Habineza yemejwe nk’umukandida wa Green Party mu matora y’Umukuru w’Igihugu

Yanditswe na Kanamugire Emmanuel
Kuya 19 Werurwe 2017 saa 01:21
Yasuwe :
0 0

Dr Frank Habineza yemejwe nk’umukandida wa Green Party mu matora y’Umukuru w’Igihugu, kuri iki Cyumweru, ariko avuga ko ishyaka ayoboye rifite ikibazo cy’ingengo y’imari yo kwifashisha, asaba abarwanashyaka be ‘kugurisha amasaka, ibigori n’ibirayi’ kugira ngo amafaranga agera kuri miliyari n’igice akenewe mu matora azaboneke.

Ibi Frank Habineza yabitangaje kuri iki Cyumweru ubwo hateranaga Inteko Rusange nyuma y’aho Inama ya Biro Politiki y’Ishyaka riharanira Demokarasi no Kurengera Ibidukikije, Green Party, mu Ukuboza umwaka ushize yari yamugennye nk’Umukandida waryo mu matora y’Umukuru w’Igihugu yo muri Kanama 2017.

Ubwo yari amaze kwemezwa nk’umukandida ugomba guhagararira iri shyaka, Dr Habineza yashimiye abarwanashyka ku bw’icyo gikorwa abizeza kuzabahagararira.

Dr Habineza agaruka ku matora y’Umukuru w’Igihugu. yavuze ko kugira ngo Green Party iyitabire biyisaba amikoro agera kuri miliyari imwe n’igice kandi kugira ngo aboneka bisaba uruhare rw’abarwanashyaka.

Yagize ati “Abafite amasaka muyagurishe, abafite ibigori mubigurishe, abafite ibirayi mubigurishe kugira ngo igikorwa cy’amatora kizabashe kugenda neza. Amafaranga tuzakenera twarabaze dusanga agera kuri miliyari imwe n’igice; ntabwo ari amafaranga make. Buri wese yitange uko yifite, ufite igihumbi akizane, ufite bitanu, icumi, miliyoni kuko inkunga yanyu irakenewe. Kugira ngo ishyaka ryacu rizitabire amatora ribashe gutsinda ni uko buri murwanashyaka ahaguruka."

Hari hashize iminsi Dr Habineza atangaje ko ishyaka Green Party riteganya kwaka inguzanyo muri banki kugira ngo ribone ingengo y’imari rizakoresha mu bikorwa byo kwiyamamaza mu matora ya Perezida wa Repubulika.

Iyi nteko rusange yitabiriwe n’abarwanashyaka ba Green Party bahagarariye abandi ku rwego rw’Uterere n’Intara basaga 400.

Ishyaka rya Green Party ryemewe gukorera mu Rwanda mu mwaka wa 2013. Imibare y’abarwanashyaka iheruka kujya ahagaragara yerekanaga ko bari bamaze kugera ku bihumbi 200 n’ubwo abayobozi batasobanuye igihe babaruriwe.

Dr Frank Habineza nyuma yo kwemezwa nk'umukandida yasabye abarwanashyaka gukusanya amafaranga yo kwitabira amatora
Depite Nyirarukundo Ignacienne, umwe mu bari bahagarariye andi mashyaka akorera mu Rwanda
Abarwanashyaka ba Green Party ubwo bamwemezaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244