Icyo PL ihishiye Abanyarwanda nitorerwa kujya mu Nteko

Yanditswe na Mathias Hitimana
Kuya 27 Kanama 2018 saa 01:58
Yasuwe :
0 0

Ishyaka riharanira ukwishyira ukizana kwa buri Muntu (PL), rirahatanira imyanya mu Nteko Ishinga Amategeko, Umutwe w’Abadepite, mu migambi yo gukomeza iterambere ry’igihugu rishingiye ku muturage.

PL imaze imyaka 27 muri politiki yaba mu Nteko Ishinga Amategeko, Guverinoma n’izindi nzego z’ubuyobozi bw’u Rwanda. Perezida waryo Donatille Mukabalisa, ni we wayoboraga Umutwe w’Abadepite ucyuye igihe.

Mu kiganiro cyihariye na IGIHE, Mukabalisa, yagaragaje ko bafite icyizere n’ubushobozi kuko gusobanukirwa neza inshingano z’Inteko, byatumye PL itoranya neza abakandida-depite 80 bafite ubumenyi, ubunararibonye n’ubwangamugayo kuko ‘ntawe utanga icyo adafite’.

Ku byerekeye amashuri, abenshi barangije za kaminuza mu bintu bitandukanye. Muri 20 ba mbere ku rutonde, babiri bafite impamyabumenyi y’ikirenga; umunani barangije icyiciro cya gatatu; abandi 10 barangije icya kabiri.

Mukabalisa yashimangiye ko mu gutora amategeko, PL izaharanira ko bikorwa neza, hasesenguwe politiki y’igihugu, hakanumvwa ibitekerezo by’abaturage.

Ati “Kubera ko amategeko aba akorerwa Abanyarwanda biba ari ngombwa ko twumva n’ibitekerezo by’Abanyarwanda kuri iryo tegeko.”

Ibyo bitekerezo bigatangwa hifashishijwe ikoranabuhanga cyangwa abantu bitabira imirimo ya komisiyo y’Abadepite iri kuryiga. Ku itegeko rikora ku buzima bw’abaturage, Mukabalisa avuga ko Abadepite bagomba kujya mu baturage bakumva icyo baritekerezaho.

Kurushaho kwegera abaturage mu kumva no gushakira ibisubizo ibibazo byabo, ni irindi sezerano PL ihishiye Abanyarwanda.

Ijisho ku byiciro by’Ubudehe

Politiki y’ibyiciro by’Ubudehe yakunze kugaragaramo ibibazo, aho hari abashyirwa mu cyiciro bikabavutsa amahirwe amwe n’amwe.

Mukabalisa yavuze ko hazigwa neza ku byiciro by’Ubudehe, hakarebwa ko abantu bafashwa neza kwifasha, abari mu cyiciro cy’abafashwa bagatera imbere.

Ku barangiza amashuri yisumbuye, icyiciro cy’Ubudehe barimo kikabagabanyiriza amahirwe yo gufashwa na leta kandi ababyeyi badashoboye kubarihira, PL izaharanira ko bikosorwa.

Mukabalisa ati “Ni ibintu byagiye bigaragara twumva tuzaharanira ko bikosoka…niba dushaka kubaka igihugu gishingiye ku bumenyi, uwo mwana ufite ubumenyi agomba guhabwa amahirwe yose ashoboka kugira ngo abashe kubuteza imbere, abashe kubwongera, bubashe kumugirira akamaro, bubashe no kugirira igihugu akamaro.”

Abahinzi mu biraje ishinga PL

PL izirikana ko hakenewe ubuhanga, ubumenyi kandi ibikorwa byose bigashingira ku bushakashatsi kugira ngo umuhinzi azagere ku musaruro mwinshi.

Mukabalisa avuga ko ubuso buto igihugu gifite, bugomba gukoreshwa neza, ubushakashatsi bukerekana ibihingwa bibereye buri karere.

Mu gihe umusaruro wabonetse ari mwinshi, hakaboneka uburyo bwo kuwutunganya, ukagezwa ku isoko mpuzamahanga, bikanagabanya icyuho kiri hagati y’ibyo u Rwanda rutumiza n’ibyo rwohereza hanze.

Mukabalisa avuga ko PL izakora ubuvugizi, hakajyaho uburyo bufasha abahinzi borozi kubona amafaranga yo gushora mu bikorwa byabo kinyamwuga, ngo uwo musaruro uboneke.

Ati”Birasaba ko habaho banki yihariye kuko byagiye bigaragara ko banki zigenda biguru ntege mu gutanga inguzanyo ku buhinzi n’ubworozi.”

Uretse iyo banki, PL irizeza abaturage ko izaharanira ko hajyaho ikigega cy’ubwishingizi.

Si mu buhinzi gusa, iri shyaka ryishimira ko hashyizweho amategeko meza yorohereza ishoramari mu gihugu.

Rivuga ko rigomba guharanira ko haboneka Abanyarwanda bafite ubumenyi bazakora mu nganda nto n’inini zizashingwa.

PL ivuga ko buri karere hazitabwa mu kubyaza umusaruro amahirwe gafite kandi n’ibikorwa gakeneye hakarebwa niba byitaweho mu ngengo y’imari ya leta. Bitashoboka mu mwaka umwe, bigashyirwa mu ukurikiraho.

Mu matora ya 2003, PL yatsindiye intebe esheshatu mu Nteko; mu 2008 ibona enye naho mu ya 2013 itsindira itanu.

Mu yo muri Nzeri 2018, Mukabalisa afite icyizere ko iziyongera bitewe n’uko abaturage babakira aho biyamamariza, politiki nziza n’abakandida bafite ubumenyi.

Nk’ishyaka risanzwe mu nteko, Mukabalisa, yavuze ko nibasubiramo bazaharanira kunoza no gukosora ibitarakozwe neza mu gihe cyashize, bigafasha kugera ku nshingano z’abadepite zirimo gushyiraho amategeko, kumenya no kugenzura ibikorwa n’imikorere bya Guverinoma.

Kubikosora bizakorwa abaturage begerwa kurushaho kugira ngo ibitekerezo byabo n’ibibazo bafite byumvwe bishakirwe ibisubizo.

Perezida wa PL Mukabalisa avuga ko bafite icyizere baterwa n'ubunararibonye bafite mu Nteko Ishinga Amategeko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza