00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda na Angola bigiye gusinya amasezerano mashya y’ubufatanye

Yanditswe na Ntabareshya Jean de Dieu
Kuya 14 Ugushyingo 2021 saa 07:17
Yasuwe :
0 0

U Rwanda na Angola birateganya gusinyana amasezerano y’ubufatannye asaga 13 mu nzego zirimo ubutabera, guharanira uburenganzira bwa muntu, ubucukuzi bw’amabuye y’agaciro n’umutungo kamere ndetse n’ibindi.

Ibi byatangajwe na Ambasaderi wa Angola mu Rwanda, Eduardo Filomeno Barber Leiro Octavio, ubwo hizihizwaga isabukuru y’imyaka 46 Angola imaze ibonye ubwigenge, mu birori byabereye I Kigali muri Marriott Hotel ku wa Kane tariki ya 11 Ugushyingo 2021.

Nk’uko The New Times yabitangaje, Amb. Octavio yagaragaje ko umubano w’u Rwanda n’igihugu cye guhera muri 1990 ari mwiza.

Yagize ati “Angola n’u Rwanda kuri ubu dufitanye umubano mwiza, abahagarariye ibihugu byombi vuba aha barahura basinyane amasezerano asaga 13. Muri 2002 u Rwanda na Angola byasinyanye amasezerano y’ubwumvikane aho ibihugu byombi byiyemeje gufatanya mu bijyanye na Politiki hagati ya guverinoma zombi.”

Umunyamabanga wa Leta muri Minisiteri y’Ububanyi n’Amahanga mu Rwanda, Prof. Nshuti Manasseh, yavuze ko u Rwanda na Angola bisangiye byinshi bijyanye n’amateka yo kwibohora, ubutabera no guhirimbanira uburenganzira bwa muntu.

Ati “Kwizihiza iyi sabukuru ni amahirwe akomeye yo kwibuka intwari za Angola zahagurutse mu myaka 46 ishize zikarwanira ubwigenge ndetse zigategura ahazaza heza h’abaturage ba Angola. Ibyo turabibashimira. Isabukuru yanyu ibaye mu gihe mu Rwanda natwe twari tumaze igihe gito twibuka intwari z’igihugu.”

Imibanire y’ibihugu byombi ikomeje kugenda ifanta indi ntera mu ngeri zitandukanye z’imikoranire cyane ko muri 2020 byasinyanye amasezerano y’ubufatanye mu rwego rw’ubwikorezi bwo mu kirere, umutekano, ikoranabuhanga n’ishoramari.

U Rwanda na Angola bihuriye mu muryango w’ibihugu byo mu Karere k’ibiyaga bigari ICGLR, uhuriweho n’ibihugu bigera kuri 12 ari byo Angola, Burundi, Centre Afrique, Congo, Repuburika Iharanira Demokarasi ya Congo, Kenya, Uganda, Rwanda, Sudan y’Epfo, Sudan, Tanzania and Zambia.

Uhagarariye Angola mu Rwanda, Eduardo Filomeno Barber Leiro Octavio, yavuze ko ibihugu byombi bigiye gusinyana amasezerano agera kuri 13 y'ubufatanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .