiramo, zishingiye ku iterambere no kongera ishoramari mvamahanga.

Weinstein ati “Twarabibonye. Batweretse ubushake ko babishaka. Mu gihe gito badusabye gukorana. Bati ‘mufite ubunararibonye, mwabikoze muri Israel, mwanafasha u Rwanda kubigeraho.”

Yavuze ko ubukungu na politiki by’igihugu cyashegeshwe na Jenoside yakorewe Abatutsi byahawe umurongo n’ishoramari riva hanze ririmakazwa.

Ati “U Rwanda rwakoresheje uburyo buboneye bwo kubabarira. Twe (Israel) ntitwibagirwa, ntitunababarira. Mu Rwanda ho ‘Ntitwibagirwa ariko turababarira.’”

Weinstein yavuze ko batangiye gutanga ubusabe bw’u Rwanda muri OECD. Ari gufashwa n’abanyamategeko Ron Dror na Yael Hadad.

Weinstein yagaragaje ko Kigali iri mu mijyi isukuye, iteye imbere, inatekanye agereranya n’iy’i Burayi.

U Rwanda rusabwa ibikubiye mu ngingo eshanu zirimo kwihaza mu ishyirwaho ry’amategeko, politiki ihamye, ubutabera bwigenga, banki zitajegajega no kunoza imibanire n’amahanga. Urugendo rwo kwemererwa kwinjira muri OECD rushobora gutwara imyaka itanu.

Nta gihugu cyo muri Afurika kibarizwa muri OECD na Afurika y’Epfo yabigerageje ntiyahiriwe kuko yagonzwe n’uburyo bw’imiyoborere.

Prosor ati “Afurika ni yo idahagarariwe muri OECD. Ntekereza ko buri wese akwiye gushimira u Rwanda ku bushake bwarwo bwo kuba igihugu cya mbere kiwinjiyemo.”

U Rwanda rwemerewe kwinjira muri OECD rwasangamo Lithuania, igihugu cya 36 giheruka kuwisunga ku wa 5 Nyakanga 2018.

Mu bihugu bibarizwa muri uyu muryango harimo Leta Zunze Ubumwe za Amerika, u Bwongereza, Turikiya, u Busuwisi, u Bufaransa, Suède n’ibindi.

Yehuda Weinstein ni umwe bari gukora ubukangurambaga bugamije gufasha u Rwanda kwinjira muri uyu muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza