00:00:00 IGIHE NETWORK KN KINYARWANDA EN ENGLISH FR FRANCAIS

Hashyizweho Minisiteri nshya y’Ubumwe bw’Abanyarwanda

Yanditswe na Ferdinand Maniraguha
Kuya 14 Nyakanga 2021 saa 10:58
Yasuwe :
0 0

Inama y’Abaminisitiri yateranye kuri uyu wa Gatatu, tariki 14 Nyakanga 2021, iyobowe na Perezida Paul Kagame, yashyizeho Minisiteri nshya y’Ubumwe bw’Abanyarwanda n’inshingano mboneragihugu.

Ni minisiteri izaba ifite inshingano zo kwimakaza ubumwe bw’Abanyarwanda, kubungabunga umurage w’amateka no gutoza uburere mboneragihugu.

Ni bwo bwa mbere mu mateka y’u Rwanda Minisiteri nk’iyi ishyizweho. Iyi Minisiteri izahuriza hamwe inshingano zari zifitwe na Komisiyo y’Igihugu ishinzwe kurwanya Jenoside (CNLG) n’iza Komisiyo ishinzwe Ubumwe n’Ubwiyunge.

Yitezweho gufasha u Rwanda gukomeza kwimakaza ubumwe bw’abenihugu, kubika no kurinda amateka ya Jenoside yakorewe Abatutsi ndetse no gutoza urubyiruko indangagaciro z’uburere mboneragihugu.

Ntabwo hatangajwe impamvu y’iyi Minisiteri nshya. Ije mu gihe ibipimo bitandukanye bigaragaza ko Abanyarwanda babanye mu mahoro, nta vangura n’amacakubiri ugereranyije no mu myaka yashize.

Ubushakashatsi bwa gatanu ku gipimo cy’ubwiyunge mu Rwanda bwasohotse mu 2020 bukozwe na Komisiyo y’Ubumwe n’Ubwiyunge, bwerekanye ko ubwiyunge mu Banyarwanda buri ku kigero cya 94.7%

Minisiteri y’Ubumwe bw’Abanyarwanda n’inshingano mboneragihugu ibaye Minisiteri ya 20 mu zigize Guverinoma. Ije isanga izindi zirimo Minisiteri y’Ubutegetsi bw’Igihugu (MINALOC), Minisiteri y’Ibikorwa Remezo (MININFRA), Minisiteri y’Ubucuruzi n’Inganda (MINICOM), Minisiteri y’Ubuhinzi n’Ubworozi (MINAGRI), Minisiteri y’Imari n’Igenamigambi (MINECOFIN)na Minisiteri y’Uburezi (MINEDUC).

Hari kandi Minisiteri y’Ubuzima (Minisante), Minisiteri y’Ingabo (Minadef), Minisiteri y’Ubutabera (MINIJUST), Minisiteri y’Ikoranabuhanga mu Itumanaho na Inovasiyo (MINICT), Minisiteri y’Urubyiruko n’Umuco (MINIYOUTH), Minisiteri ya Siporo (MINISPORTS), Minisiteri y’Abakozi ba Leta n’Umurimo (MIFOTRA) na Minisiteri y’Ububanyi n’Amahanga n’Ubutwererane (MINAFFET).

U Rwanda kandi rufite izindi Minisiteri zirimo Minisiteri y’Ibidukikije (MoE), Minisiteri ishinzwe Ibikorwa by’Ubutabazi (MINEMA) na Minisiteri y’Uburinganire n’Iterambere ry’Umuryango (MIGEPROF).

Minisiteri y'Ubumwe bw'Abanyarwanda ije isanga igipimo cy'Ubumwe mu Rwanda kigeze kuri 94.7%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .