Politiki ya Tshisekedi wafashwe nk’umwemeragato ku ngoma ya Mobutu na ba Kabila bombi

Yanditswe na Cyprien Niyomwungeri
Kuya 2 Gashyantare 2017 saa 11:51
Yasuwe :
0 0

Ku myaka 56 muri politiki n’indi 36 mu ruhande rutavuga rumwe n’ubutegetsi bwa Repubulika iharanira Demokarasi ya Congo, RDC, Etienne Tshisekedi, wanditse amateka akomeye yo kurwanya ubutegetsi bw’igitugu no guharanira demokarasi nta mususu, yitabye Imana atageze ku ndoto zo kuyobora miliyoni zisaga 67 z’abatuye iki gihugu.

Mu myaka 36 ishize niwe musivili wabaye umukeba w’ibihe byose ku butegetsi bwa Mobutu Sese Seko, Laurent Kabila na Joseph Kabila; Tshisekedi utaripfanaga yaguye mu bitaro bya Sainte Elizabeth mu Bubiligi azize indwara y’ibihaha ku myaka 84.

Etienne Tshisekedi wa Mulumba yavutse tariki ya 14 Ukuboza 1932, yari umuyobozi w’ishyaka ritavuga rumwe n’ubutegetsi, UDPS. Ni umwe mu banyapolitiki bari bayimazemo igihe kandi bayikora. Yakoze mu myanya myinshi ya politiki harimo no kuba Minisitiri w’Intebe wa Congo mu 1991, 1992 kugeza mu 1993 ndetse no mu 1997.

Yari umunyamategeko ukomeye kuva muri Nzeri 1961 ubwo yahabwaga impamyabumenyi y’ikirenga mu by’amategeko muri Kaminuza ya Lovanium i Kinshasa, aba Umunye-Congo wa mbere uyihawe. None ubu apfanye indoto n’agahigo.

Urugendo rwa Tshisekedi muri politiki

Ku myaka 28 gusa Étienne Tshisekedi yinjiye muri politiki nyuma y’uko Col. Joseph-Désiré Mobutu waje kwiyita Mobutu Sese Seko Kuku Ngbendu Wa Za Banga, ku nshuro ya mbere ahiritse ku butegetsi Patrice Lumumba, agirwa Komiseri Mukuru wungirije w’ubutabera.

Mu Ugushyingo 1965 nyuma ya kudeta ya kabiri ya Mobutu, Tshisekedi yabaye Minisitiri w’Umutekano aza kugirwa n’uw’ubutabera. Nyuma y’imyaka ibiri gusa yafatanyije na Mobutu gushinga ishyaka riharanira impinduka za rubanda, ‘Mouvement populaire de la révolution (MPR)’, aribera umunyamabanga wa mbere.
Tshisekedi yakunze kurangwa no kurwanya ikibi no guharanira demokarasi ndetse ntatinye no guhangara abategetsi bakomeye ku bijyanye n’ingengabitekerezo ya politki ye. Mu 1969 yigeze kwegura muri Guverinoma bitewe n’uko Mobutu yari yaranze amashyaka menshi no kutihanganira imyigaragambyo ikozwe mu nzira z’amahoro. Aha yari yababajwe n’itegeko yatanze ryo kwica abanyeshuri bo muri Lovanium bari bigaragambije kuwa 4 Kamena 1969.

Ni umwe mu banyapolitiki Congo yagize bakoranye na Mobutu bagatinyuka kumubwira ibitagenda n’ibyo akora batemeranya na we. Ubwo yari umudepite mu 1980 Tshisekedi yafatanyije n’abandi badepite 12 basinya ku nyandiko yerura kwitandukanya n’ubutegetsi bw’igitugu no kwikunda bya Mobutu, ibi ntibyabaguye amahoro kuko bahise bafatwa barafungwa.

Mu minsi ya mbere, yahoraga hafi ya Mobutu gusa haje kuzima uwatse batangira kurebana ay’ingwe

Tshisekedi mu bukeba

Ku myaka 48 gusa, Tshisekedi yatangiye umurongo mushya wo kutavuga rumwe n’ubutegetsi bwa Mobutu, aratinyuka ashinga ishyaka riharanira demokarasi n’iterambere ry’abaturage, UDPS mu 1982, ariryo rya mbere mu mateka ya Repubulika Iharanira Demokarasi ya Congo ritavuga rumwe n’ubutegetsi.

UDPS yahise yigarurira imitima ya benshi mu duce twa Kasaï na Kinshasa cyane cyane urubyiruko n’ubu rwiyemeje kurigwa inyuma.

Mu nyandiko y’ubuzima bwe yiyandikiye, Tshisekedi avuga ko muri rusange kuva mu 1979 kugeza 1999 ubuzima bwe, umuryango we n’inshuti ze muri politiki bwabaye inzira y’umusaraba y’uruvange rwo gufungwa, gukorerwa iyicarubozo, guterwa ubwoba, gufatirwa ibihano, kumanurwa mu ntera n’ibindi.

Gusa nubwo yatotezwaga byo muri politiki, yanagendaga ahabwa imyanya ikomeye kuko yagizwe Minisitiri w’Intebe inshuro enye ku butegetsi bwa Mobutu, ariko ntamareho kabiri. Nko mu 1992 yabaye Minisitiri w’Intebe amezi arindwi gusa no mu 1997 aritabazwa ngo azibe icyuho ubwo Mobutu yarwaraga, aba Minisitiri w’Intebe iminsi irindwi gusa kuva kuwa 2 kugeza 9 Mata 1997.

Tshisekedi ku ngoma ya Kabila

Nyuma yo kuva ku butegetsi kwa Mobutu, Tshisekedi ntiyorohewe na Laurent Désiré Kabila wari ubufashe kuko yarwanyaga inzira zo gufata ubutegetsi ku ngufu agashyigikira amatora anyuze mu mucyo no mu bwisanzure. Mu mbwirwaruhame ya mbere Étienne Tshisekedi yavuze icyo gihe, yahamagariye abaturage kurwanya umunyagitugu mushya ufashe ubutegetsi.

Ibi byatumye Kabila amwigizayo ariko ntiyateshuka ku ngengabitekerezo ye. Mu 2003 yasabwe kujya muri Guverinoma y’inzibacyuho arabyanga. Yaranzwe no kutarya indimi mu 2006 we n’ishyaka rye berura ko batanyuzwe n’ibyavuye mu matora y’Umukuru w’Igihugu, bavuga ko yabayemo uburiganya ndetse ko yibwe mbere y’uko akorwa.

Mu 2011 yagarukanye imbaraga zidasanzwe yiyamamariza kuba Perezida ariko atsindwa na Joseph Kabila wagize amajwi 48, 9% we agira 32, 3%. Ni amatora yamaganiye kure ibyayavuyemo atangaza ko ariwe Perezida.

Arinze apfa agihanganye na Kabila muto nyuma ya se

Urupfu rwe ruvuze iki kuri politiki ya Congo?

Urupfu rwa Tshisekedi, rwateye agahinda n’amarira miliyoni z’Abanye-Congo bamufataga nk’umubyeyi none bakaba bumva ko basigaye ari imfubyi.

Mu ruhande rwa politiki, ni icyuho gikomeye kuko yagombaga gufata umwanya w’imbere mu kanama k’inzibacyuho kemeranyijweho mu Ukuboza umwaka ushize, akaba yagombaga kurongora umugambi wo gutuma Perezida Kabila ava ku butegetsi uyu mwaka no kumubuza kongera kwiyamamaza.

Abasesenguzi bagasanga urupfu rwe rushobora guca intege ihuriro ry’abatavuga rumwe n’ubutegetsi bamukeshaga byinshi cyane cyane ibitekerezo n’igitsure, bikaba byatuma bacikamo ibice ntibakomeze inzira batangiye.

Ni umugabo utarigeze anyurwa na Politiki y’abayoboye Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza