Icyo Perezida Kagame yaganiriye na Emmanuel Macron w’u Bufaransa muri G7

Yanditswe na Ferdinand Maniraguha
Kuya 3 Nzeri 2019 saa 10:42
Yasuwe :
0 0

Mu Cyumweru gishize Perezida Paul Kagame yitabiriye inama ihuza abayobozi b’ibihugu birindwi bikize ku Isi (G7) yabereye mu mujyi wa Biarritz mu Bufaransa.

Ni inama yari yatumiwemo abandi bakuru b’ibihugu umunani bitari muri G7, barimo batanu bo ku mugabane wa Afurika.

Muri iyo nama yabaye guhera tariki 24 ikageza tariki 26 Kanama, byari biteganyijwe ko Perezida Kagame ahura na mugenzi we w’u Bufaransa Emmanuel Macron, bakagirana ibiganiro birambuye ku mubano w’ibihugu byombi.

Ntabwo byakunze ko uwo muhuro wihariye w’abo bakuru b’ibihugu uba ariko babonye akanya gato ko kuganira mu gihe iyo nama yari iri kuba, nkuko Jeune Afrique yabitangaje.

Macron yamenyesheje Perezida Kagame ko ambasaderi mushya u Rwanda ruherutse gushyiraho ngo aruhagararire mu Bufaransa, ari we François-Xavier Ngarambe yemejwe n’inama y’abaminisitiri b’u Bufaransa yateranye kuwa 21 Kanama 2019. Ngarambe yasimbuye Jacques Kabale wari umazeyo imyaka icumi.

Mu bindi abakuru b’ibihugu byombi baganiriyeho, harimo gufungura i Kigali Ikigo cy’Umuryango uhuza ibihugu bikoresha ururimi rw’Igifaransa (Institut de la francophonie) ndetse no kugarura mu Rwanda ibikorwa by’Ikigo cy’u Bufaransa gishinzwe Iterambere (AFD).

Umubano hagati y’u Rwanda n’u Bufaransa utangirira mu 1962 u Rwanda rukibona ubwigenge.

Nubwo nyuma ya Jenoside yakorewe Abatutsi wajemo agatotsi, bisa n’ibiri gufata umurongo mwiza guhera mu 2017 nyuma yo gutorwa kwa Perezida Emmanuel Macron.

Muri Kamena, Umuyobozi Mukuru w’Ikigega Mpuzamahanga cy’Abafaransa gishinzwe Iterambere (Agence Française de Developpément , AFD), yaje mu Rwanda yizeza gukomeza gufatanya mu bikorwa by’iterambere. Umuyobozi w’icyo kigo yahaherukaga mu 1992.

Macron yamenyesheje Perezida Kagame ko ambasaderi mushya u Rwanda ruherutse gushyiraho ngo aruhagararire mu Bufaransa, ari we François-Xavier Ngarambe yemejwe n’inama y’abaminisitiri b’u Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza