Abadepite bo muri Suède biyemeje uruhare mu ifatwa ry’abakekwaho Jenoside

Yanditswe na Uwishyaka Jean Louis
Kuya 10 Nzeri 2016 saa 07:02
Yasuwe :
0 0

Abadepite bo muri Suède biyemeje ko bagiye gukora ibishoboka byose kugira ngo abakoze Jenoside yakorewe Abatutsi mu 1994 bihishe mu gihugu cyabo bafatwe bashyikizwe ubutabera.

Ibi babyiyemeje ku wa Kane w’iki cyumweru nyuma yo gusura urwibutso rwa Jenoside rwa Kigali ruri ku Gisozi, bakagirana ibiganiro na Perezida w’Inteko Ishinga n’abadepite bo muri Komisiyo Ishinzwe Imibereho myiza y’Abaturage.

Aba badepite icyenda baje mu Rwanda bafite intego yo kuganira na Perezida w’Inteko Ishinga Amategeko y’u Rwanda, Umutwe w’Abadepite ndetse na bagenzi babo bo muri Komisiyo y’imibereho myiza mu Nteko Ishinga Amategeko y’u Rwanda.

Basobanuriwe intambwe u Rwanda rwateye nyuma y’uko rwapfuye rukazuka mu myaka 20 ishize none rukaba rugeze ku iterambere rirambye.

Inteko Ishinga Amategeko y’u Rwanda yasabye abadepite bo muri Suède gukora uko bashoboye bagashishikariza ibindi bihugu by’i Burayi guta muri yombi abakekwaho gukora Jenoside yakorewe abatusti mu Rwanda bacyidegembya i Stockholm muri Suède no mu yindi mijyi itandukanye y’i Burayi.

Ubwo yaganiraga n’itangazamakuru, Depite Johan Forssell, yavuze ko nibasubira muri Suède bazakangurira Guverinoma y’igihugu cyabo n’abaturage gukora ibyihuse kuri iki kibazo kugira ngo abakekwaho gusiga bakoze Jenoside mu Rwanda batabwe muri yombi bashyikirizwe ubutabera.

Yagize ati “ Iki ni ikibazo tugomba guha agaciro, kuko kuva na mbere Suède yakomeje kugira uruhare rukomeye mu gushakisha ababa barakoze ibyaha bya Jenoside, bitari u Rwanda gusa ndetse n’iyahoze ari Yugoslavia. Nta makuru menshi mfite ku by’u Rwanda ariko ni cyo kibazo tugiye kwigaho."

Mu kwezi kwa Gatanu uyu mwaka, urukiko rw’i Stockholm muri Suède, rwaburanishije umunyarwanda ufite ubwenegihugu bwa Suède, Berinkindi w’imyaka 61, rumukatira igifungo cya burundu nyuma yo kumuhamya ibyaha bya Jenoside n’ibyaha by’intambara yagizemo uruhare mu gihe cya Jenoside yakorewe abatutsi mu 1994.

Mu myaka ibiri ishize kandi iki gihugu cyaburanishije undi munyarwanda witwa Stanislas Mbanenande wahoze ari umwarimu muri kaminuza nkuru y’u Rwanda kimukatira gufungwa burundu nyuma yo guhamwa n’ibyaha bya Jenoside yakorewe abatutsi mu Rwanda.

Aba badepite bagiye kuva mu Rwanda bihaye umuhigo wo gukangurira abashoramari bo muri Suède gushora imari yabo mu Rwanda, nyuma yo kwerekwa amahirwe yo gukora ishoramari ari mu Rwanda.

Perezida w’Inteko Ishinga Amategeko y’u Rwanda, Donatille Mukabalisa yavuze ko amateka u Rwanda rwanyuzemo n’uko rwiyubatse bikora ku mutima abantu banyuranye, agahamya ko bigira uruhare mu kugaragaza ishusho y’u Rwanda no kuzamura urwego rw’ubutwererane n’amahanga.

U Rwanda rusanzwe rufitanye imibanire myiza na Suède aho cyane cyane uyu mubano wakunze kugaragarira mu burezi.

Uyu mubano mwiza kandi watangiye nyuma ya Jenoside yakorewe abatutsi aho u Rwanda rwafunguraga ambasade i Stockholm mu 2007, Suède na yo iyifungura i Kigali muri 2010.

Biteganyijwe aba badepite bazava mu Rwanda mu cyumweru gitaha nyuma yo gusura imishinga itandukanye y’u Rwanda iherereye hirya no hino mu gihugu.

Abadepite bo muri Suède mu biganiro na Komisiyo y'Imibereho myiza y'Abaturage mu Nteko Ishinga Amategeko y'u Rwanda
Aba badepite bafatiye amafoto ahari ikimenyetso cy'ubutwari bw'ingabo z'u Rwanda

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244