Kabila azi ko hari umurongo ntarengwa: Umwuka hagati ya Tshisekedi na Kabila mu mboni z’umusesenguzi

Yanditswe na Ferdinand Maniraguha
Kuya 4 Gashyantare 2021 saa 05:35
Yasuwe :
0 0

Guhera umwaka ushize, muri Politiki ya Repubulika Iharanira Demokarasi ya Congo hatangiye kuzamuka umwuka mubi hagati y’Impuzamashyaka CACH ya Perezida uriho Félix Tshisekedi n’impuzamashyaka FCC ya Joseph Kabila wahoze ari Perezida.

FCC ya Kabila niyo yari ifite ubwiganze mu Nteko Ishinga Amategeko imitwe yombi ndetse no muri Guverinoma. Byatumaga gahunda nyinshi Perezida Tshisekedi ashaka ko zitambuka zirimo ibyo yemereye abaturage yiyamamaza, zidatambuka mu gihe cyose atabyumva kimwe n’uruhande rwa Kabila.

Hari ababyuririragaho bakavuga ko Tshisekedi yahawe umwanya ariko ubutegetsi bugasigara mu biganza bya Kabila.

Ibintu byarushijeho gukara umwaka ushize muri Nyakanga ubwo Tshisekedi yashyiragaho abacamanza batatu bashya mu rukiko rurengera itegeko Nshinga, akabikora atagishije inama uruhande rwa Kabila.

Byongeye gukomera ubwo Tshisekedi yacungaga Minisitiri w’Intebe Sylvestre Ilunga Ilunkamba adahari, abo bacamanza bakemezwa na Minisitiri w’Intebe wungirije Gilbert Kankonde.

Mu mpera z’umwaka ushize, Tshisekedi yatangaje ko asheshe umubano wari hagati y’impuzamashyaka ye n’iya Kabila, avuga ko agiye gushyiraho umuhuza umufasha gushakisha ubwiganze mu Nteko Ishinga Amategeko, ku buryo Abadepite benshi baba ku ruhande rwe aho kuba ku rwa Kabila.

Senateri Modeste Bahati Lukwebo ni we wahawe inshingano zo gufasha Tshisekedi kumvisha abagize Inteko kugira ngo binjire mu uhuriro rishya rya Tshisekedi yise Union sacrée.

Mu cyumweru gishize, Lukwebo yashyikirije Tshisekedi raporo, amugaragariza ko mu badepite 500 bagize Inteko, abasaga 390 bemeye kwihuza nawe mu ihuriro rishya Union sacrée. Ni umubare munini kuko FCC ya Kabila yayoboraga Inteko kuko yari ifite abadepite 350.

Muri icyo cyumweru kandi ni nabwo Minisitiri w’Intebe Ilunkamba yaterewe icyizere n’Inteko, ashyikiriza Tshisekedi ubwegure bwe na Guverinoma ye. Byahaye Tshisekedi ububasha bwo gushyiraho Guverinoma ye nshya yiganjemo abo bahuje ibitekerezo.

IGIHE yaganiriye n’umusesenguzi muri Politiki ya Congo, akaba n’umwarimu muri Kaminuza ya Likasi, Eloge Mwandwe, asobanura aho abona Politiki ya Congo yerekeza muri iki gihe, n’ibindi bibazo byibazwa.

IGIHE: Hashize iminsi Perezida Tshisekedi ashyikirijwe raporo y’umuhuza (informateur), ubu harakurikiraho iki?

Mwandwe: Vuba aha hazashyirwaho biro politiki nshya y’Inteko Ishinga Amategeko. Hashingiwe ku Itegeko Nshinga ryacu, Perezida agiye gushyiraho Minisitiri w’Intebe mushya aturutse mu banyapolitiki bagize ihuriro rishya.

IGIHE: Bivugwa ko ihuriro Union Sacrée rigamije guca intege Kabila, ubusanzwe ni ikihe kibazo yari ateje Tshisekedi?

Mwandwe: Ihuriro rishya rifite ubwiganze mu nteko ntaho rihuriye n’umuntu runaka ku giti cye, ni ihuriro ryashyizweho hagamijwe guteza imbere imibereho myiza y’abaturage.

Kabila ndamwubaha nk’umuntu wahoze ari umukuru w’igihugu, ariko sinkeka ko nyuma y’imyaka 18 ku butegetsi afite ikindi cyo guha abaturage ba Congo. Yakoze ibyo yari ashoboye, ni umwanya wa Perezida Tshisekedi gushyira mu bikorwa imigabo n’imigambi ye abinyujije muri Guverinoma nshya azashyiraho.

Mwandwe avuga ko mu myaka 18 Kabila yamaze ku butegetsi, nta kindi afite yageza ku banye-Congo

IGIHE: Ese ubona Kabila atazakoresha ubundi buryo akihimura?

Mwandwe: Aha turavuga ku hazaza ha Congo. Abaturage ba Congo bazi neza Kabila kandi na we azi neza ko hari umurongo ntarengwa.

IGIHE: Ese byagenze bite ngo benshi mu bahoze muri FCC bemere kwinjira muri Union sacrée ya Tshisekedi?

Mwandwe: Icyo umuhuza yakoze, yeretse abagize Inteko Ishinga Amategeko imigabo n’imigambi Perezida afitiye abaturage, hanyuma benshi mu badepite barabishyigikira. Rwose ntaho bihuriye n’umuntu runaka, ni ku nyungu z’igihugu.

IGIHE: Ese umuntu yakwizera ko aba bo batazatererana Tshisekedi nkuko bagenje Kabila?

Mwandwe: Imana niyo yabimenya. Njye nakwizera ko nta kibazo kizaba kuko icyo bose barajwe ishinga nacyo ni ejo hazaza h’igihugu. Igihe kirageze ngo turebe ejo hazaza h’igihugu cyacu.

IGIHE: Ese abaturage ba Congo bose bari inyuma ya Tshisekedi muri aya mavugurura?

Mwandwe: N’Imana ubwayo bayigometseho ariyo mpamvu uyu munsi tuvuga Shitani. Sinkeka ko Perezida afite impungenge ku kuba abaturage bose bamushyigikiye, gusa nizera ko na we abizi neza ko imigabo n’imigambi afite biganisha igihugu aheza. Bizasubiza Congo inzozi zayo zatakaye mu myaka yashize.

Mbere y’amatora, hari abantu batemeranyaga na we ariko uyu munsi bemeye kumushyigikira. Hari n’abatarashoboraga kuvuga mu kanwa kabo izina rye, nyamara uyu munsi nibo bari kuvuganira imigabo n’imigambi ye. Ni ugutegereza igihe, byose ni ku neza y’abaturage.

IGIHE: Kabila yahoze akomeye mu gisirikare, ese uyu munsi igisirikare cyose kiri inyuma ya Tshisekedi?

Mwandwe: Imana ishimwe ko uyu munsi nibura tuvuga igisirikare cy’igihugu aho kuba icy’umuntu ku giti cye. Itegeko Nshinga ryacu rivuga ko Perezida ari we mugaba w’ikirenga w’ingabo. N’ubundi ni we ufite ijambo rikomeye mu gisirikare.

IGIHE: Hari ababona ibibera muri RDC nk’ibiteye impungenge ndetse bishobora kuvamo imvururu, ubibona ute?

Mwandwe: Ni imyumvire yabo, nta mvururu mbona zishoboka. Abantu bagomba kumva ko Congo itakiri cya gihugu kidatanga icyizere ku bagituye, cyahindutse igihugu gitanga icyizere ku bagituye. Benshi mu banye-Congo barajwe ishinga no gushyira mu bikorwa imigambi ya Perezida.

IGIHE:Ni irihe tandukaniro hagati ya Union sacrée ya Tshisekedi na FCC ya Kabila?

Mwandwe: Itandukaniro riri hagati ya FCC na Union sacrée, ni uko FCC ari ihuriro ryashinzwe rigamije gutsinda amatora (2018). Ku rundi ruhande, Union sacrée yashyizweho ngo izane amavugurura mu nzego zitandukanye, mu ntego nyamukuru yo guteza imbere ubuzimabwiza n’ubukungu bw’abatuye Congo.

Hashize iminsi hagati y'impuzamashyaka ya Kabila n'iya Tshisekedi hari umwuka mubi, ushingiye ku byemezo batumvikanyeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .