Ni nde ukwiye kuryozwa iyicarubozo rikomeje gukorerwa Abanyarwanda muri Uganda?

Yanditswe na IGIHE
Kuya 6 Kanama 2019 saa 04:02
Yasuwe :
0 0

Byatangiye abantu benshi babikerensa, babifata nk’ibihuha cyangwa se igipindi kigamije kwangisha abanyarwanda Uganda, ariko uko iminsi yagiye ishira niko uwari umuturanyi mwiza yahindutse mubi wo kwirindwa.

Umubano wa Uganda n’u Rwanda uhera kera no ku ngoma z’Abami aho igihugu kimwe cyabaga gishaka kwigarurira akarere; ayo ni amateka si ibya none cyangwa se ibitekerezo bishingiye ku biba muri iki gihe.

Mu myaka ya vuba, intango y’amahari ihera mu myaka ya za 1996. Mu mwaka wa 1998 nibwo ikimenyetso gikomeye gihamya umugambi mubisha wa Uganda ku Rwanda cyigaragaje ubwo Uganda yahaga ubufasha Seth Sendashonga wari warabaye muri Guverinoma y’Ubumwe nyuma ya Jenoside yakorewe Abatutsi, washakaga kurema umutwe w’inyeshyamba ndetse akagaba ibitero ku Rwanda.

Uyu mugabo yagiranye inama n’abayobozi ba Uganda, bacurira muri Kenya umugambi wo gushaka gukuraho ubutegetsi bw’u Rwanda aho umuvandimwe wa Museveni, Salim Saleh, ariwe wari ubirimo byose akora ibyo yasabwe na mukuru we.

Kuva icyo gihe hakunze kuba ibindi bikorwa byo kugirira nabi u Rwanda aho iki gihugu cyabaye ubuhungiro bw’abagomereye u Rwanda, kugeza magingo aya bakifuza kurusubiza ahabi.

Ibi bishimangirwa n’imikoranire ya Uganda n’imitwe irimo RNC, FLDR, FNL n’indi igamije guhungabanya umutekano w’u Rwanda, ndetse n’uburyo itangazamakuru ry’iki gihugu rivugira abahunze u Rwanda kubera amakosa n’ibyaha binyuranye.

Ibintu byaje gufata indi ntera mu 2017, ubwo abanyarwanda batangiye gufatwa, bagafungwa, abandi bakameneshwa. Nta muntu watekerezaga ko byagira ubukana bifite uyu munsi aho abarenga igihumbi birukanwe muri Uganda nyuma yo kumara igihe kinini ku ngoyi muri gereza, bakorerwa iyicarubozo ryanaviriyemo bamwe ubumuga bukomeye.

Icyo gihe abanyarwanda batangiye kwirukanwa muri Uganda bashinjwa kutagira ibyangombwa, uwigeze kubaho umusirikare mu ngabo z’u Rwanda ariko ukirukunda ahigwa bukware, abandi bazizwa ko hari abo baziranye nabo mu Rwanda, bikomeza bityo bigera no ku muhinzi wihitira.

Ishimutwa n’iyicarubozo rikorerwa abanyarwanda ryatuma kandi abantu bibaza ibibazo byinshi. Ni ibintu biteye inkeke uburyo abarenga igihumbi birukanwe muri Uganda bagizwe intere, ariko Imiryango Mpuzamahanga ivuga ko irengera uburenganzira bwa muntu nka Human Right Watch na Amnesty International zikaba zararuciye ikarumira mu gihe idasiba gukora raporo zisiga icyasha u Rwanda ariko zikubiyemo kenshi ibinyoma. Uku kubogama cyangwa kutagira icyo ikora, nako kwakwibazwaho byinshi.

Hari benshi bari bakwiye kubazwa ibi byose ndetse bakanabiryozwa binyuze mu nzira z’ubutabera ndetse n’izindi nzira zose zishoboka, kuko amakuru yagiye atangwa n’abanyarwanda bagizweho ingaruka n’ibyo bakora, abagarukaho neza.

Gusa muri iyi nkuru, turaza kuvuga kuri bamwe, nubwo hari benshi bireba.

- Perezida Yoweri Museveni

Uyu musaza w’imyaka 74 abadakurikirana neza ibijyanye n’umubano w’u Rwanda na Uganda, ntibari bazi uwo ariwe. Bamubona mu isura y’umugabo mwiza waje i Kigali agakora umuganda, agasobanura uburyo abanyarwanda n’abaturage ba Uganda ari abavandimwe [ubwo yari muri Serena Hotel mu 2011] ndetse agahamagara n’umukobwa we kugira ngo aganirize abari bahari mu Kinyarwanda.

Bene uyu muntu ntako aba asa, ariko ku rundi ruhande ni nka cya kirura kuko rimwe na rimwe ibikorwa bye byakwereka ko nta wagutera aturutse iwe.

Ubuhamya bw’abanyarwanda batandukanye bwagiye bugaragaza uyu mugabo ko azi neza ibikorwa bibi bikorerwa abanyarwanda ndetse ko ari nawe utanga amabwiriza y’igikwiye gukorwa.

Mu minsi ishize haherutse kujya hanze amakuru avuga ku nama Museveni yagiranye n’abayobozi bakuru b’ingabo, havamo ko hemejwe guhangana n’u Rwanda.

Ikindi kandi ni uko yemeye ko yagiranye ibiganiro n’abantu babiri barimo Charlotte Mukankusi ushinzwe dipolomasi muri RNC na Eugene Gasana uheruka kwinjira muri uyu mutwe, aho amakuru ahamya ko yabemereye ubufasha mu bikorwa byabo byo guhungabanya umutekano w’u Rwanda.

Uyu mugabo yari akwiye kubazwa buri kimwe kijyanye n’uruhare rw’igihugu cye mu guhohotera abanyarwanda, kuko yabimenyeshejwe inshuro nyinshi n’u Rwanda, ariko akagenda biguru ntege ndetse inshuro nyinshi mu mbwirwaruhame ze yumvikanye agaragaza urwango afitiye u Rwanda mu marenga akavuga ko ari ‘guhandura amavunja’.

Perezida Yoweri Kaguta Museveni

- Gen Henry Tumukunde

Uyu mugabo wasezerewe mu ngabo, kugeza mu 2018 yari Minisitiri w’umutekano. Kayumba Nyamwasa yatorotse u Rwanda mu gihe uyu mugabo yari ku ibere mu gisirikare cya Uganda ndetse ni mu mwaka yabonyemo Impamyabumenyi mu bijyanye n’amategeko.

Gen. Tumukunde yubatse umubano ukomeye na Kayumba ku buryo baganiraga ku migambi yose ye. Byigeze kuvugwa ko inzego z’iperereza z’u Rwanda zabonye ibiganiro Gen.Tumukunde yagiranye na Kayumba Nyamwasa bigaraza ubushuti buhamye bafitanye.

Mu rubanza rw’umunyarwanda Rutagungira; izina rya Gen. Tumukunde ryagarutsweho aho umwunganizi we Aaron Kizza, yagaragaje mu buryo bweruye uko umukiliya we yakorewe iyicarubozo n’uwari Minisitiri w’Umutekano, Lt. Gen. Henry Tumukunde kugira ngo yemere ko yafatanyije n’Uwari Umuyobozi Mukuru wa Polisi, Gen. Kale Kayihura, gushimuta no kunyereza Abanyarwanda baba muri Uganda.

Icyo gihe Kizza yabwiye inteko iburanisha ati “Ni nde wababwiye ko hari amazina akomeye kuri njye ku buryo ntayavuga? Niba umukiliya wanjye ambwiye ko Brig. Kandiho na Gen.Tumukunde, bamukoreye iyicarubozo bakanamufunga amezi mu buryo bunyuranyije n’amategeko muri Gereza ya Gisirikare ya Mbuya, kugira ngo ashyire mu majwi IGP na Perezida Paul Kagame.”

Gen Henry Tumukunde yabaye Minisitiri w’Umutekano muri Uganda kugeza mu 2018

- Abel Kandiho

Brig. Gen. Abel Kandiho akuriye Urwego rw’Ubutasi mu Gisirikare, nawe ni umwe mu bagiye bashyirwa mu majwi inshuro nyinshi ku gukorera iyicarubozo abanyarwanda.

Nko mu rubanza rwa René Rutagungira, yagarutsweho aho uyu mugabo yamushinjaga kumutera ubumuga.

Kandiho kandi yagiye agarukwaho cyane mu birebana n’Abanyarwanda bashaka guhungabanya ubutegetsi bw’u Rwanda banyuze mu mitwe ya RNC, FDLR na FLN, ndetse n’abagiye bafatwa bari gutegura iyi migambi mibisha bagiye babyemera. Uheruka ni Nsabimana Callixte ‘Sankara’ ufunzwe ashinjwa ibyaha by’iterabwoba n’ubwicanyi.

Uyu Kandiho yanashinjwe kuba ku ruhembe rw’iyicarubozo rikomeje gukorerwa Abanyarwanda muri Uganda binyuze muri CMI, urwego rushinjwa gukorana bya hafi n’umutwe wa RNC ya Kayumba Nyamwasa mu gushaka abayoboke muri Uganda, binyuze ku bantu batandukanye barimo Kayumba Rugema.

Mu rubanda rwa Nsabimana Callixte ‘Sankara’ yahishuye ubufasha Brig General Abel Kandiho yari yaramwemereye, aho ngo abo bakoranaga mu mutwe wa FNL bagiye muri Uganda, basanga Kandiho yagize izindi gahunda, aboherereza Colonel ushinzwe iperereza ryo hanze.

Bamusabye ibikoresho bya gisirikare n’ubufasha muri dipolomasi ndetse intumwa ze zavuyeyo zivuga ko ngo "ubufasha twasabaga babutwemereye”.

Brig. Gen. Abel Kandiho akuriye Urwego rw’Ubutasi mu Gisirikare

- Ruhakana Rugunda

Ruhakana Rugunda ni Minisitiri w’Intebe wa Uganda kuva muri Nzeri 2014, akaba umuntu wa hafi wa Perezida Museveni guhera mu ntambara yo kubohora Uganda, ndetse yanagize imyanya myinshi ikomeye muri Guverinoma ya Uganda.

Ni umwe mu bantu bakabaye bumva neza ikibazo cy’umubano w’u Rwanda na Uganda ashingiye ku mateka azi yaranze ibihugu byombi, ndetse biragoye ko hakwemezwa umurongo wo gutoteza Abanyarwanda bikozwe n’inzego nkuru z’igihugu, uyu atabizi n’inshingano afite.

Muri Gashyantare yigeze kubwira abaturage ba Uganda ko bakwiye gutuza, ko ikibazo cy’u Rwanda na Uganda kizakemuka mu minsi mike, nubwo nta gihe yatanze cyangwa ngo avuge ko igihugu cye kirimo kubikoraho.

Icyiyongera kuri ibi, nta cyo Guverinoma yigeze ikora, nibura ngo ishyire igitutu ku nzego nkuru za leta kugira ngo zibazwe ibibazo biri mu mubano w’u Rwanda na Uganda, ahubwo abaminisitiri benshi bumvikanye baca ku ruhande ibintu, ku buryo nta n’umwe ujya uvuga ku iyicarubozo rikorerwa abanyarwanda.

Ibi bishimangirwa n’uburyo abaminisitiri muri Guverinoma ye, bagiye bahura n’abashaka kugirira nabi u Rwanda, umwe ku wundi, bakabemerera ubufasha. Wakwibaza niba nka Minisitiri w’Intebe ntacyo abiziho ku buryo mu mvugo ze ayobya uburari agaragaza ko ikibazo kiri hagati y’u Rwanda na Uganda ari ikijyanye n’umupaka.

Nko ku wa 14 na 15 Ukuboza 2018, abayobozi bakuru mu nzego z’umutekano muri Uganda ndetse n’abo hejuru mu mutwe wa RNC n’uwa FDLR bahuriye i Kampala muri Uganda ku butumire bwa Perezida Yoweri Kaguta Museveni.

Umuhuzabikorwa w’iyo nama yari yatumijwe na Museveni yari Umunyamabanga wa Leta muri Minisiteri y’Ububanyi n’Amahanga muri Uganda, Philemon Mateke. Mateke yarabakiriye, basangira ifunguro rya mu gitondo ndetse anababwira ku mikoranire na RNC, Uganda ibifuzaho.

Ruhakana Rugunda ni Minisitiri w’Intebe wa Uganda kuva muri Nzeri 2014

-  Maj Gen Kahinda Otafiire

Maj Gen Kahinda Otafiire ni Minisitiri w’Ubutabera wa Uganda. Uyu mugabo ni umwe mu bakwiye kubazwa ibijyanye n’iyicarubozo rikorerwa abanyarwanda kuva mu 2017.

Mu nshingano ze harimo kugenzura ko Itegeko Nshinga ry’Igihugu cye ryubahirizwa, kandi ryanditsemo ko ‘iyicarubozo rinyuranyije n’amategeko’.

Ni umwe mu bantu bazi neza ingingo ku yindi mu zanditse mu Itegeko Nshinga, kuko ari umwe mu baryanditse mu 1995 bityo azi ibyo ribuza n’ibyo ryemera.

Abanyarwanda baratatse, barahogora, bagaragaza ko bakorerwa iyicarubozo. Uyu mugabo nta na kimwe yavuze usibye gushimangira ko “nta munyarwanda wafashwe nabi”, by’agahomamunwa yanga no kugira uwo arema agatima nibura ngo atangize iperereza rireba ku bibazo bagaragaje.

Ni umugabo watsimbaraye cyane ku kuvuga ko ibibazo biri hagati y’u Rwanda na Uganda, bishingiye ku mupaka wafunzwe [nubwo utigeze unafungwa nk’uko bivugwa], yirengagiza n’ubuhamya bw’abamugaye kubera iyicarubozo; kuri we bisa n’aho baguye nko mu mukoki bakavunika batembera.

Maj Gen Kahinda Otafiire ni Minisitiri w’Ubutabera wa Uganda

-  Martin Okoth Ochola

Martin Okoth Ochola w’imyaka 60, ni Umuyobozi Mukuru wa Polisi ya Uganda kuva muri Werurwe 2018. Yagiye ku buyobozi n’ubundi ibibazo byo guta muri yombi abanyarwanda byaratangiye.

We n’abapolisi ayoboye nta na kimwe bigeze bakora ngo bihoshe, ahubwo byakomeje uko byakabaye ndetse bikaza umurego.

Kuva yafata ubuyobozi, hakwiriye amakuru y’uko Abanyarwanda bafatwa bagakorerwa iyicarubozo, ariko nta na kimwe yigeze abivugaho cyangwa ngo agaragaze ubushake bwo gukemura iki kibazo.

Umuvugizi wa Polisi ya Uganda, Fred Enanga, ni umuntu ukunze kuvuga ku gikorwa cyose kireba Polisi, ariko nta na rimwe aravuga ku banyarwanda bafatwa n’inzego z’umutekano, bagakorerwa iyicarubozo ku buryo bagaruka mu gihugu baragizwe intere.

Umuyobozi Mukuru wa Polisi ya Uganda, Martin Okoth Ochola

- Kayumba Nyamwasa

Kayumba Nyamwasa wabaye umusirikare mukuru mu ngabo z’u Rwanda, ubu ni umwe mu barwanya ubutegetsi ndetse inshuro nyinshi, yashinjwe kugira uruhare mu bikorwa byo guhungabanya umutekano w’u Rwanda birimo ibitero byagabwe mu Rwanda binyuze muri gerenade zatewe mu bice bitandukanye mu Rwanda guhera mu 2010.

Muri Gashyantare 2010 nibwo Uganda yohereje itsinda riyobowe na Gen. Salim Saleh na Gen. Kale Kayihura wari Umuyobozi Mukuru wa Polisi, kwakira Kayumba Nyamwasa wari uhungiye muri Uganda akaza gufashwa gukomereza muri Afurika y’Epfo.

Mu Ukuboza 2018 raporo y’Itsinda ry’impuguke z’Umuryango w’Abibumbye yemeje ko Uganda ari icyanzu gihurizwamo ibikorwa bya “P5”, ihuriro ry’imitwe yitwaje intwaro rikorera muri RDC riyoborwa na Kayumba Nyamwasa rinabarizwamo RNC ye.

Ni kenshi Abanyarwanda bagiye birukanwa nabi muri Uganda nyuma yo gufungwa bakanakorerwa iyicarubozo, batanze ubuhamya bw’uburyo ibyababayeho byose byakozwe bari muri kasho za CMI. Hari n’abasabiwemo kujya mu mitwe irimo uwa Kayumba Nyamwasa ngo boroherezwe, hakaba n’abahitaga burizwa imodoka nk’uko ubuhamya bubivuga.

Nka Jean Claude Mucyo w’imyaka 28, ntazibagirwa ijoro ryo ku wa Kabiri tariki 29 Mutarama 2019. Uwo niwo munsi yashimuswe na CMI.

Mu itotezwa no kubabazwa ku mubiri, yaje kumenya ko hari isano bifitanye na Kayumba Nyamwasa na RNC. Umwe mu bo bari bafunganywe witwa Rugengamanzi ngo yakomezaga kumubwira ngo yemere ko azajya mu ngabo za Kayumba niba ashaka kurokoka.

Kayumba Nyamwasa wabaye umusirikare mukuru mu Ngabo z’u Rwanda ari mu barwanya ubutegetsi

- Salim Saleh

Salim Saleh ni murumuna wa Perezida Museveni, akaba umwizerwa we guhera no mu gihe cy’intambara yo kubohora Uganda.

Ni umuntu byagiye bigaragara ko aba ari mu migambi yose ya Perezida Museveni, utaretse n’igamije kugirira nabi u Rwanda. Uyu ari mu bakiriye abanyarwanda benshi bafite imigambi mibisha ku Rwanda bahungaga igihugu banyuze muri Uganda, bagahabwa n’uburinzi ngo badatahurwa n’ubwo ibyabo byagiye bijya hanze.

Ni umwe mu bahungishije Kayumba Nyamwasa ndetse haheruka kujya hanze amakuru y’uburyo ari umwe mu bafatanyabikorwa ba Tribert Rujugiro mu bucuruzi muri Uganda, ari nabwo buvamo inkunga zishyigikira ibikorwa bigamije guhungabanya umutekano w’u Rwanda nk’ibya RNC.

Umwanditsi Gerard Prunier yanditse uburyo mu 1988, Seth Sendashoinga wari umaze kunaniranwa na guverinoma y’u Rwanda kuko atari ashobotse, yagiranye inama n’Abanya-Uganda yanitabiriwe na bamwe mu basirikare bakuru muri icyo gihugu barimo na murumuna wa Perezida Museveni, Gen Salim Saleh.

Gen Salim Saleh yari ashyigikiye igitekerezo cyo gufasha undi mutwe wifuza kwinjira mu mukino wo guhungabanya umutekano w’u Rwanda. Imigambi nk’iyo nubwo yagiye ipfuba, yerekana ko nta mutima wo kurengera Abanyarwanda yagira mu gihe bakomeje gutotezwa, ndetse n’uburyo ari uw’ibanze mu butegetsi, bituma nta kibi cyo ku rwego nk’uru cyaba atabizi.

Salim Saleh ni murumuna wa Perezida Museveni

- Rujugiro Tribert

Rujugiro Tribert ni umwe mu banyarwanda bahunze igihugu bafite ibyaha baregwa birimo kunyereza imisoro kugeza imitungo ye ifatiriwe ndetse igatezwa cyamunara, irimo inyubako yitwaga UTC.

Nyuma yo guhunga yakoranye bya hafi n’abarwanya ubutegetsi bw’u Rwanda ndetse mu minsi ishize yahawe rugari azamura ishoramari rye muri Uganda, ahabaye indiri y’abagamije guhungabanya umutekano w’u Rwanda.

Mu makuru aheruka kujya hanze ni uko yahaye imigabane mu bikorwa bye murumuna wa Museveni Gen Salim Saleh kugira ngo yidegembye ari nako atera inkunga ibikorwa bigamije guhungabanya umutekano w’u Rwanda bikomeje gusuganyirizwa muri Uganda.

Amafaranga y’uyu mugabo kandi akoreshwa mu bikorwa binyuranye by’ubukangurambaga bugamije guharabika u Rwanda binyuze mu itangazamakuru, aho abatavuga rumwe n’u Rwanda abishyurira amafaranga maze ibinyamakuru byo muri Uganda bikabaha ijambo.

Mu gihugu kirimo abantu nk’aba, biragoye ko Umunyarwanda utumva ibintu kimwe nabo cyangwa udashaka kubiyungaho yagira amahoro, ari nayo mvano ya benshi batotezwa badashaka kujya muri iyo mitwe, abandi bakazizwa ubusa bitwa ko ari intasi z’u Rwanda kandi ari abasivili bagiye kwishakira ubuzima.

Rujugiro Tribert wahunze igihugu akajya gukorana n’abarwanya ubutegetsi bw’u Rwanda
Perezida Museveni ari ku isonga ry'abakwiye kubazwa ibijyanye n'iyicarubozo rikorerwa abanyarwanda mu gihugu cye. Mu bandi bakwiye kubazwa harimo nka: [Uhereye hejuru ku ifoto:] Brig Gen Abel Kandiho, Gen Henry Tumukunde, Ruhakana Rugunda, Gen Maj Kahinda Otafiire, Martin Okoth Ochola, Kayumba Nyamwasa, Salim Saleh na Rujugiro Tribert

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza