Kuryumaho k’u Bubiligi kuri Twagiramungu uhamagarira abantu kujya mu mutwe w’iterabwoba kwamaganiwe kure

Yanditswe na Musangwa Arthur
Kuya 2 Ukuboza 2019 saa 10:50
Yasuwe :
0 0

Hanze aha benshi bakomeje kwamagana bikomeye uburyo Guverinoma y’u Bubiligi icumbikiye Faustin Twagiramungu n’inzego z’umutekano z’icyo gihugu bikomeje kuruca bikarumira nyuma y’aho uyu mukambwe agaragaye ari kuvuga amagambo akangurira abanyarwanda kuyoboka umutwe w’iterabwoba FLN ndetse anabasaba kurwanya leta y’u Rwanda hifashishijwe intwaro n’ibindi bikorwa by’ubugizi bwa nabi.

Si ubwa mbere Twagiramungu atangaje amagambo atavugwaho rumwe bigatera benshi kumwamaganira kure kuko n’umwaka ushize yagiye kuri Twitter yandika ko Jenoside mu Rwanda yakozwe na FPR hamwe n’Ingabo zari iza FAR. Icyo gihe yokejwe igitutu ku mbuga nkoranyambaga biratinda.

Ubushinjacyaha bw’u Rwanda nabwo icyo gihe bwatangaje ko bwiteguye gukora iperereza ku magambo ya Faustin Twagiramungu uba mu buhungiro mu Bubiligi, kuko ashobora kuba agize ibyaha byo gupfobya Jenoside.

Muri Kamena uyu mwaka, Twagiramungu w’imyaka 74 yinjiye ku mugaragaro mu ihuriro MRCD riyobowe na Paul Rusesabagina, mu bufatanye bwiswe ubwo guhuza imbaraga mu kurwanya ubutegetsi bw’u Rwanda, hakoreshejwe inzira zose.

Iryo huriro rishamikiyeho umutwe w’inyeshyamba wa FLN wagiye wigamba inshuro nyinshi kugaba ibitero by’iterabwoba ku baturage mu Ntara y’Amajyepfo n’Iburengerazuba bigahitana bamwe. FLN kandi irimo abahoze muri FDLR, biganjemo abasize bakoze Jenoside yakorewe Abatutsi.

Twagiramungu yahise agirwa Visi Perezida wa MRCD aba n’umuvugizi wayo.

Ku mbuga nkoranyambaga guhera kuri iki cyumweru, hatangiye gukwirakwiza igice cy’amashusho agize ikiganiro Twagiramungu yagiranye na bimwe mu binyamakuru bishamikiye ku barwanya Leta y’u Rwanda baba mu mahanga.

Ni amashusho arimo amagambo akarishye, ahamagarira abanyarwanda kwinjira mu mutwe wa FLN.

Umunyamakuru yumvikana abaza Twagiramungu ati “Ubwo murasaba abanyarwanda gusanga FLN ngo nabo bajye kurwana?”

Twagiramungu yamusubije agira ati “Cyane. Ndabivuga ndanguruye ijwi cyane. Ntabwo dushobora gupfa nk’ibimonyo. Yafashe intwaro azifatishije amaboko abiri, twe tuzazifatisha amaboko abiri twongereho ahari n’izindi ngufu.”

Mu bagaragaje ko Twagiramungu akabije kurengera, ku isonga harimo Umunyambaganga wa Leta muri Minisiteri y’Ububanyi n’Amahanga, Amb Olivier Nduhungirehe.

Abinyujije kuri Twitter yagize ati “Ntabwo bikwiriye kubona umuntu utuye ku butaka bw’u Bubiligi ahamagarira ku mugaragaro abanyarwanda kwinjira mu mutwe witwaje intwaro uri guteza umutekano muri RDC no mu karere.”

Ubwo butumwa bwa Nduhungirehe bwakurikiwe n’ubundi butandukanye, bwose busaba Guverinoma y’u Bubiligi gufata Twagiramungu amagambo avuga akayasobanura imbere y’ubutabera.

Umuyobozi mu Rwego rw’Igihugu rw’Imiyoborere (RGB) Ushinzwe Imitwe ya Politiki n’Imiryango Itari iya Leta, Justus Kangwagye yagize ati “Kwita kuri ibi cyangwa kutabyitaho k’u Bubiligi, nibyo bizagaragaza aho buhagaze.”

Uwitwa Jules Kayitsinga yagize ati “Ariko ko avugira i Bruxelles, naze ajye gufata iyo mbunda maze arebe uko bamubagira ibisiga dayimoni ze zikagenda zigiye dore ko bizi gushukana gusa byo byibereye i Burayi. Uyu Twagiramungu akwiriye gutabwa muri yombi sinzi icyo Guverinoma y’u Bubiligi itegereje.”

Kanangire Christian na we akoresheje Twitter, yavuze ko bibabaje kuba Twagiramungu akomeje kuvuga amagambo nk’ayo, ubutegetsi bw’u Bubiligi abamo bwicecekeye.

Yagize ati “Minisiteri y’ububanyi n’amahanga y’u Bubiligi yaba izi ko umuturage wabo Faustin Twagiramungu ari guhamagarira abantu kujya mu bikorwa bihungabanya umutekano w’u Rwanda? Byaba se byemewe n’amategeko y’u Bubiligi? Amaze igihe kinini mu bikorwa bigamije guhungabanya u Rwanda ariko ntabibazwe na Guverinoma y’u Bubiligi n’inzego zishinzwe umutekano.”

Damien Nkaka we yavuze ko biteye isoni ku muntu nka Twagiramungu, ushuka urubyiruko kureka gukora ibiteza imbere igihugu ngo bajye mi ishyamba, mu gihe abana be bo bameze neza.

Ati “Umukuru mubi Rukokoma! Wiyemeje gushora urubyiruko mu ntambara wigaramiye i Burayi! Ngaho rero murusome urwo mwashigishe! Ikibabaza ni abo mushora mu ntambara abanyu biga za Burayi za Amerika, abandi mubakiniraho Politiki y’amabwa.”

Si ubwa mbere abanyarwanda bagaragaje ko u Bubiligi busa nk’ubwabaye ikibuga cy’abategura ibikorwa bigamije guhungabanya umutekano w’u Rwanda. Icyo gihugu cyavuzweho kenshi kwemerera bamwe mu banyarwanda bahaba kujya gusura no gukora ubukangurambaga bugamije inkunga zo gufasha imitwe y’iterabwoba n’indi ifite intego yo guhirika ubutegetsi bw’u Rwanda ku mbaraga.

Ku bijyanye n’ibyo Twagiramungu ashinjwa, mu gitabo cy’amategeko ahana ibyaha mu Rwanda, ingingo ya 200 ivuga ko umuntu wese urema umutwe w’ingabo utemewe, ushishikariza abandi kuwujyamo, utuma uremwa cyangwa ugirana amasezerano na wo, abikoresheje impano, igihembo, iterabwoba, igitugu cyangwa kwizezwa izindi nyungu abigirira gushyigikira igitero cy’intambara cy’ingabo zindi zitari izemewe z’igihugu aba akoze icyaha. Iyo abihamijwe n’urukiko, ahanishwa igifungo kitari munsi y’imyaka icumi (ariko kitarenze imyaka cumi n’itanu.

Ingingo ya 204 ivuga ko umuntu wese, mu ruhame, ukoresha imvugo, inyandiko z’ubwoko bwose, amashusho cyangwa ibimenyetso by’amoko yose, bimanitswe, bitanzwe, biguzwe cyangwa bigurishijwe cyangwa bitangajwe mu bundi buryo bwose, uwangisha rubanda ubutegetsi buriho, utera imvururu mu baturage ashaka ko basubiranamo cyangwa utera rubanda intugunda ashaka kubyutsa imidugararo muri Repubulika y’u Rwanda, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka icumi ariko kitarenze imyaka cumi n’itanu.

Twagiramungu yabaye Minisitiri w’Intebe w’u Rwanda nyuma ya Jenoside yakorewe Abatutsi, ageza mu 1995 ubwo yeguraga. Yahungiye mu Bubiligi agaruka mu 2003 aje kwiyamamariza umwanya w’Umukuru w’Igihugu nk’umukandida wigenga, gusa aza gutsindwa aho yagize amajwi 3.62% mu gihe Perezida Paul Kagame yagize 95.0%.

Twagiramungu yasabiwe gufatwa kubera amagambo ahamagarira abanyarwanda kujya mu mutwe w'iterabwoba yavuze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza