Kwamamaza

Bugesera: Mukabaramba yakirijwe uruhuri rw’ibibazo

Yanditswe kuya 15-09-2016 saa 11:08' na Emma-Marie Umurerwa


Umunyamabanga wa Leta ushinzwe imibereho myiza y’abaturage muri Minisiteri y’Ubutegetsi bw’Igihugu, Dr Alvera Mukabaramba, yijeje abatuye mu Murenge wa Nyarugenge, mu Karere ka Bugesera kuzasubirayo akabafasha gukemura uruhuri rw’ibibazo bamugaragarije ko bafite.

Amakimbirane yo mu miryango, ibibazo bya Mituweli na VUP, ibyiciro by’ubudehe, imanza, abahawe serivisi zitanoze n’ibindi bibazo bitandukanye ni bimwe mu mu byo abatuye mu Murenge wa Nyarugenge bakirije Dr Mukabaramba, kuri uyu wa 14 Nzeri 2016, ubwo hatangizwaga ukwezi kw’imiyoborere myiza kuzasozwa mu mpera z’Ukwakira 2016.

Nyuma yo gutangiza ku mugaragaro uku kwezi gufite insanganyamatsiko igira iti “Imiyoborere ishingiye ku muturage, inkingi y’iterambere rirambye”, Dr Mukabaramba yahaye abaturage umwanya wo kubaza ibibazo, ariko ababwira ko yihuta ari bwakire ibibazo bitarenze bibiri. Akivuga atyo, abaturage basaga 70 bahise bamuhagarara imbere, bamutakambira ngo abakemurire ibibazo.

Dr Mukabaramba yagize ati “Nzagaruka kandi no mu minsi ishize nari ndi hano, niba nzaza nkahirirwa umunsi wose, niba nzabigenza gute simbizi, gusa dukwiye kwicara tugafatanya gukemura ibibazo mufite. Abaturage bishyuye Mituweli bakaba batarazibona, n’ibindi bibazo bafite kuri mituweli, amakosa nayashyira ku bayobozi kubera ko batabasobanuriye amabwiriza twabahaye. Nzagaruka turebe aho bipfira, biragaragara ko mu nzego z’ibanze hano harimo ikibazo.”

Dr Mukabaramba yakomeje abaza abayobozi b’inzego z’ibanze impamvu imyanzuro ifatwa ku bibazo abaturage baba bagaragaje idashyirwa mu bikorwa, ikibazo yahuriyeho n’umuyobozi w’Akarere ka Bugesera, Nsanzumuhire Emmanuel, na we wibajije impamvu abaturage bahorana ibibazo kandi ngo akunze kubasura kenshi ndetse akabafasha no kubikemura.

Yagize ati “Ku itariki 19 z’uku kwezi tuzagaruka muri uyu murenge wa Nyarugenge, ariko uyu murenge tumaze kuzamo inshuro eshatu, narongeye ndagaruka zishobora kuba ari inshuro enye. Ibibazo dusiga duhaye umurongo bimeze bite ko bigaruka?”

Ku ruhande rw’uyu murenge, Karugwiro Antoinette, Umunyamabanga Nshingwabikorwa wawo w’agateganyo avuga ko impamvu abayobozi bakuru bavuze ko muri uyu murenge ibibazo by’abaturage bidakemurwa ari uko baje bihuta ku buryo ngo batabashije gusesengura neza ibibazo by’abaturage, kuko ngo usanga hari baba abafite ibibazo bidafututse ahubwo bagashaka kubikuririza.

Ukwezi kw’imiyoborere kwatangijwe mu mwaka wa 2011, kuri ubu kuba inshuro ebyiri mu mwaka, aho abayobozi begera abaturage bakabakemurira ibibazo, bakanafatira hamwe ingamba z’iterambere.

Abaturage bari benshi ubwo hatangizwaga ukwezi kw'imiyoborere myiza
Abaturage batari bake bahise bahagarara imbere ya Dr Mukabaramba banga ko agenda atumvise ibibazo byabo
Meya Nsanzumuhire ntiyumva ukuntu batanga umurongo wo gukemura ibibazo ntibikorwe
Dr Mukabaramba avuga ko azagaruka vuba muri uyu murenge gukemura ibibazo by'aba baturage

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved